Moabi yi Yuta, Batedwa ku Nzu
Pfundusu zitukini ku Moabi yi ku Yuta tii yi kuna Kiseledi kibeni, amana mfundu yenina yina ya kyedika: kutekisa batu ba masonga mu fwalanga yi batsukami mu tsabatu, kudyatikisa batu ba phasi, yi kukandika bambikudi. Tata wetu wátanga mana wábaheka, amana wázimbula ni kabazanga.
Tata wetu kisi zonza mu mavese 1–16
2 1Mama menina mana kazimbudini Tata wetu: Kikuma kya masumu matatu ma Moabi, amana kikuma kya mana maya, yisivutula ndinga yama ku, mukuma wáyoka mifufwa mya kinga dya Edomi nate mikituka phemba. 2Buna yikahítika mbawu mu Moabi, amana yakavúkula mbanza za ngolu za Keliyoti; Moabi kafwa ha kati dya mvwalangani, ni kukalunga yi ndinga ya kindanda. 3Yikazénga pfumu ha kati dyandi amana yikahónda bazusi bandi boosu kumosi yi yandi, kazimbudini Tata wetu.
4Mama menina mana kazimbudini Tata wetu: Kikuma kya masumu matatu ma Yuta, amana kikuma kya mana maya, yisivutula ndinga yama ku, mukuma bálosa milongi mya Tata wetu amana bazitisaku mitsiku myandi, amana mahuna ma bawu mábatotisa, mahuna mana bakhaka ba bawu bálanda. 5Buna yikahítika mbawu mu Yuta, amana yakavúkula mbanza za ngolu za Yelusalemi.
Pfundusu ya Tata wetu ha thandu ya Kiseledi
6Mama menina mana kazimbudini Tata wetu: Kikuma kya masumu matatu ma Kiseledi, amana kikuma kya mana maya, yisivutula ndinga yama ku, mukuma bisi tekisa batu ba masonga mu fwalanga, amana batsukami mu tsabatu boodi. 7Bisi dyatikisa mitwa mya batsukami muna fusyangeni dya mafu amana bisi phusana batu ba phasi mu nzila ya bawu. Mutu yi tata wandi bisi kwenda kwena mwana mosi wa mukhetu, mu kusumuna khumbu yama yatoma. 8Bisi yala bela-bela yi mesa ma kimenga moosu ha miledi mina bábonga kikuma kya mfuka, amana muna nzu ya Nzambi wa bawu bisi nwa vinu dya batu bana bábafutisa. 9Kaasi meni yandi yábukulula muisi Amoli ku thwala ya bawu, yandi wákala wunda nana miti mya sedeli amana ngolu nana miti mya ngolu; yábukulula mbutu myandi ku zulu amana misodi myandi ku tsi. 10Amana meni yandi yálubula benu mu tsi ya Ngiphiti amana yálunatisa mvula makumaya muna nganga, ndangu lwazyamina tsi ya muisi Amoli. 11Yávumbula bana benu bahika bakala bambikudi, amana bangunza benu bahika bakala baNaziiti. Keti bwabu ku, benu batu ba Kiseledi? Kazimbudini Tata wetu. a a v11 BaNaziiti bakala batu ba Kiseledi bana básidika lusilu lwa phila yikwawu lwa kudiyekula kwena Nzambi, mu kubula kunwa vinu yi kuzenga nsuki za bawu (tala Mitangu 6). 12Kaasi benu lwánwisa baNaziiti vinu, amana lwáheka muswa kwena bambikudi, mu kuzimbula: «Lubikulaku.» 13Talenu, yikalúfukumuna mu homa henu, nana kipusu kyazala mavundu ma bule kisi fukumuna mafu mena ha tsi kyandi. 14Ata wuna wena tyakula kalendaku mona nzila ya kutina, amana wuna wena ngolu kalendaku simbidila ngolu zandi, amana kingolu-ngolu kalendaku hulula moya wandi. 15Mutu wa mbasa kalendaku telama ngolu, wuna wena malu ma lubilu kalendaku tina, amana wuna wena zaka mphunda kalendaku hulula moya wandi. 16Ata wuna wena kikesa kuluta mu bangolu-ngolu boosu katína kikhonga muna kilumbu meni kina, kazimbudini Tata wetu.
