Numeros 36

36 ¹Miduol ang mga pangulo sa mga panimalay sa banay ni Gilead—mga kaliwat ni Makir nga anak ni Manases, gikan sa mga banay ni Jose—ug misulti sa atubangan ni Moises ug sa mga pangulo, ang mga ulo sa mga banay sa panimalay sa Israel. ²Miingon sila, “Gisugo sa atong Amahan ang akong agalon sa paghatag sa yuta ingon nga panulondon pinaagi sa ripa ngadto sa katawhan sa Israel, ug gisugo usab sa atong Amahan ang akong agalon sa paghatag sa panulondon sa among igsoon nga si Zelofehad ngadto sa iyang mga anak nga babaye. ³Kon maminyo sila ug mga lalaki gikan sa ubang mga tribo sa Israel, ang ilang panulondon kuhaon gikan sa panulondon sa among mga amahan ug idugang ngadto sa panulondon sa ilang bag-ong tribo, nga makapakunhod sa panulondon nga gigahin kanamo. ⁴Sa pag-abot sa tuig sa Kagawasan sa Israel, ang ilang panulondon madugang ngadto sa panulondon sa tribo nga ilang gikaminyoan, nga kinuha gikan sa panulondon sa tribo sa among mga amahan.”

⁵Busa gisugo ni Moises ang mga Israelita sumala sa pulong sa atong Amahan, nga nag-ingon, “Husto ang gisulti sa tribo ni Jose.

⁶Mao kini ang gisugo sa atong Amahan mahitungod sa mga anak nga babaye ni Zelofehad: makaminyo sila kang bisan kinsa nga ilang gihunahunang labing maayo, apan sulod lamang sa banay sa tribo sa ilang amahan.

⁷Walay panulondon sa Israel nga mabalhin gikan sa usa ka tribo ngadto sa lain; ang matag Israelita kinahanglan magtipig sa panulondon sa tribo sa iyang mga katigulangan. ⁸Ang matag anak nga babaye nga makapanunod ug yuta sa usa ka tribo sa Israel kinahanglan maminyo sulod sa banay sa tribo sa iyang amahan, aron ang matag Israelita makatipig sa panulondon sa iyang mga katigulangan. ⁹Walay panulondon nga mabalhin gikan sa usa ka tribo ngadto sa lain; ang matag tribo sa Israel kinahanglan magkupot sa kaugalingon niini nga panulondon.”

¹⁰Sumala sa gisugo sa atong Amahan kang Moises, mao usab ang gibuhat sa mga anak nga babaye ni Zelofehad. ¹¹Si Mala, si Tirza, si Hogla, si Milca, ug si Noa, ang mga anak nga babaye ni Zelofehad, naminyo sa ilang mga ig-agaw sa bahin sa ilang amahan. ¹²Naminyo sila ngadto sa mga banay sa mga kaliwat ni Manases nga anak ni Jose, ug ang ilang panulondon nagpabilin sa banay sa tribo sa ilang amahan.

¹³Mao kini ang mga sugo ug mga lagda nga gisugo sa atong Amahan pinaagi kang Moises ngadto sa katawhan sa Israel didto sa kapatagan sa Moab, daplin sa Jordan atbang sa Jerico.