Tar ke Notun Gana Ekta Gabi

Ekta kotha uporte thaka notun gana laga nimite matiya: prithibi ase kilemane amar Pitri koise. Tai desh khan laga plan khan ulta kori diye, Tai bonai thaka sob mon laga bhitor te sai, aru sena khan aru juddho laga ghora khan pora Tai ke kunbi asorit nohoi. Tar suku Tar morom laga nimite rukhi thaka khan uporte thake.

Adhyay 33.

Dharmik khan, tumikhan amar Pitri te khushi koribi; mon sidha manuh khan karne stuti kora thik ase. Beena pora amar Pitri ke dhanyavad dibi; dosta tar thaka beena pora Tar karne gana bajabi. Tar ke notun gana ekta gabi; khushi laga awaj pora, bhal pora bajabi.

Kilemane amar Pitri laga kotha sidha ase, aru Tar sob kaam biswas pora kora ase. Tar pora dharmikota aru niyai ke morom kore; prithibi tu amar Pitri laga vachan laga morom pora bhorta ase.

Amar Pitri laga kotha pora sorgo khan bonai dise, aru tarkhan laga sob sena Tar mukh laga saas pora bonai dise. Tar pora samundar laga pani khan dher nisena joma kore; Tar pora samundar laga gobhir pani Tar bhoral khan te rakhe. Pura prithibi amar Pitri ke bhoi koribi; prithibi te thaka sob manuh khan Tar age te bhoi pora khara hobi. Kilemane Tar pora koise, aru eitu ahhi jaise; Tar pora hukum dise, aru eitu khara hoi jaise.

Amar Pitri pora desh khan laga salah eku nathaka kori diye; Tar pora manuh khan laga bhabona khan ke biphol kori diye. Amar Pitri laga salah hodai nimite khara thake, Tar mon laga bhabona khan sob jug khan te thake.

Jun desh laga Pitri amar Pitri ase, hei desh asirbad pala ase, jun manuh khan ke Tar nijor adhikar nisena basi loise. Sorgo pora amar Pitri niche saye; Tar pora sob manuh jati ke dikhe. Tar thaka jaga pora Tar pora prithibi te thaka sob manuh khan ke saye. Tar pora tarkhan sob laga mon bonai; tarkhan ki kore eitu sob Tar pora bujhi loi.

Tar dangor sena pora kun raja bhi nabache; nijor dangor takot pora ekjon lerai manuh bhi nabache. Ghora pora jiti bole laga misa asha diye; tar dangor takot thakile bhi, eitu pora bachabo napare.

Kintu amar Pitri laga suku Tar ke bhoi kora khan uppor te ase, Tar vachan laga morom te asha kora khan uppor te ase, tarkhan laga jivon ke mrityu pora bachabole aru akaal te tarkhan ke jinda rakhibole.

Amar jivon amar Pitri ke rukhi ase; Tar he amar modot aru amar dhal ase. Kilemane amar mon Tar te khushi ase, kilemane amikhan Tar pobitro nam te biswas kore. Amar Pitri, Apuni laga vachan laga morom amikhan uppor te thaki bi, jineka amikhan Apuni te asha kore.