Detụ Ya Ọnụ Ma Hụ

Abụ Devid, mgbe o mere onwe ya dịka onye ara nʼihu Abịmelek, onye chụpụrụ ya, ya ewee pụọ.

Devid dere nke a mgbe o gbapụrụ n'aka Abimelek site n'ime ka à ga-asị na ara na-agba ya. Ọ na-akpọ onye ọ bụla ka ọ nwalee Nna anyị n'onwe ya — detụ ire ma hụ — mgbe ahụ o zie ihe n'ụzọ doro anya: chebe ire gị, chụso udo. Nna anyị na-anọ ndị obi tiwara etiwa nso, ọ bụghị naanị ndị a napụtara.

Isi 34.

Aga m agọzi Nna anyị mgbe niile; otuto ya ga-adịgide nʼegbugbere ọnụ m.

Mkpụrụobi m na-anya isi nʼime Nna anyị; ka ndị dị umeala nụ ya ṅụrịakwa ọṅụ. Soronụ m bulie Nna anyị elu; ka anyị bulie aha ya elu ọnụ.

Achọrọ m Nna anyị, ọ zakwara m; ọ napụtara m site nʼegwu m niile. Ndị na-ele anya nʼebe ọ nọ na-enwu gbaa; ihu ha agaghị eme ihere ma ọlị. Ogbenye a tiri mkpu, Nna anyị nụkwara ya; ọ zọpụtara ya site na nsogbu ya niile. Mmụọ ozi nke Nna anyị na-ama ụlọikwuu gburugburu ndị na-atụ egwu ya, ọ na-anapụtakwa ha.

Detụ ya ọnụ ma hụ na Nna anyị dị mma; ngọzi na-adịrị onye na-agbaba nʼime ya. Tụọnụ egwu Nna anyị, unu ndị nsọ ya, nʼihi na ndị na-atụ egwu ya adịghị akọ ihe ọbụla. Ụmụ ọdụm na-agụ agụụ, kọọkwa ha, ma ndị na-achọ Nna anyị agaghị akọ ihe ọma ọbụla.

Bịanụ, ụmụ m, geenụ m ntị; aga m akụziri unu ịtụ egwu Nna anyị. Onye bụ onye ahụ chọrọ ndụ, hụkwa ọtụtụ ụbọchị ọma nʼanya? Chebe ire gị pụọ nʼihe ọjọọ, chebekwa egbugbere ọnụ gị ka ha ghara ikwu okwu aghụghọ. Si nʼihe ọjọọ tụgharịa, meekwa ezi ihe; chọọ udo ma chụsoo ya.

Anya Nna anyị dị nʼahụ ndị ezi omume, ntị ya ghekwara oghe nʼebe mkpu akwa ha dị. Ihu Nna anyị megidere ndị na-eme ihe ọjọọ, ka o hichapụ ncheta ha site nʼụwa. Ndị ezi omume na-eti mkpu, Nna anyị na-anụkwa; ọ na-anapụta ha site na nsogbu ha niile. Nna anyị nọ nso ndị obi ha tiwara etiwa; ọ na-azọpụta ndị e gwepịara nʼime mmụọ.

Onye ezi omume na-eche ọtụtụ ahụhụ ihu, ma Nna anyị na-anapụta ya site na ha niile. Nna anyị na-echebe ọkpụkpụ niile nke onye ezi omume; ọ dịghị otu nʼime ha nke a gbajiri agbaji.

Ihe ọjọọ ga-egbu ndị ajọ omume, a ga-amakwa ndị kpọrọ ndị ezi omume asị ikpe. Nna anyị na-agbapụta mkpụrụobi ndị ohu ya; ọ dịghị onye ọbụla na-agbaba nʼime ya nke a ga-ama ikpe.