Agbiagkayo kas Annak ti Lawag

Tuladem ni Amatayo a kas panangtulad dagiti ubbing iti nagannak, ket agparang ti ayat a kas ken Cristo nga intedna ti bagina. Pagdudumaen ni Pablo ti sipnget ken lawag, ti panagbartek ken ti Espiritu, kalpasan ipakatna ti agsinnarunuan a panagpasakup iti panagasawa — ket ibagana kadagiti lalaki nga ayatenda ti assawada a kas iti panagayat ni Cristo iti iglesia.

Kapitulo 5.

Gapuna, tulladenyo ni Amatayo, kas ay-ayaten nga annak. Magnakayo iti ayat, kas iti panangayat kadatayo ni Cristo ket intedna ti bagina para kadatayo, maysa a nabanglo nga daton ken sakripisio para ken ni Amatayo.

Ti pannakikamalala, amin a kinarugit, wenno kinaagum, saan koma a maibaga uray pay iti nagbaetanyo, kas maitutop kadagiti sasantos. Awan ti disso kadakayo iti kinarugit, kinamaag a sao, ken narugit a pagbabaetan—ngem ketdi agyamankayo. Ammuenyo daytoy: awan ti tao a nakikamalala, narugit, wenno naagum—maysa nga agdidiosdios—nga addaan iti tawid iti pagarian ni Cristo ken ni Amatayo.

Awan koma ti mangallilaw kadakayo babaen kadagiti awan serserbina a sasao - gapu kadagitoy a banbanag umay ti pungtot ni Amatayo kadagiti saan nga agtulnog. Gapuna, diyo agbalin a kakaduada;

ta idi un-unana, sipnetkayo, ngem ita lawagkayo iti Apo—agbiagkayo kas annak ti lawag. (ta ti bunga ti lawag masarakan iti amin a naimbag ken nalinteg ken pudno), ket ikagumaanyo nga ammuen no ania ti makaay-ayo iti Apo. Diyo makipaset kadagiti awan bungana nga aramid ti sipnget, no di ket ibutaktakyo dagitoy. Ta makababain uray ti agsao maipapan kadagiti banag nga aramidenda a sililimed. Ngem inton maibutaktak ti aniaman babaen ti lawag, agbalin a makita, ta ti aniaman nga agbalin a makita ket lawag. Isu a kunana, “Mariingka, sika a matmaturog, ket bumangonka manipud kadagiti natay, ket sumilnagto kenka ni Cristo.” ^a

Kitaenyo a naimbag ngarud no kasano ti pannagnayo, saan a kas awan sirib no di ket kas manakasirib, usarenyo a naimbag ti tiempo, gapu ta dakes dagiti aldaw. Gapuna, diyo agbalin a maag, no di ket maawatanyo no ania ti pagayatan ti Apo. Diyo agbartek iti arak—daytoy ket nadangkok a panagbiag—no di ket mapnekkayo iti Espiritu Santo. Agsasaokayo iti maysa ken maysa babaen kadagiti salmo ken himno ken naespirituan a kanta, agkankantakayo ken agpadpadayawkayo iti Apo iti pusoyo, agyamankayo kankanayon ken gapu iti amin a banag ken ni Amatayo iti nagan ni Apotayo a Jesu-Cristo, agpasakupkayo iti maysa ken maysa gapu iti panagraem ken ni Cristo.

Agayatkayo kas iti Panangayat ni Cristo

Dakayo nga assawa a babai, agpasakupkayo kadagiti bukodyo nga assawa a kas iti Apo. Ta ti lalaki ti ulo ti assawana a babai, kas met ni Cristo ti ulo ti iglesia, ti bagina, ket isu met ti Mangisalakan kenkuana. Ita, kas iti panagpasakup ti iglesia ken ni Cristo, kasta met koma ti panagpasakup dagiti assawa a babai iti amin a banag kadagiti assawada.

Dakayo nga assawa a lalaki, ayatenyo dagiti assawayo, kas iti panangayat ni Cristo iti iglesia ket intedna ti bagina para kenkuana, tapno pagbalinenna a nasantuan, a dalusanna iti danum babaen ti sao, tapno mabalinna nga iparang ti iglesia kenkuana a nadayag—awan ti tulnek, kulubot, wenno aniaman a kasta—no di ket nasantuan ken awan biddutna. Kasta met koma nga ayaten dagiti lalaki dagiti assawada a kas kadagiti bukodda a bagi. Ti mangay-ayat iti assawana ket ay-ayatenna ti bagina. Awan pay ti nanggura iti bukodna a bagi—pakanenna ken aywananna daytoy, kas ar-aramid ni Cristo iti iglesia, gapu ta kamkameng datayo ti bagina. “Gapu iti daytoy, baybay-an ti lalaki ti amana ken inana, makitipon iti assawana, ket agbalin a maymaysa a lasag ti dua.” Daytoy a palimed ket nauneg, ket ibagak a maipapan daytoy ken ni Cristo ken iti iglesia. Ngem tunggal maysa kadakayo a lalaki, masapul nga ayatenna ti assawana a kas iti bagina, ket ti assawa a babai, masapul nga raemenna ti assawana.