Ang Linukot nga Natimbrihan

Isa ka tinatakan nga linukot nga wala sing takus magbukas, kag naghibi sing mapait si Juan tungod sini. Dayon isa ka Kordero nga daw ginihaw ang nagkuha sini sa kamot sang iya Amay. Ang bag-o nga ambahanon parte sa pagbakal: mga tawo nga ginbakal para sa aton Amay halin sa tagsa ka hambal, ginhimo nga mga pari kag mga hari.

Kapitulo 5.

Nakita ko ang isa ka linukot sa tuo nga kamot sang nagapungko sa trono, nga may sinulat sa duha ka bahin, kag natimbrihan sang pito ka timbre. Nakita ko ang isa ka gamhanan nga anghel nga nagasinggit sing mabaskog, “Sin-o ang takus sa pagbukas sang linukot kag sa paguba sang mga timbre sini?” Kag wala sing bisan sin-o sa langit, sa duta, ukon sa idalom sang duta nga makabukas sang linukot ukon makatan-aw sa sulod sini. Naghibi ako sing tama, kay wala sing may nakita nga takus sa pagbukas sang linukot ukon sa pagtan-aw sa sulod sini. Niyan nagsiling sa akon ang isa sang mga gulang, “Untati ang imo paghibi. Tan-awa—ang Leon sang kabikahan ni Juda, ang Gamut ni David—si Jesus—nagdaug, gani mabuksan niya ang linukot kag ang pito ka timbre sini.” ^a

Kag sa tunga sang trono kag sang apat ka buhi nga mga tinuga, kag sa tunga sang mga gulang, nakita ko si Jesus, ang Kordero, nga nagatindog nga daw ginpatay na, nga may pito ka sungay kag pito ka mata, nga amo ang pito ka pilo nga Espiritu sang aton Amay nga ginpadala sa bug-os nga kalibutan. ^b Nagkari sia kag ginkuha niya ang linukot halin sa tuo nga kamot sang nagapungko sa trono. ^c Sang ginkuha niya ang linukot, naghapa sa atubangan sang Kordero ang apat ka buhi nga mga tinuga kag ang kaduhaan kag apat ka gulang, nga ang tagsatagsa may alpa kag mga yahong nga bulawan nga puno sang insenso—ang mga pangamuyo sang mga balaan sang aton Amay. Kag nag-amba sila sing bag-o nga amba, nga nagasiling: “Takus ikaw sa pagkuha sang linukot kag sa pagbukas sang mga timbre sini, kay ginpatay ikaw, kag paagi sa imo dugo ginbakal mo para sa aton Amay ang mga tawo halin sa tagsa ka kabikahan kag hambal kag katawohan kag pungsod, kag ginhimo mo sila nga ginharian kag mga pari sa aton Amay, kag magahari sila sa duta.”

Nagtan-aw ako, kag nabatian ko sa palibot sang trono, sang buhi nga mga tinuga, kag sang mga gulang, ang tingog sang madamo nga mga anghel—napulo ka libo pilo sang napulo ka libo, kag libo pilo sang libo, nga nagasiling sa mabaskog nga tingog: “Takus ang Kordero nga ginpatay sa pagbaton sang gahum kag manggad kag kaalam kag kusog kag kadungganan kag himaya kag pagdayaw!”

Kag nabatian ko ang tagsa ka tinuga sa langit kag sa duta kag sa idalom sang duta kag sa dagat, kag ang tanan nga yara sa ila, nga nagasiling: “Sa iya nga nagapungko sa trono kag sa Kordero ang pagdayaw kag kadungganan kag himaya kag kusog tubtub sa walay katubtuban!”

Kag nagsiling ang apat ka buhi nga mga tinuga, “Amen!” kag naghapa ang mga gulang kag nagsimba.