Chempen leiyeibü shuongei joyokei
Manasse chung leiyeibü shuongei, Zelofehadeibü yaksa shousi shuong lubü chung ka müt lealonga, haoeneibü phet haoen yoa sungan aplabü dogo chühenkei. Sakkubü kho ho ki: haoenei maibü dogo damda müt kho lealabü, lausikei haoeneibü boueibü chung chempen yoa ong, aishanga chung che phet lubü chung to huphanga ahaulabü.
36 1Kheijinei Josefeibü chung ka, Manasseeibü shou Makireibü thensilen, Gileadeibü chempeneibü chung leiyeibü shuongei Mosa hoba leiyeibü shuong, Israel shousi chempen leiyeibü shuong thedangto louan joyokei. 2Haoenei laukei, “Israelbü la phaang pakko kaonyek phetphan shanga kula seneibü Bouei ngeibü bunyubou la sakkua, hoba küneibü na Zelofehadeibü phet haoeibü yaksa shousi shuong la kula seneibü Bouei ngeibü bunyubou la sakkua. 3Haoenei lubü Israelbü chung ka müt lealonga, haoeneibü phet seneibü pisibou phet ka sungan aplabü, hoba haoen lebü chung haanbü phet to jinyokulabü, hoba seneibü phaang pakbü phet shilabü. 4Israelbü jubilee loulaje, haoeneibü phet haoen lebü chung phet to maangshikko paplepbo kilabü, hoba seneibü pisibou chung phet ka sungan aplabü.”
5Kheijinei Mosaei seneibü Bou ngüh danko Israelbü to sakkuko laukei, “Josefeibü chung tükde lauda.
6Zelofehadeibü yaksa shousi shuong shangabü seneibü Bouei sakkubü kho ho ki: haoenei maibü dogo damda müt kho lealabü, khei haoeneibü boueibü chung chempen yoa ong.
7Israelbü phet chung ka lubü chung to ahaulabü; Israel shousi mütpem wekoei jembü pisibou chung phet himlepan kilabü. 8Israelbü chung yoa phet hapbü yaksa shou pendouei jembü boueibü chung chempen yoa müt lelabü, kheijinei Israel shousi mütpem wekoei jembü pisibou phet haplabü. 9Phet che chung ka lubü chung to ahaulabü; Israelbü chung wekoei jembü phet to himlepan kilabü.”
10Seneibü Bouei Mosa la sakkubü tegü, Zelofehadeibü yaksa shousi shuongei khei kümbei. 11Mahla, Tirza, Hogla, Milka hoba Noa, Zelofehadeibü yaksa shousi shuongei, jembü boueibü jaisi shousi shuong la lekei. 12Haoenei Josefeibü shou Manasseeibü shousi chung yoa müt lekei, hoba haoeneibü phet jembü boueibü chung chempen yoa kikei.
13Jordan nyangko Jerikhoa Moab pholia seneibü Bouei Mosa danko Israelbü to sakkubü ngühkhüm hoba yeikubü ngühkhüm habü ho ki.
