Kathara Lam Phaishoki Kaji
Ngalei chili mapamranglakha ngayarsera: ithumwui Avāwui kathara shim eina pāngmonbingwui vang kathara ngalei kha̱shing akha, Levinaobingwui vang kha̱shing akha, keinungwui vang ngalei, kala kakhalei chi wungnaowui vang; wungnaoli mibing apam eina kashamshok ngasāmlu, khamashung khāntam singlu da hānga. Chiwui thili phanitwui kachigatbing ngasoktai.
45 1"Nathumna ngalei chi shimluiwui vang kalā yangda ngayar tharan, ithumwui Avāwui vang asān mile chishat kala aret mile kathum kasang ngalei chiwui kathara lam akha phaishok sāra. Chiya chiwui thari saikorawui alungli kathara leira. 2Chiwui eina ashong ava̱va̱li feet shāchishat hangshinida phangā kasang ngaphor akha katharapamwui vang sāra; kala chiwui kuimareida feet hangchiko kasang kayāng khamashā leira. 3Hi apam chiwui eina asān mile chishat kala aret mile kathum tamlu; chiwui alungli katharapam, tharmathengmeikap kaje pam leira. 4Chiya ngalei chiwui kathara lamna. Chiya katharapamli otram ngatha̱ching, ili nganailaka otram ngatha̱ khavai rāki kaji pāngmonbingwui ngasāra; athumna shim sāki khavai apam kala katharapamwui vang kathara pam akha samphangra. 5Asān mile chishat kala aret mile kathum apam akha chiya pamkhavai keinungbing ngasoda khorumshimli otram ngatha̱ Levinaobingwui shimlui sāda ngasāra.
6"Keinungwui shimluiwui vang, kathara lam chiwuili ngasunkhuilaga, aret mile akha tangkhai kala asān mile chishat lam akha nathumna phaishok sāra; chiya Israel shimkhur saikorawui ngasāra.
7"Wungnaona kathara lam kala keinungwui shimluili ngasunkhuilaga, zingtunshong zingtunvāk kala zingshoshong zingshovāk, chiwui lākha khanini eina lam samphangra; awui asān chi shang yar akhawui asān eina ngaraichāda, zingtun thariwui eina zingsho thari vāpeida leira. 8Hi ngalei chiya Israelli awui shimlui sāra. Iwui wungnaobingna iwui mibingli marekharekluimara; kha athumna athumwui shang athishurda Israel shimkhurli ngalei chi mira.'
9Proho Avāna hithāda hānga: Shaphaira, O Israelwui wungnaobing! Khangama̱ kala rekakharek chi thahaimilu; mashun kala khamashung khangarong sālu. Iwui mibingli athumwui ngalei chiwui eina khuilui sākahai chi thahaimilu, da Proho Avāna hānga.
10"Nathumna khamashung onkhavai khānbing, khamashung khuilui kala khamashung lengkhor haiphalungra. 11Khuilui chi quart maga̱da khani kala lengkhor chi quart maga̱da khani: lukyur akhana; lengkhor chiya quart shākhani maga̱wui tharā ngayar akhana, khuilui chiya quart shākhani maga̱wui tharā ngayar akhana; quart shākhani maga̱ chi athishur leira. a a v11 Bath chiya gallon tharuk (liter maga̱da khani) shakha lengkhor akhana; ephah chiya khuiluiwui vang chiwui ngaraichā sāhaina. 12Khān athishur akhana khān kateo maga̱ eina ngaraichāra. Hibingwui maga̱, maga̱da phangā, kala tharāda phangā chi ngarumlaga nathumwui khān kahakva̱ leira.
13"Nathumna chigatki kaji chigat chi hina: kehu lukyur kahak akhawui eina khuiluiwui tharuk ngayar akha, kala yaoyi lukyur kahak akhawui eina khuiluiwui tharuk ngayar akha. 14Thao chigatwui vang lengkhor eina tamra: lukyur kahak akhawui vang lengkhorwui tharā ngayar akha mira; lengkhor tharāna lukyur kahak akha sāra.' 15Kala Israelwui tara̱ chuikahai seizātpambingwui yao ashangva̱ shākhani ava̱va̱wui eina yaonao akha mira; tharāzāt kachigat, rikkatā kachigat kala pha̱kaphayā sāda athumwui vang pheomi khavaina, da Proho Avāna hānga. 16'Ngalei chiwui mibing saikorana Israelli khalei wungnaowui vang hi kachigat chili ngasozangra. 17Israel shimkhurwui langchin atam saikora, phanitbing, changwokthang kala sabbathli wungnaona rikkatā kachigat, tharāzāt kachigat kala ra̱shakchigat chi mira. Israel shimkhurwui vang pheomi khavai ana suihamchigat, tharāzāt kachigat, rikkatā kachigat kala ningyatchigat ngarānra.'
18Proho Avāna hithāda hānga: "Khare kachāngli kharethangli achuk kapei mukvānao akha khuilaga kathara shim chi sāmathāra. 19'Pāngmonna suihamchigatwui ashee kateokha khuilaga, khorumshimwui khāmongpheili, hanphutwui achikun mati chili, kala alungkayāngwui khāmongwui pākra̱li neomira. 20Kachāng kashinethang, kachikathāna matheimada lah matheila morei sāhaiakhawui vang chithāda sāra. Chithāda khorumshimwui vang pheomira.
21"Kachāng kharewui tharāda khamatethang makānkhami phanit mayonlu; chi shinithangwui phanitna, kala chili khawok makazang khamui shaira. 22Chithang wungnaona akhalattawui vang kala ngalei chiwui mibing saikorawui vang suihamchigatwui mukvā akha chigatra. 23Phanitwui shinithang peida ana thangkachida achuk kapei mukvā shini kala yaovā shini ili rikkatā kachigat sāda chigatra; kala thangkachida suihamchigatwui vang mevā akha chigatra. 24Tharāzāt kachigat sākhavai ana mukvā akhawui vang khuilui akha, kala yaovā akhawui vang khuilui akha mira; kala khuilui akhawui vang thao lengkhor akha mira. 25Kachāng kashinewui tharāda kaphangāthang phanitli ana shinithang suihamchigat, rikkatā kachigat, tharāzāt kachigat kala thao saikora chithā thāda sāra."'
