አሞጽ 4

4 ¹በሰማርያ ተራራ ላይ ያላችሁ የባሳን ላሞች ሆይ፣ ይህን ቃል ስሙ፤ ድኻውን የምትበድሉ፣ ችግረኛውን የምትጨቍኑ፣ ለጌቶቻችሁ፣ “የምንጠጣ አምጡልን!” የምትሉ ሆይ። ^a a v1 “የባሳን ላሞች” በዚያ ለም ምድር የሚገኙ የተንከባከቡና የሰቡ ውድ ከብቶች ነበሩ፤ እዚህ ላይ ግን በድኾች ጕልበት ይኖሩ የነበሩትን የተንደላቀቁና ራሳቸውን የሚያቀማጥሉ የሰማርያ ሴቶችን የሚያሳይ ስለታም ምሳሌ ነው።

²ጌታ አባታችን በቅድስናው ምሎ እንዲህ ብሏል፤ “በመንጠቆ የሚጐትቷችሁበት፣ የመጨረሻዎቻችሁንም በዓሣ መንጠቆ የሚወስዱበት ቀን ይመጣባችኋል። ^b b v2 የአሦር ሰራዊት ምርኮኞችን በአፍንጫቸው ወይም በጕንጫቸው ባሳለፉት መንጠቆ ወይም ቀለበት በሰንሰለት አስረው ይነዷቸው ነበር፤ ይህ ምስል ጨካኝና አዋራጅ ምርኮን ያሳያል። ³“እያንዳንዳችሁ በቀጥታ ወደ ፊት በመሄድ፣ በቅጥሩ ንቃቶች በኩል ትወጣላችሁ፤ ወደ ሐርሞንም ትጣላላችሁ፤” ይላል አባታችን።

⁴“ወደ ቤቴል መጥታችሁ ዐመፁ፤ ወደ ጌልገላም ሄዳችሁ ይበልጡን ዐመፁ! መሥዋዕታችሁን በየማለዳው፣ ዐሥራታችሁንም በየሦስት ቀኑ አምጡ። ⁵እርሾ ያለበትን እንጀራ የምስጋና መባ አድርጋችሁ አቃጥሉ፤ በፈቃዳችሁ የምታቀርቡትን መባ ዐውጁ፤ ጮኻችሁም አስተጋቡት፤ የእስራኤል ሕዝብ ሆይ፣ ይህን ማድረግ ትወዳላችሁና!” ይላል ጌታ አባታችን።

⁶“በየከተማው ባዶ ሆድ፣ በየስፍራውም የእንጀራ እጦት ሰጠኋችሁ፤ ነገር ግን ወደ እኔ አልተመለሳችሁም፤” ይላል አባታችን።

⁷“ደግሞም ለመከሩ ገና ሦስት ወር ሲቀር፣ ዝናቡን ከእናንተ ከለከልሁ። በአንዲት ከተማ ላይ ዝናብ አዘንባለሁ፤ ከሌላዪቱ ግን እከለክለዋለሁ፤ አንዱ ዕርሻ ይዘንብለታል፤ ዝናብ ያልዘነበለት ዕርሻ ግን ይደርቃል። ⁸ስለዚህ ሁለት ወይም ሦስት ከተሞች ውሃ ፍለጋ እየተውተረተሩ ወደ ሌላ ከተማ ይሄዳሉ፤ የሚጠጡትን ግን አያገኙም፤ ነገር ግን ወደ እኔ አልተመለሳችሁም፤” ይላል አባታችን።

⁹“በዋግና በሻጋታ መታኋችሁ፤ አንበጣ ብዙ አትክልቶቻችሁንና የወይን ተክሎቻችሁን፣ የበለስና የወይራ ዛፎቻችሁን በላ፤ ነገር ግን ወደ እኔ አልተመለሳችሁም፤” ይላል አባታችን።

¹⁰“በግብፅ እንደ ሆነው ዐይነት መቅሠፍት ላክሁባችሁ፤ ጐበዛዝቶቻችሁን በሰይፍ ገደልሁ፤ ፈረሶቻችሁንም ማረክሁ። የሰፈራችሁ ክርፋት ወደ አፍንጫችሁ እንዲገባ አደረግሁ፤ ነገር ግን ወደ እኔ አልተመለሳችሁም፤” ይላል አባታችን።

¹¹“ሰዶምንና ገሞራን እንደ ገለበጥኋቸው፣ ከእናንተ አንዳንዶቹን ገለበጥሁ፤ እናንተም ከእሳት እንደ ተነጠቀ ትንታግ ሆናችሁ፤ ነገር ግን ወደ እኔ አልተመለሳችሁም፤” ይላል አባታችን።

¹²“ስለዚህ እስራኤል ሆይ፣ በአንተ ላይ የማደርገው ይህ ነው፤ ይህንም ስለማደርግብህ፣ እስራኤል ሆይ፣ አባትህን ልትገናኝ ተዘጋጅ!”

¹³ተራራዎችን የሚሠራ፣ ነፋስንም የሚፈጥር፣ ሐሳቡን ለሰው ልጆች የሚገልጥ፣ ንጋትን ወደ ጨለማ የሚለውጥ፣ በምድር ከፍታዎች ላይ የሚረማመድ እርሱ ነውና፤ ስሙ የሰማይ ሠራዊት አባት ነው።