Ruwa daga Dutse
A Refidim jama'a suka yi gardama saboda ruwa, suka shirya su jajjefi Musa, suna tambaya ko Ubanmu yana tare da su ko ba ya tare. Aka ce masa ya bugi dutse, ruwa kuwa ya fito. Sa'an nan Amalek ya kawo hari, Isra'ila kuma suka yi nasara ne kawai muddin Haruna da Hur suna riƙe da hannuwan Musa sama.
17 1Dukan jama'ar Isra'ila suka tashi daga Hamadar Sin, suna tafiya mataki-mataki yadda Ubanmu ya umarta, suka kuma yi sansani a Refidim, amma babu ruwa da mutane za su sha. 2Mutane suka yi gardama da Musa suka ce, “Ka ba mu ruwan sha.” Musa ya amsa musu ya ce, “Me ya sa kuke gardama da ni? Me ya sa kuke gwada Ubanmu?”
3A can mutane suka ji ƙishirwar ruwa, suka yi gunaguni a kan Musa suna cewa, “Me ya sa ka fitar da mu daga Masar domin ka kashe mu da 'ya'yanmu da dabbobinmu da ƙishirwa?”
4Musa ya yi kuka ga Ubanmu ya ce, “Me zan yi da mutanen nan? Sun kusa su jajjefe ni da duwatsu.”
5Ubanmu ya ce wa Musa, “Ka wuce gaban mutane. Ka ɗauki waɗansu dattawan Isra'ila tare da kai, ka kuma riƙe sandar da ka bugi Kogin Nilu da ita a hannunka, sa'an nan ka tafi. 6Zan tsaya a can gabanka a kan dutsen a Horeb. Ka bugi dutsen, ruwa kuwa zai fito daga cikinsa domin mutane su sha.” Musa ya yi haka a idon dattawan Isra'ila.
7Ya sa wa wurin suna Massah da Meriba, domin mutanen Isra'ila suka yi gardama, suka kuma gwada Ubanmu, suna tambaya, “Ubanmu yana tare da mu ko babu?” a a v7 Massah yana nufin “gwaji” Meriba kuwa tana nufin “gardama” — an sa wa wurin sunan ne saboda yadda mutane suka yi shakka ko tabbas Ubanmu yana tare da su.
Ubanmu ya ci Yaƙi
8Sai Amalek ya zo ya yaƙi Isra'ila a Refidim. 9Musa ya ce wa Yoshuwa, “Ka zaɓa mana mutane, ka kuma fita ka yaƙi Amalek. Gobe zan tsaya a kan ƙwanƙolin tudu da sandar Ubanmu a hannuna.” 10Yoshuwa ya yi yadda Musa ya ce, ya yaƙi Amalek; Musa da Haruna da Hur kuwa suka hau kan ƙwanƙolin tudun. 11To, duk sa'ad da Musa ya ɗaga hannunsa, sai Isra'ila su yi nasara; amma duk sa'ad da ya saukar da hannunsa, sai Amalek ya yi nasara. 12Hannuwan Musa suka yi nauyi, saboda haka suka ɗora masa dutse ya zauna a kansa, Haruna da Hur kuwa suka riƙe hannuwansa, ɗaya a kowane gefe, har hannuwansa suka tabbata daram har fāɗuwar rana. 13Yoshuwa kuwa ya rinjayi Amalek da mutanensa da kaifin takobi.
14Ubanmu ya ce wa Musa, “Ka rubuta wannan a cikin littafi don tunawa, ka kuma karanta shi da ƙarfi a kunnen Yoshuwa, Zan shafe tunawa da Amalek ƙaƙaf daga ƙarƙashin sama.”
15Musa ya gina bagade ya sa masa suna, “Ubanmu Shi ne Tutata,” b b v15 Musa ya sa wa bagaden suna “Ubanmu shi ne tutata” bayan nasarar Isra'ila a kan Amalek, wadda aka ci yayinda hannuwansa suke a ɗage ga Ubanmu. 16ya kuma ce, “Gama an ɗaga hannu a kan karagar sarautar Ubanmu, zai yaƙi Amalek tsara bayan tsara.” c c v16 “Hannu a kan karaga” rantsuwar yaƙi ce. Amalek ya fara kai hari ga mulkin Ubanmu, saboda haka ya yi alkawari zai yaƙe su har abada.