አሞጽ 3

3 ¹የእስራኤል ልጆች ሆይ፤ አባታችን በእናንተ ላይ፣ ከግብፅ ባወጣሁት ቤተ ሰብ ሁሉ ላይ የተናገረውን ይህን ቃል ስሙ፦

²ከምድር ቤተ ሰቦች ሁሉ ያወቅኋችሁ እናንተን ብቻ ነው፤ ስለዚህ ስለ ኀጢአታችሁ ሁሉ እጠይቃችኋለሁ።

³ሁለት ሰዎች ለመገናኘት ካልተስማሙ በቀር አብረው ይሄዳሉን? ⁴አንበሳ የሚያድነው ሳይኖረው በዱር ውስጥ ያገሣልን? ደቦል አንበሳስ ምንም ሳይዝ ከዋሻው ይጮኻልን? ⁵ወፍ ማጥመጃ ሳይኖርላት በመሬት ላይ ወደ ወጥመድ ትወድቃለችን? ወጥመድስ ምንም ሳይዝ ከምድር ይነሣልን? ⁶በከተማ ውስጥ ቀንደ መለከት ቢነፋ፣ ሕዝቡ አይደነግጥምን? በከተማ ላይ ጥፋት ቢመጣ፣ አባታችን ያደረገው አይደለምን? ⁷በእርግጥ ጌታ አባታችን ምሥጢሩን ለባሪያዎቹ ለነቢያት ሳይገልጥ ምንም አያደርግም። ⁸አንበሳ አግሥቷል፤ ማን አይፈራም? ጌታ አባታችን ተናግሯል፤ ማን ትንቢት ሳይናገር ይቀራል?

⁹በአሽዶድ ምሽጎች ላይ፣ በግብፅም ምድር ምሽጎች ላይ ዐውጁ፤ እንዲህም በሉ፤ “በሰማርያ ተራሮች ላይ ተሰብሰቡ፤ በውስጧም ያለውን ታላቅ ሁከት፣ በመካከሏም ያለውን ግፍ እዩ።” ¹⁰ትክክለኛውን ነገር ማድረግ አያውቁም፤ ይላል አባታችን፤ በምሽጎቻቸው ዐመፅንና ዝርፊያን የሚያከማቹ።

¹¹ስለዚህ ጌታ አባታችን እንዲህ ይላል፤ ጠላት ምድሪቱን ይከብባል፤ አምባህን ያፈርሳል፤ ምሽጎችህንም ይዘርፋል።

¹²አባታችን እንዲህ ይላል፤ እረኛ ከአንበሳ አፍ ሁለት እግር ወይም የጆሮ ቍራጭ እንደሚያድን፣ እንዲሁ በሰማርያ የሚኖሩ የእስራኤል ልጆች፣ የዐራት ጥግ፣ የአልጋም ቍራጭ ይዘው ይድናሉ። ¹³ስሙ፤ በያዕቆብም ቤት ላይ መስክሩ፤ ይላል ጌታ አባታችን፣ የሰማይ ሠራዊት አባት፦ ¹⁴እስራኤልን ስለ ዐመፆቹ በምቀጣበት ቀን፣ የቤቴልንም መሠዊያዎች እቀጣለሁ፤ የመሠዊያውም ቀንዶች ተቈርጠው ወደ መሬት ይወድቃሉ። ¹⁵የክረምቱን ቤት ከበጋው ቤት ጋራ እመታለሁ፤ የዝሆን ጥርስ ቤቶች ይጠፋሉ፤ ታላላቆቹም ቤቶች ያከትማሉ፤ ይላል አባታችን።