Amosi 3

3 ¹Sikieni neno hili Baba yetu alilolinena juu yenu, enyi wana wa Israeli—juu ya jamaa yote niliyoipandisha kutoka nchi ya Misri:

²Katika jamaa zote za dunia, nimewajua ninyi peke yenu; kwa hiyo nitawapatiliza kwa ajili ya dhambi zenu zote.

³Je, watu wawili waweza kutembea pamoja, wasipokuwa wamepatana? ⁴Je, simba hunguruma mwituni asipokuwa na mawindo? Je, mwana-simba hulia ngurumo pangoni mwake kama hajakamata kitu? ⁵Je, ndege huanguka katika mtego juu ya nchi kama hakuna tanzi kwa ajili yake? Je, mtego huruka juu kutoka ardhini bila kukamata kitu? ⁶Kama tarumbeta ikipigwa mjini, je, watu hawatatetemeka? Kama msiba ukija mjini, je, si Baba yetu aliyeutenda? ⁷Hakika Baba Mwenye Enzi hafanyi neno lolote bila kuwafunulia siri yake watumishi wake manabii. ⁸Simba amenguruma—nani asiyeogopa? Baba Mwenye Enzi amenena—nani awezaye kujizuia asitoe unabii?

⁹Tangazeni juu ya ngome za Ashdodi, na juu ya ngome za nchi ya Misri, mkisema: "Kusanyikeni juu ya milima ya Samaria, mkatazame ghasia kubwa iliyomo ndani yake, na uonevu ulio kati yake." ¹⁰Hawajui kutenda yaliyo haki, asema Baba yetu—hao wajikusanyiao udhalimu na uporaji katika ngome zao.

¹¹Kwa hiyo Baba Mwenye Enzi asema hivi: Adui atakizunguka nchi, atazibomoa ngome zenu, na kuiteka nyara ngome zenu.

¹²Baba yetu asema hivi: Kama vile mchungaji aokoavyo miguu miwili au kipande cha sikio kutoka kinywani mwa simba, ndivyo watakavyookolewa wana wa Israeli waketio Samaria—pamoja na pembe ya kitanda, na kipande cha godoro. ¹³Sikieni, mkashuhudie juu ya nyumba ya Yakobo, asema Baba Mwenye Enzi, Baba wa majeshi ya mbinguni: ¹⁴Siku nitakayomwadhibu Israeli kwa ajili ya maasi yake, nitaziadhibu pia madhabahu za Betheli; nazo pembe za madhabahu zitakatwa na kuanguka chini. ¹⁵Nitaipiga nyumba ya wakati wa baridi pamoja na nyumba ya wakati wa hari; nazo nyumba za pembe za ndovu zitaangamia, na nyumba kubwa zitakoma, asema Baba yetu.