Ubanmu Ya Kira Isra'ila Ga Lissafi

Zaɓe yana nufin ɗaukar alhaki, ba keɓewa ba. Jerin tambayoyi ya nuna cewa kowane abu yana da sanadi: zaki yana ruri domin ya sami abin farauta, Uba Maɗaukaki kuma ba ya yin kome ba tare da ya faɗa wa annabawansa ba — saboda haka gidajen hauren giwa na Samariya za su rushe.

Babi na 3.

Ku ji maganan nan da Ubanmu ya furta a kanku, ya ku 'ya'yan Isra'ila—a kan dukan iyalin da na fito da su daga Masar:

Daga cikin dukan iyalan duniya, ku kaɗai na sani; saboda haka zan nemi lissafinku saboda dukan zunubanku.

Mutane biyu za su yi tafiya tare, in ba su yarda su haɗu ba? Zaki yakan yi ruri a kurmi sa'ad da ba shi da abin farauta? Ɗan zaki yakan yi gurnani daga kogonsa in bai kama kome ba? Tsuntsu yakan fāɗa tarko a ƙasa sa'ad da ba a kafa masa koto ba? Tarko yakan tashi daga ƙasa sa'ad da bai kama kome ba? In aka busa ƙahon rago a cikin birni, mutane ba za su firgita ba? In masifa ta auko wa birni, ba Ubanmu ne ya aikata ta ba? Lalle, Uba Maɗaukaki ba ya yin kome sai ya bayyana sirrinsa ga bayinsa annabawa. Zaki ya yi ruri—wa ba zai ji tsoro ba? Uba Maɗaukaki ya yi magana—wa zai iya ƙin yin annabci?

Ku yi shela a kan kagarun Ashdod da kuma a kan kagarun ƙasar Masar, ku kuma ce, “Ku taru a kan duwatsun Samariya, ku ga babbar hayaniyar da ke cikinta, da danniyar da ke tsakiyarta.” Ba su san yadda za su aikata gaskiya ba, in ji Ubanmu—su da suke tara ta'adi da ganima a cikin kagarunsu.

Saboda haka, ga abin da Uba Maɗaukaki yake cewa, wani magabci zai kewaye ƙasar, yă rushe katangarku, yă kuma washe kagarunku.

Ga abin da Ubanmu yake cewa, kamar yadda makiyayi yake ceto ƙafafu biyu ko ɗan yanki na kunne daga bakin zaki, haka za a ceci 'ya'yan Isra'ila da suke zaune a Samariya—tare da gefen kujera, da wani ɓangaren gado. Ku saurara, ku kuma shaida a kan gidan Yakubu, in ji Uba Maɗaukaki, Uban rundunonin Sama: A ranar da zan hukunta Isra'ila saboda tawayensa, zan kuma hukunta bagadan Betel; za a yanke ƙahonin bagadin su kuma fāɗi ƙasa. Zan buge gidan hunturu tare da gidan rani; gidajen hauren giwa za su hallaka, manyan gidaje kuma za su ƙare, in ji Ubanmu.