Khrista to Atoknokko Loanbü

Khristaei leiyenbü kho atoknokko kila shanga ki, kheijinei kipan aplonga Ngühkhüm pendou danko sepeilabü dogo Pauleikei thüpetenkei. Lausikei atoknokko kho phe shanga younak jeila aying: maanglemei khangenda, hoba phe kümsilei chempen hangletnyu yeitiko, müt seneibü Bou sangle ka ühütida; lausikei Soushou Saopobü maanglem, yaangbü, khümenbü hoba natenbü juongtida.

Chapter 5.

Sen atoknokko kila shanga Khristaei leiyenkei. Kheijinei kaangkhühtham loashi, toukei aaola sek alaütijan.

Chühashi, ngo Pauleikei kan to lenda, kanei kipan apalonga, Khristaei kan to aiche bene akulabü. Ngei ladangkei aukabü kuda, kipan apbü bousu pendouei Ngühkhüm pendou jungeilabü. Ngühkhüm danko saopobü yeila lambü kan kho Khrista ka wapan apkei; onou ka kanei üatti. Aishanga Soushou Saopobü danko, mailemei, saopobü maanglem senei aicheküman haisühda. Aishanga Khrista Jisu to kijinei, kipan apbü ayingsi kipan aapbü ai athükda; lausikei sanou danko kümdaleibü mailem ongkei thükda.

Kanei maijemaikei laangkei. Kanei ngühmai ajungeiko shanga, aoei kan the sepeikei? Ho hehoat ngüh kho, kan ngabü Bou ka alouda. Tokai shishoei wen pendou kho jinkuda. Ngo Bunyubou to tükdea, kanei lubü maangpon ataketlabü dogo; aieilausi kan to hongeibou aoyou ongkei mat künlabü.

Lausikei jaisina shuong, ngei jaüan kipan apbü shangabü songlen longa, aila ngo jaüan shieinangeida? Kheijinei peiseibü shedbü mautikei. Kan hongeibü shuongei haoen lolo temlang lipan apbua tegükei maikhoulabü! ^a

Jaisina shuong, kan atoknokko kila shanga ngakei; lausikei kho atoknokko kho phe shanga younak jeila ayeitijan; aeiko sanou danko cheei che khangenashi.

Aishanga Ngühkhüm pendou kho sakkubü che to loushada: “Nyi kaibü lepbou to nyi mütpem tegü sanoulabü.”

Lausikei kanei cheei che to suiko shedtialonga, cheei che ka amautila maangsangashi.

Lausikei ngei lenda: Soushoua paiashi, kheijinei kanei phe dühbü akümlabü. Phe kho Soushou khulimbo mangsühda, hoba Soushou kho phe khulimbo mangsühda; habü nyi oyophetyoda, khoei kanei mangsühbü kho akümlabü. Lausikei kanei Soushouei lealonga, kanei Ngühkhüm phanga aki. Phe kümsilei shuong kho thonan kida: pejapela, asaopobü, haangalongbü dühbü, Mühghaü lembü, seibüyaübü, mangsenyobü, oyophetyobü, nyekto shatbü, khauangbü, ailamaiphopbü, phenyembü, tan tan yeibü, dühbü, ih shauko kangbü, ihkang kambü, hoba khübü tegü thinei. Ngei shangied lenbü tegü touje kan to maangsang lenda: kho tegü kümbü shuongei seneibü Bou Sangle apailetlabü.

Lausikei Soushou hek kho sanou, olinbü, haksobü, lounyu natenbü, onou, maibü, maanglembü, thuibü, lolo thepetbü. Kho tegü thinei khulimbo Ngühkhüm aying. Hoba Khrista Jisuei ngabü shuongei phe kho khübü düh hoba mangsühbü yoa peiseia thüngkei. Senei Soushoua langkei kialonga, Soushou phaikei semakho. Senei maang lilibü ayeitijan, cheei che to shattiko, cheei che to dühko.