Psalms 33

33 ¹ Make una dey rejoice for inside our Papa, una wey get correct-and-holy way; praise fit di upright people well well. ² Give our Papa tank-you wit di lyre; make music give am for di harp wey get ten string. ³ Sing new song give am; play am wit skill, wit shout of joy.

⁴ Bicos di word of our Papa dey upright, and all im work dey happen wit faithfulness. ⁵ E love correct-and-holy way and justice; di earth full wit di Covenant love of our Papa.

⁶ Na by di word of our Papa dem make di heavens, and all dia army by di breath of im mouth. ⁷ E gada di waters of di sea like heap; e keep di deep ocean for im storeroom dem. ⁸ Make di whole earth fear our Papa; make everybody wey dey for di world stand wit awe for im front. ⁹ Bicos e talk, and e come be; e give order, and e stand strong.

¹⁰ Our Papa dey turn di counsel of di nations to nothing; e dey spoil di plan of di people dem. ¹¹ Di counsel of our Papa dey stand forever, di plan of im heart through all generation dem.

¹² Blessing dey for di nation wey get our Papa as dia Papa, di people wey e don choose as im own inheritance. ¹³ From heaven our Papa dey look down; e dey see all human being. ¹⁴ From di place wey e dey stay e dey look out on everybody wey dey for di earth. ¹⁵ Na e dey form all dia heart; e dey understand everytin wey dem dey do.

¹⁶ No king dey save by di size of im army; strong warrior no dey escape by im big power. ¹⁷ Horse dey give fake hope of victory; even wit all im big power, e no fit save.

¹⁸ But di eye of our Papa dey on dem wey dey fear am, on dem wey dey hope for im Covenant love, ¹⁹ to save dia soul from death and to keep dem alive for time of famine.

²⁰ Our soul dey wait for our Papa; na e be our help and our shield. ²¹ Bicos our heart dey glad for inside am, bicos we dey trust im holy name. ²² Make your Covenant love, our Papa, dey on top us, as we dey hope for you.