Hebrews 10 FHB Father's Heart Bible™

10 ¹Niyom tu to ahhibole thaka bhal jinis khan laga chaya he ase, hei jinis khan laga asol roop nohoi; aru eitu karne, saal pichete saal bina khotom hoi kene diya eke bolidan khan pora, usor te aha manuh khan ke kitia bhi siddho koribo napare. ²Nahole, aradhana kora khan ekbar sapha hoi kene paap laga hosh aru nathaka hoile, hei bolidan khan diya kaam bondh nohobo thakise na? ³Kintu hei bolidan khan te saal-saal te paap laga yaad kori diya ase. ⁴Kilemane saand aru chagoli khan laga khoon pora paap khan ke hatai dibo napare.

⁵Eitu karne, Khrista prithibi te aha homoi te, Tar pora koise, “Bolidan aru daan Apuni itcha kora nai, kintu Apuni moi nimite ekta gau taiyar kori dise; ^a a v5 Bhajan 40 pora aha eitu kotha khan Jisu prithibi te aha homoi te Tar mukh te rakha ase — Putro pora amar Pitri laga itcha kori bole taiyar kora gau te somai ahhise.

⁶“poora kori diya bolidan aru paap laga bolidan khan te Apuni khushi kora nai. ⁷Tetiya Moi koise, ‘Sabi, Moi ahhise—kitab laga lipi te moi laga bishte likha ase—Apuni laga itcha kori bole, moi laga Pitri.’” ^b b v7 Jisu pora Tar laga prithibi te aha bujhai bole Bhajan 40 kobole homoi te, Tar pora Pitri ke mati ase — eitu khan Putro laga nijor kotha, Tar ke pathai diya ekjon ke ase.

⁸Upor te Tar pora koise, “Bolidan, daan, poora kori diya bolidan, aru paap laga bolidan khan Apuni itcha kora nai aru khushi pa-a nai”—niyom pora eitu khan mange hoilebi, ⁹tetiya Tar pora koise, “Sabi, Moi Apuni laga itcha kori bole ahhise.” Tar pora poila tu hatai kene dusra tu thik kori dise.

¹⁰Eitu itcha pora, Jisu Khrista laga gau ekbar te sob nimite diya pora, amikhan ke pobitro kori dise.

¹¹Sob purohit din-din khara hoi kene sewa kori ase, aru kitia bhi paap khan ke hatai dibo napara eke bolidan khan bar-bar di ase. ¹²Kintu Tar pora paap khan nimite ekta bolidan hodai nimite di kene, tetiya amar Pitri laga dyna hath te bohi jaise, ¹³hei homoi pora Tar laga dushman khan Tar theng laga niche laga jaga nabona tak rukhi ase. ¹⁴Kilemane ekta bolidan pora Tar pora pobitro kori thaka khan ke hodai nimite siddho kori dise. ¹⁵Aru Pobitro Atma bhi amikhan ke gawahi di ase; kilemane eneka koi kene,

¹⁶“Eitu hei vachan ase junto hei din khan pichete Moi tarkhan logot te bonabo, amar Pitri koi ase: Moi laga niyom khan tarkhan laga mon te rakhibo, aru tarkhan laga dimaag te likhibo.”

¹⁷Tetiya Tar pora aru koise, “Aru tarkhan laga paap khan aru tarkhan laga niyom-bhanga kaam khan Moi aru kitia bhi yaad nakoribo.”

¹⁸Etiya, jun jagate eitu khan maph kori dise, ta te paap nimite aru eku bolidan nai.

Ghor te Ahhibole Bharosa

¹⁹Eitu karne, bhai aru bhoini khan, Jisu laga khoon pora pobitro jaga khan te somabole amikhan logot te bharosa thaka karne, ²⁰Tar pora amikhan nimite porda, mane Tar laga gau-mangso, phale hoi kene ekta notun aru jinda rasta khuli dise, ^c c v20 Porda tu Mondir laga sob pora pobitro kamra ke bondh kori rakhise; Jisu laga gau-mangso tu notun porda ase, phati kene khula hoise, titia amikhan sidha bhitor te somabo pare. ²¹aru amar Pitri laga ghor uporte ekjon dangor purohit amikhan logot te thaka karne, ²²amikhan ekta hosa mon loi kene, biswas pora pura niscinto hoi kene, dosh thaka bhabona pora mon khan ke chitikai sapha kori kene, aru sapha pani pora gau khan dhui kene, usor te ahibo. ²³Amikhan prakash kora asha ke jor pora, nahili kene dhori thakibo, kilemane vachan diya ekjon biswasi ase. ²⁴Aru amikhan ekjon-ekjon ke morom aru bhal kaam khan nimite kineka uksani dibo, eitu bhabona koribo, ²⁵kunba manuh khan kora nisena eke logote joma hua na-chari kene, kintu ekjon-ekjon ke himmot di kene—tumikhan hei Din usor te aha dikha homoi te aru bisi kori kene.

²⁶Kilemane hosa laga gyaan pa-a pichete amikhan jani kene paap kori thakise koile, paap khan nimite aru eku bolidan nathake, ²⁷kintu khali bisar laga ekta bhoyonkor rukha, aru dushman khan ke pura khai dibo thaka dangor jui he thake. ²⁸Kun manuh Musa laga niyom ke chari diye, hei manuh duijon nahoile tinjon gawahi diya khan laga kotha te, eku doya nathaki kene mori jai. ²⁹Kun manuh amar Pitri laga Putro ke theng laga niche chepi dise, aru tar ke pobitro kora vachan laga khoon ke napobitro jinis nisena korise, aru anugrah laga Atma ke beijjati korise—hei manuh kiman bisi biya saja pabole thik ase, tumikhan ki bhabe?

³⁰Kilemane kun pora koise, “Nyay Moi laga ase; Moi badla lobo,” aru arubi, “Amar Pitri pora Tar laga manuh khan ke bisar koribo,” hei ekjon ke amikhan jane.

³¹Jinda Pitri laga hath te giri jua tu ekta bhoyonkor jinis ase. ^d d v31 Amar Pitri tu jinda Isor ase, kun laga hath te jor morom aru napalai paribo bisar duita bhi ase — Tar Putro ke chari kene aru Tar Atma ke rag uthai diya pichete hei hath te giri jua to hosa bhi bhoi laga kaam ase.

³²Age laga din khan ke yaad koribi, jitia tumikhan ujala paa pichete dukh logote ekta kathin lorai sojai loise, ³³kitia kitia manuh khan laga usorte beijjati aru dukh pora sorom khaise, kitia kitia eneka kora khan logote khara hoise. ³⁴Kilemane tumikhan bondhi ghor te thaka khan logote dukh paise, aru tumikhan nijor logote ekta aru bhal, hodai thaka dhun ase koi kene jani kene, tumikhan laga saman khan chini loa tu khushi pora mani loise. ³⁵Eitu karne tumikhan laga bharosa ke phelai nadibi; eitu te ekta dangor inam ase. ³⁶Tumikhan ke sojai thaka dorkar ase, titia amar Pitri laga itcha kori kene, tumikhan vachan tu pabo.

³⁷Kilemane aru “olop homoi pichete, aha ekjon ahibo aru deri nakoribo; ³⁸kintu Moi laga dharmik manuh biswas pora jinda thakibo, aru jodi tai pichete hati jai koile, Moi laga pran tar uporte khushi napai.”

³⁹Kintu amikhan pichete hati kene khotom hoi jua khan laga nohoi, kintu biswas kori kene nijor pran bachai thaka khan laga ase.