ኣሞፅ 3 FHB Father's Heart Bible™

3 ¹ኣቱም ደቂ እስራኤል፥ ነዝ ኣቦና ኣብ ልዕሌኹም ዝተዛረቦ ቃል ስምዑ፤ ኣብ ልዕሊ እታ ኻብ ግብፂ ዘውፃእኩዋ ብዘላ ዓሌት እዩ ዝዛረብ ዘሎ፦

²ካብ ኵለን ዓሌታት ምድሪ፥ ንኣኻትኩም ጥራሕ ፈሊጠ፤ ስለዙይ ምእንቲ ዅሉ ሓጢኣትኩም ክቐፅዓኩም እየ።

³ክልተ ሰባት ንኽራኸቡ እንተ ዘይተሰማሚዖም፥ ብሓደዶ ይኸዱ? ⁴ኣንበሳ ግዳይ ምስ ዘይብሉ፥ ኣብ ዱር ይጓዝምዶ? ሽደን ኣንበሳ ገለ እኳ እንተ ዘይሓዘ፥ ካብ በዓቲኡ የእዊዶ? ⁵ዒፍ መፃወድያ ምስ ዘይህልዎ፥ ኣብ ምድሪ ኣብ መፈንጠር ይወድቕዶ? መፈንጠር ገለ እኳ እንተ ዘይሓዘ፥ ካብ ምድሪ ይትስእዶ? ⁶መለኸት ኣብ ከተማ እንተ ተነፍሐ፥ እቶም ህዝቢ ኣይንቀጥቀጡንዶ? ጥፍኣት ናብ ከተማ እንተ መፀ፥ ኣቦና ዘይገበሮዶ? ⁷ብሓቂ እቲ ልዑል ኣቦ፥ ምስጢሩ ነቶም ባሮቱ ነቢያት እንተይገለፀ፥ ገለ እኳ ኣይገብርን እዩ። ⁸ኣንበሳ ጓዚሙ፤ መን እዩ ዘይፈርህ? እቲ ልዑል ኣቦ ተዛሪቡ፤ ካብ ትንቢት ምንጋር ክቍጠብ ዝኽእል መን እዩ?

⁹ኣብ ኣዛጦን ዘለዋ ፅኑዓት ቦታታት፥ ኣብ ምድሪ ግብፂ ዘለዋ ፅኑዓት ቦታታትውን ኣውጁ፤ ከምዙይ ከዓ በሉ፦ “ኣብ እምባታት ሰማርያ ተኣከቡ፤ ነቲ ኣብ ውሽጣ ዘሎ ዓብዪ ወኻዕታ፥ ነቲ ኣብ ማእኸላ ዘሎ ግፍዕን ከዓ ርኣዩ።” ¹⁰ፅቡቕ ምግባር ኣይፈልጡን እዮም፥ ይብል ኣቦና፤ እቶም ኣብ ፅኑዓት ቦታኣቶም ዓመፅን ዘመተን ዘኻዕብቱ።

¹¹ስለዙይ እቲ ልዑል ኣቦ ኸምዙይ ይብል፦ ፀላኢ ነታ ምድሪ ክኸባ፥ ንዕርድኻ ኸፍርስ፥ ንፅኑዓት ቦታኣትካ ኸዓ ክዘምት እዩ።

¹²ኣቦና ኸምዙይ ይብል፦ ጓሳ ኻብ ኣፍ ኣንበሳ ኽልተ ኣእጋር ወይ ቍራስ እዝኒ ኸም ዘናግፍ፥ ከምኡ ድማ እቶም ኣብ ሰማርያ ዝነብሩ ደቂ እስራኤል፥ ምስ ኵርናዕ ዓራት፥ ምስ ክፋል መደቀስ ክናገፉ እዮም። ¹³ስምዑ፥ ኣብ ልዕሊ ቤት ያእቆብ ከዓ ምስክሩ፥ ይብል እቲ ልዑል ኣቦ፥ ኣቦ ሰራዊት ሰማይ፦ ¹⁴ንእስራኤል ብሰንኪ ምትሕልላፉ ብዝቐፅዓሉ መዓልቲ፥ ነቲ መሰውኢታት ቤትኤል ከዓ ክቐፅዖ እየ፤ ኣቕርንቲ እቲ መሰውኢ ኸዓ ተቖሪፁ ናብ ምድሪ ክወድቕ እዩ። ¹⁵ነታ ናይ ክረምቲ ቤት ምስ ናይ ሓጋይ ቤት ክወቕዓ እየ፤ እተን ብስኒ ሓርማዝ ዝተሰርሓ ኣባይቲ ኽጠፍእ፥ እተን ዓበይቲ ኣባይቲ ኸዓ ክውዳእ እየን፥ ይብል ኣቦና።