Mi eng' bukuit
Bukuit

Teebei Kwandanyo Israel

Lewenet komanda keteebe agobo tengegutik, ma kityachet. Chaang' teebutik che boorchin kole mi kiit ne iibu kirwoget age tugul: poriseni ng'etundo amu mi logennyi, ak ma yai Kwanda ne Kiptaiyat kiy age tugul ngot ma kagoboorchi maotikyik—si kobut korik che karaaran che po Samaria.

Ng'alaali Kwandanyo eng' mustarisyek 2, 9–15

Sura 3.

Ogas ng'olyoondoni ne ki mwa Kwandanyo agaigai okweek, weeriigap Israel—agaigai koot komugul ne ki aibu eng' emetap Misiri:

Eng' ortinwek tugul che po ng'wony, kaangen okweek kityo; nooto anyun ateebwok agobo tengekwogikwok tugul.

Pendi piik aeng' togeennyi, ngot ma kagochamgei komeet? Poriseni ng'etundo timiin ye momi logennyi? Riirei neraneetap ng'etundo eng' keriingonnyi ye ma kanam kiy? But toriit mesteet eng' ng'wony ye momi kanamonik ne king'etyin? Ng'eetyo mesteet eng' ng'wony ye ma kanam kiy? Ngo kiguut iryageet eng' nganaseet, tos ma potanso piik? Ngo nyoonji yaityet nganaseet, tos ma kaayai Kwandanyo? Iman kole ma yai Kwanda ne Kiptaiyat kiy age tugul, ngot ma kagoboorchi otwogikyik maotik kabwaatutikyik che unyegei. Kaporisei ng'etundo—ng'oo ne ma iywei? Kang'alaal Kwanda ne Kiptaiyat—ng'oo ne muuchi koma maoteni?

Omwaite eng' irimoigap Ashdod ak eng' irimoik che mi emetap Misiri, ak omwaite: “Oyumgei eng' tuloonoogap Samaria ak ogeer polateet ne oo ne mi kwenunnyi, ak sastaet ne mi kwenunnyi.” Ma ngen koyai imanda, mwaei Kwandanyo—icheek che yumei koroomnateet ak tuguuk che kinyaban eng' irimoikwak.

Mwaei anyun Kwanda ne Kiptaiyat: Yiemei punyondet emet, koibut teeksyeguk, ak konyaban irimoikwok.

Mwaei Kwandanyo: Ko uu ye tyach mestowot keelyek aeng' anan tabandap itit eng' kutitap ng'etundo, ko uu nooto kisaru weeriigap Israel che menyei Samaria, kobooto tabandap itoogut, ak kebebertap osotyot. Ogas, ak obaoryanjo agaigai kootap Jakobo, mwaei Kwanda ne Kiptaiyat, Kwanda ne po lugosyegap kipsengwet: Eng' peetuut ne ateebee Israel agobo pistoennyi, ayachi agine kaptisisyosyegap Bethel; kitilak kuinoigap kaptisisyet ak kobut ng'wony. Abar koot ne po kaititindo kobooto koot ne po kemeut; kobet kooik che po kelegap peeleek, ak kogeskei kooik che eechen, mwaei Kwandanyo.