زمونږ پلار د اِسرائيل محاسبه کوى
غوره کېدل د حساب ورکولو معنا لري، نه د معافيت. يو لړ پوښتنې دا ټکی روښانه کوي چې هره پايله لامل لري: زمری ځکه غرېږي چې ښکار لري، او حاکم پلار خپلو پېغمبرانو ته له ويلو پرته هېڅ نه کوي — نو د سامرې د عاج کورونه به ونړېږي.
3 1دا کلام واورئ کوم چې زمونږ پلار ستاسو په خلاف فرمائيلے دے، اے د اِسرائيلو بچو — د هغې ټولې کورنۍ په خلاف چې ما د مصر نه راوستلئ:
2د زمکې د ټولو کورنيو نه ما يواځې تاسو پېژندلى ياست؛ ځکه زۀ به ستاسو د ټولو ګناهونو حساب درنه واخلم.
3آيا دوه کسان يو ځائ ملګرى ګرځى، کۀ چرې هغوئ د ملاقات وعده نۀ وى کړې؟ 4آيا زمرے په ځنګل کښې غړومبى کله چې د هغۀ سره ښکار نۀ وى؟ آيا د زمرى بچے د خپلې غار نه چغې وهى کۀ هغۀ هيڅ نۀ وى نيولى؟ 5آيا مارغه په زمکه باندې په دام کښې لوېږى کله چې د هغۀ دپاره څنډک نۀ وى؟ آيا دام د زمکې نه راپورته کيږى کله چې هيڅ نۀ وى نيولى؟ 6کۀ په يو ښار کښې بيګل وغږولے شى، آيا خلق به ونۀ لړزيږى؟ کۀ په يو ښار باندې آفت راشى، آيا زمونږ پلار دا نۀ وى کړى؟ 7يقيناً قادر مطلق پلار هيڅ کار نۀ کوى، مګر دا چې خپل راز خپلو نوکرانو، نبيانو ته څرګند کړى. 8زمرے غړومبلے دے — څوک دے چې ونۀ يرېږى؟ قادر مطلق پلار فرمائيلى دى — څوک دے چې د نبوت کولو نه ځان وساتى؟
9د اشدود په قلعو باندې اعلان وکړئ او د مصر د مُلک په قلعو باندې، او ووايئ: ”د سامريه په غرونو باندې راټول شئ او په هغې کښې لوئ شور ماشور وګورئ، او د هغې په مينځ کښې ظلم.“ 10هغوئ نۀ پوهيږى چې څنګه سم کار وکړى، زمونږ پلار فرمائى — هغه کسان چې په خپلو قلعو کښې ظلم او لوټ ذخيره کوى.
11نو قادر مطلق پلار داسې فرمائى: يو دښمن به دا مُلک راګېر کړى، ستاسو دفاعى ديوالونه به راوغورځوى، او ستاسو قلعې به لوټ کړى.
12زمونږ پلار داسې فرمائى: لکه څنګه چې شپون د زمرى د خولې نه دوه پښې يا د غوږ يوه ټوټه بچ کوى، هم هغه شان به د اِسرائيلو هغه بچى چې په سامريه کښې اوسيږى بچ شى — د کټ د يوې ګوټې او د بسترې د يوې برخې سره. 13واورئ، او د يعقوب د کور په خلاف ګواهى ورکړئ، قادر مطلق پلار، د آسمانى لښکرو پلار، فرمائى: 14په هغه ورځ چې زۀ اِسرائيل ته د هغۀ د سرکشيو سزا ورکوم، زۀ به د بيتايل قربانګاهونو ته هم سزا ورکوم؛ د قربانګاه ښکرونه به پرې کړے شى او په زمکه به راولوېږى. 15زۀ به د ژمى کور ووهم د اوړى د کور سره؛ د هاتي د غاښ کورونه به تباه شى، او لوى لوى کورونه به ختم شى، زمونږ پلار فرمائى.
