Ithumwui Avāna Israelli athut khuimi
Kapangkhui kahai kaji chi khuimang kahai maningla, ngasothui chi phungkhui kajina. Tuingahāng kaikhana kashok kachi kakhaa khalei da chitheia: phuimaona sāmsha lei eina ngaona, kala Proho Avāna awui marānbingli maphongmila khikha masāmana — chiwui vang Samariawui shim kaikha khāngmathotra.
3 1O Israelwui mibing, Egyptwui eina ina khuivai kahai shimkhur katonga, ithumwui Avāna nathumli makhamayā hānghaikasā tui hi nganālu:
2Okathuili khalei shimkhur saikorawui ngachaili, nathummāngli ina theihaira; chiwui vang eina nathumwui morei saikorawui vang ina nathumli athut khuira.
3Athum samphang khavai mayāngarok maningakha, mi khani ngarumda zatpaila? 4Awui sāshai maleila tharan, kazingkha̱na ngahongli khangangpaila? Khikha maphā tharan, kazingkha̱naona awui khurpamwui eina vaopaila? 5Ngaleili chiwui vang khalen mahaila tharan, vānaona khalenli pipaila? Khikha maphā tharan, khalenna ngaleiwui eina okshokpaila? 6Keinung akhali talla̱ khongakha, mibingna mangacheenāmala? Keinung akhali kalākashi shokakha, ithumwui Avāna masāhaimala? 7Kachangkhata, Proho Avāna awui rao marānbingli awui khangathum maphongmila khikha masāmana. 8Kazingkha̱na khanganghaira; khipāna mangacheenāra̱khala? Proho Avāna hānghaira; khipāna marān masāla leirakhala?
9Ashdodwui raipanbingtungli, kala Egypt ngaleili khalei raipanbingtungli vaosanglu, kala hānglu: "Samariawui kaphungbingli rākaziplu, kala chiwui alungli khonkazār kahakva chi, kala chiwui ngachaili rekakharek chi yanglu." 10Athumwui raipanlungli khangama̱ kala ngaponkakhui ot kazipkhuibing chi, khamashung khangarong ot sākhavai matheimana, da ithumwui Avāna hānga.
11Chiwui vang eina Proho Avāna hithāda hānga: Yangkashe akhana ngalei chi kuinamra, nawui faror sātekmira, kala nawui raipanbing ngaponra.
12Ithumwui Avāna hithāda hānga: Yaokahoma akhana kazingkha̱wui akhamor eina aphei khani lah khanā akhawui mikahai kanshokmi thāda, chithāda Samariali kapamabing Israelwui mibing chi pamkhong akhawui achikun eina, pet akhawui mikahai eina kanshok ngasakra. 13Nganālu, kala Jacobwui shimkhurli makhamayā shākhi sālu, da Proho Avāna, saikorawui Avāna hānga: 14Israelli awui khayonkhamāngwui vang ina tandi mi zimiksholi, Bethelwui hanphutbingla ina tandi mira; hanphutwui angajibing katathaira, kala ngaleili pitāra. 15Ina lumkachāng shim eina ngasoda sikachāng shim chi shaora; mafahāwui shimbing shimānra, kala kahakva shimbing katang vaira, da ithumwui Avāna hānga.
