Bụkuoranụ Ya Abụ Ọhụrụ

Oku maka abụ ọhụrụ dabere n'otu nkwupụta: ụwa dị n'ihi na Nna anyị kwuru okwu. Ọ na-akwatu atụmatụ mba niile, na-ahụ n'ime obi ọ bụla o kpụrụ, usuu ndị agha na ịnyịnya agha adịghịkwa eju ya anya. Anya ya dị n'ahụ ndị na-echere ịhụnanya ya.

Isi 33.

Ṅụrịanụ ọṅụ nʼime Nna anyị, unu ndị ezi omume; otuto kwesịrị ndị obi ha ziri ezi. Jirinụ ụbọ akwara kele Nna anyị ekele; jirinụ ụbọ akwara nwere eriri iri kpọọrọ ya egwu. Bụkuoranụ ya abụ ọhụrụ; jirinụ nka kpọọ egwu, were mkpu ọṅụ.

Nʼihi na okwu Nna anyị ziri ezi, a na-ejikwa ikwesi ntụkwasị obi arụ ọrụ ya niile. Ọ hụrụ ezi omume na ikpe ziri ezi nʼanya; ịhụnanya ọgbụgba ndụ nke Nna anyị jupụtara nʼụwa.

Site nʼokwu Nna anyị ka e ji mee eluigwe, jirikwa ume si nʼọnụ ya mee usuu ha niile. Ọ na-achịkọta mmiri nke oke osimiri dịka ikpo; ọ na-edebe ebe miri emi nke oke osimiri nʼụlọ nkwakọba ya. Ka ụwa niile tụọ Nna anyị egwu; ka ndị niile bi nʼụwa tụọ ya oke egwu. Nʼihi na o kwuru okwu, o wee dịrị; o nyere iwu, o wee guzosie ike.

Nna anyị na-eme ka ndụmọdụ nke mba dị iche iche ghara ịbara uru; ọ na-emebi atụmatụ nke ndị niile. Ndụmọdụ nke Nna anyị na-eguzosi ike ruo mgbe ebighị ebi, atụmatụ nke obi ya ruo ọgbọ niile.

Ngọzị na-adịrị mba ahụ Nna ya bụ Nna anyị, bụ ndị ahụ ọ họọrọ ka ha bụrụ ihe nketa nke aka ya. Site nʼeluigwe Nna anyị na-eledata anya; ọ na-ahụ mmadụ niile. Site nʼebe obibi ya ọ na-elepụ anya nʼebe ndị niile bi nʼụwa nọ. Ọ na-akpụ obi ha niile; ọ na-aghọta ihe niile ha na-eme.

Ọ dịghị eze a na-azọpụta site nʼịba ụba nke ndị agha ya; a naghị anapụta dike nʼagha site nʼoke ike ya. Ịnyịnya bụ olileanya efu maka mmeri; nʼagbanyeghị oke ike ya niile, ọ pụghị ịzọpụta.

Ma anya nke Nna anyị dị nʼahụ ndị na-atụ ya egwu, na ndị olileanya ha dị nʼịhụnanya ọgbụgba ndụ ya, ịnapụta mkpụrụobi ha site nʼọnwụ na idebe ha ndụ nʼoge ụnwụ.

Mkpụrụobi anyị na-echere Nna anyị; ọ bụ onye inyeaka anyị na ọta anyị. Nʼihi na obi anyị na-aṅụrị ọṅụ nʼime ya, nʼihi na anyị tụkwasịrị obi nʼaha nsọ ya. Ka ịhụnanya ọgbụgba ndụ gị, Nna anyị, dịkwasị anyị nʼahụ, dịka anyị na-enwe olileanya nʼime gị.