አሞጽ 2

2 ¹አባታችን እንዲህ ይላል፤ ስለ ሞዓብ ሦስት ኀጢአት፣ አዎ ስለ አራቱ ፍርዴን አልመልስም፤ የኤዶምን ንጉሥ ዐጥንቶች አቃጥሎ ኖራ አድርጎአልና። ²ስለዚህ በሞዓብ ላይ እሳት እሰዳለሁ፤ የቄርዮትንም ምሽጎች ይበላል፤ ሞዓብ በጩኸትና በመለከት ድምፅ፣ በሁከት መካከል ይሞታል። ³ገዥውን ከመካከልዋ አጠፋለሁ፤ መኳንንቶቿንም ሁሉ ከእርሱ ጋር እገድላለሁ፤ ይላል አባታችን።

⁴አባታችን እንዲህ ይላል፤ ስለ ይሁዳ ሦስት ኀጢአት፣ አዎ ስለ አራቱ ፍርዴን አልመልስም፤ የአባታችንን ሕግ ናቁ፤ ሥርዐቱንም አልጠበቁም፤ አባቶቻቸው የተከተሉት ያው ውሸት አሳታቸው። ⁵ስለዚህ በይሁዳ ላይ እሳት እሰዳለሁ፤ የኢየሩሳሌምንም ምሽጎች ይበላል።

የአባታችን ፍርድ በእስራኤል ላይ

⁶አባታችን እንዲህ ይላል፤ ስለ እስራኤል ሦስት ኀጢአት፣ አዎ ስለ አራቱ ፍርዴን አልመልስም፤ ጻድቁን በብር፣ ችግረኛውንም በአንድ ጥንድ ጫማ ይሸጣሉና። ⁷የድኾችን ራስ በምድር ትቢያ ላይ ይረግጣሉ፤ የተገፉትንም ከመንገድ ያርቃሉ። ሰውዬውና አባቱ ወደ አንዲት ብላቴና ይገባሉ፤ ቅዱስ ስሜንም ያረክሳሉ። ⁸በመያዣ በተወሰደ ልብስ ላይ በየመሠዊያው አጠገብ ይተኛሉ፤ የተቀጡትንም ሰዎች ወይን ጠጅ በአምላካቸው ቤት ይጠጣሉ። ⁹ነገር ግን እንደ ዝግባ ረዥም፣ እንደ ዋርካም ብርቱ የነበረውን አሞራዊ ከፊታቸው ያጠፋሁት እኔ ነኝ፤ ከላይ ፍሬውን፣ ከታችም ሥሩን አጠፋሁ። ¹⁰ከግብፅ ምድር ያወጣኋችሁ፣ የአሞራዊውንም ምድር ትወርሱ ዘንድ አርባ ዓመት በምድረ በዳ የመራኋችሁ እኔ ነኝ። ¹¹ከወንዶች ልጆቻችሁ አንዳንዶቹን ነቢያት አድርጌ፣ ከጎበዛዝቶቻችሁም አንዳንዶቹን ናዝራውያን አድርጌ አስነሣሁ። የእስራኤል ልጆች ሆይ፤ ይህ እንዲህ አይደለምን? ይላል አባታችን። ^a a v11 ናዝራውያን ለእግዚአብሔር የተለየ የመወሰን ስእለት ተስለው ከወይን ጠጅ የሚከለከሉና ጠጕራቸውን የማይላጩ እስራኤላውያን ነበሩ (ዘኍልቍ 6ን ተመልከት)። ¹²እናንተ ግን ናዝራውያኑን ወይን ጠጅ አጠጣችኋቸው፤ ነቢያቱንም፣ “ትንቢት አትናገሩ” ብላችሁ አዘዛችኋቸው። ¹³እነሆ፤ ነዶ የሞላበት ጋሪ ከበታቹ ያለውን ምድር እንደሚጭን፣ በስፍራችሁ እጫናችኋለሁ። ¹⁴ፈጣኑ እንኳ ማምለጫ አያገኝም፤ ብርቱውም ኀይሉን አያጸናም፤ ጦረኛውም ነፍሱን አያድንም። ¹⁵ቀስተኛው አይቆምም፤ እግረ ፈጣኑም አያመልጥም፤ ፈረሰኛውም ነፍሱን አያድንም። ¹⁶ከጦረኞችም ሁሉ ይበልጥ ደፋሩ በዚያ ቀን ዕራቁቱን ይሸሻል፤ ይላል አባታችን።