Iinkulu Zemizalwane Ziyathetha

Iintloko zomzalwane kaManase zalatha ukuba iintombi zikaTselofehadi, ukuba zithe zenda ngaphandle kwesizwe, ziya kuthabatha ilifa lazo zimke nalo. Isigwebo: ziya kuzeka abo zibabona belungile, kodwa oko makube ngaphakathi emzalwaneni wesizwe sikayise, ukuze kungabikho lifa lasizwe liphalaza ngasese liye kwesinye.

Isahluko 36.

Iintloko zezindlu zooyise zomzalwane waseGiliyadi, oonyana bakaMakire unyana kaManase, emizalwaneni yoonyana bakaYosefu, zasondela zathetha phambi koMoses nezikhulu, iintloko zezindlu zooyise zoonyana bakaSirayeli. Zathi: “UBawo wethu wayiwisela umthetho inkosi yam ukuba inike ilizwe libe lilifa ngeqashiso koonyana bakaSirayeli; yaza inkosi yam yawiselwa umthetho nguBawo wethu ukuba inike iintombi zikaTselofehadi, umnakwethu, ilifa lakhe. Ukuba zithe zaba ngabafazi bamadoda ezinye izizwe zoonyana bakaSirayeli, ilifa lazo liya kuphuma elifeni loobawo bethu, longezelelwe elifeni lesizwe eziya kuzeka kuso; ngaloo ndlela libe lincinane ilifa esalabelwa lona. Xa luthe lwafika untlokoma woonyana bakaSirayeli, ilifa lazo liya kongezelelwa elifeni lesizwe eziya kuzeka kuso; lithatyathwe elifeni lesizwe soobawo bethu.”

Waza uMoses wabawisela umthetho oonyana bakaSirayeli ngokomlomo kaBawo wethu, wathi: “Sithethe inene isizwe soonyana bakaYosefu.

Yiyo le into awiselwe umthetho ngayo nguBawo wethu iintombi zikaTselofehadi, esithi: Ziya kuzeka abo zibabona belungile, kodwa oko makube emzalwaneni kuphela wesizwe sikayise.

Ize lingatshintshi isizwe isizwe ilifa loonyana bakaSirayeli; kuba oonyana bakaSirayeli elowo uya kubambelela elifeni lesizwe sakowabo. Yonke intombi edlayo ilifa esizweni soonyana bakaSirayeli, mayizeke emzalwaneni wesizwe sikayise, ukuze oonyana bakaSirayeli elowo adle ilifa looyise. Ize lingatshintshi isizwe esinye liye kwesinye ilifa; kuba izizwe zoonyana bakaSirayeli elowo uya kubambelela elifeni lakhe.”

Njengoko uBawo wethu wamwiselayo umthetho uMoses, zenjenjalo iintombi zikaTselofehadi. UMala, noTirtsa, noHogela, noMilka, noNoha, iintombi zikaTselofehadi, zaba ngabafazi boonyana baboomalume bazo. Zaba ngabafazi emizalwaneni yoonyana bakaManase, unyana kaYosefu; lahlala ke ilifa lazo emzalwaneni wesizwe sikayise.

Yiyo leyo imithetho namasiko awabawiselayo uBawo wethu oonyana bakaSirayeli ngesandla sikaMoses ezinkqantosini zakwaMowabhi, ngaseYordan malunga neYeriko.