Saamu 34

34 ¹Èmi yóò máa fi ìbùkún fún Baba wa nígbà gbogbo; ìyìn rẹ̀ yóò máa wà ní ẹnu mi nígbà gbogbo.

²Ọkàn mi ń ṣògo nínú Baba wa; kí àwọn onírẹ̀lẹ̀ gbọ́ kí inú wọn kí ó sì dùn. ³Ẹ bá mi gbé Baba wa ga; ẹ jẹ́ kí a jọ gbé orúkọ rẹ̀ ga pọ̀.

⁴Mo wá Baba wa, ó sì dá mi lóhùn; ó gbà mí kúrò nínú gbogbo ẹ̀rù mi. ⁵Àwọn tí ń wò ó ń tàn yòò; ojú kì yóò tì wọ́n láé. ⁶Ọkùnrin tálákà yìí ké jáde, Baba wa sì gbọ́ ohùn rẹ̀; ó gbà á là kúrò nínú gbogbo wàhálà rẹ̀. ⁷Angẹli Baba wa yí àwọn tí ó bẹ̀rù rẹ̀ ká, ó sì gbà wọ́n là.

⁸Ẹ tọ́ ọ wò kí ẹ sì rí i pé Baba wa dára; ìbùkún ni fún ẹni tí ó fi ara pamọ́ sọ́dọ̀ rẹ̀. ⁹Ẹ bẹ̀rù Baba wa, ẹ̀yin ẹni mímọ́ rẹ̀, nítorí àwọn tí ó bẹ̀rù rẹ̀ kò ṣe aláìní ohunkóhun. ¹⁰Àwọn ọmọ kìnnìún a máa rebi, ebi a sì máa pa wọ́n, ṣùgbọ́n àwọn tí ń wá Baba wa kì yóò ṣàìní ohun rere kankan.

¹¹Ẹ wá, ẹ̀yin ọmọ, ẹ fetí sí mi; èmi yóò kọ́ yín ní ìbẹ̀rù Baba wa. ¹²Ta ni ẹni tí ó fẹ́ ìyè tí ó sì fẹ́ràn ọ̀pọ̀ ọjọ́ rere? ¹³Pa ahọ́n rẹ mọ́ kúrò nínú ibi, àti ètè rẹ kúrò nínú sísọ ẹ̀tàn. ¹⁴Yà kúrò nínú ibi kí o sì ṣe rere; wá àlàáfíà kí o sì lépa rẹ̀.

¹⁵Ojú Baba wa ń bẹ lára àwọn olódodo, etí rẹ̀ sì ṣí sílẹ̀ sí igbe wọn. ¹⁶Ojú Baba wa kọ sí àwọn tí ń ṣe ibi, láti pa ìrántí wọn rẹ́ kúrò lórí ilẹ̀ ayé. ¹⁷Àwọn olódodo ké jáde, Baba wa sì gbọ́; ó gbà wọ́n là kúrò nínú gbogbo wàhálà wọn. ¹⁸Baba wa súnmọ́ àwọn oníròbìnújẹ́ ọkàn; ó sì gba àwọn tí ẹ̀mí wọn tẹ̀ rírun là.

¹⁹Ìpọ́njú àwọn olódodo pọ̀, ṣùgbọ́n Baba wa gba olúkúlùkù wọn là kúrò nínú gbogbo rẹ̀. ²⁰Baba wa ń ṣọ́ gbogbo egungun olódodo náà; ọ̀kan nínú wọn kì yóò ṣẹ́.

²¹Ibi yóò pa ẹni búburú, a ó sì dá àwọn tí ó kórìíra olódodo lẹ́bi. ²²Baba wa ra ọkàn àwọn ìránṣẹ́ rẹ̀ padà; kò sí ọ̀kan nínú àwọn tí ó fi ara pamọ́ sọ́dọ̀ rẹ̀ tí a ó dá lẹ́bi.