Khristali Ningkhān eina Nganinga
Khristana ningkhān chi ngatangmihaira, chiwui vang ahui rimshokakha ain katonga azingli hanungga zangra da Paulna hāngmachi. Kha ningkhān hi ningkachāng saikora sāpai kaji maningmana: leikashina ngachonmi, kala phasāwui otsakna churchli sākakāda ithumwui Avāwui wungramli mibingli mazangsak, kha Manglāna leikashi, khamathān, chingri kahai, lumashankathei khangasāng ngasaka.
5 1Khristana ithumli ningkhān khavai ningkhān ngasakhaira. Chieina nganingtitlu. Latluida narkahaili mavāngarumalu.
2Nganālu: Paul ina nathumli kahāngna: nathum ahui rimshokakha, Khristana nathumwui vang kānkhanā khikha maleimara. 3Ina latluida shākhi mina: ahui rimshok khuisanga mi kachiva̱na ain katonga mayonphalungra. 4Ain eina khamashung phābing nathum Khristawui eina katathaira; nathum lukhamashan chiwui eina pitāhaira. 5Kaja Manglā Kathara eina shitkasang eina khamashung khangarongwui kachihān chi ithumna honda lei. 6Kaja Khrista Jishuli ahui rimkashoknala lah marimkashoknala maningmana; kha leikashi eina ot kasā shitkasang china akachangana.
7Nathum mathālak eina zata. Khipāna nathumli khamashung chi nganā mangasā ngasak khavai kakhām sāhaokhala? 8Hi ningkhuisang chi nathumli hokakhuia ithumwui Avāwui eina kharā maningmana. 9Khawok kateokha china khamuitang katonga kapchung ngasaka. 10Nathumna khangatei kaphaning masā ngasakmara da Proholi ina chihana; kha nathumli kakhanang ngasaki china akhalatta bichar chi phungki kajina.
11Kha ivānaobing, ina aruila ahui rimkashok hāshokakha, khisāda aruila ili rekharekkhala? Chithākha krushwui khanang chi shimānhaira. 12Nathumli pa̱ngapā ngasakabing china themlāk khalattawui khayā rimtā ngasaki kaja teokha phāralā! a a v12 Paulna pingda katattā tui hānga: katattā chiya khamataiya jiakha, ahui rimkashok tamchitheibing china vākatangshong eina tangda zatranu.
13Ivānaobing, nathumli ningkhān khavai hokakhuina. Kha ningkhān chi phasāwui vang kachā atam masā ngasakalu; kha leikashi eina akha eina akha otram ngatha̱lu.
14Kaja ain katonga hi ningkhami akhali ungshunghaira: "Nawui khongnainaoli nakhalatta thada leishilu."
15Kha nathum akha eina akha mara̱ra tukshai sāakha, akha eina akha shimān mangasā ngasak khavai ning ngasharlu.
16Kha ina kahāngna: Manglā eina zatlu, chieina nathumna phasāwui ningkachāng chi ungshung masā ngasakmara. 17Phasā china Manglāli ngakaikashi chi sāngai, kala Manglāna phasāli ngakaikashi chi sāngai; akha eina akha ngakaikazam, chieina nathumna sākhangai chi masā ngasakmara. 18Kha Manglāna nathumli thānzatakha, nathum ainwui azingli maleimana. 19Phasāwui otsak chi thatheihai: khamathang-khamarang, makathar, zamkhor sākhangangai. 20Meoma̱li khokharum, meowor, yangkakharing, nganang, mikpaikashi, malungkhavāt, ichichāwui kaphaning, ngakai ngarok, mijang khangarok, 21yuikashi, khamarip, lumlaokasa, kala hikathāthā otbing. Rida hāngkahaiwui kathāda, ara ina nathumli hāngkhamachinna: hikathā ot sākasābingna ithumwui Avā wungramli mazangmara.
22Kha Manglāwui athei chiya leikashi, khamathān, chingri kahai, ja̱khami, ningaikashi, khamathā, ningkatong, 23malungkhanim, khalatta khangarin. Hikathā otbingli ngakaikashe ain maleimana. 24Kala Khrista Jishuwui mibingna phasāli awui ningkachāng kala khangachā ngasoda krushli shaothathaira. 25Ithumna Manglā eina ringakha, ithumla Manglā ngasoda zatsa. 26Akha eina akha malungvāt ngasakta, akha eina akha yuishi ngarokta, ithum khayāning khanganinga masaasa.
