د قبيلو مشرانو خبره وکړه

د منسّى د کورنۍ مشران یادونه کوي چې که د صلافحاد لوڼې له قبیلې بهر واده وکړي، نو خپله ځمکه به له ځانه سره یوسي. پرېکړه دا ده: له هر چا سره چې غوره یې ګڼي واده کولی شي، خو د خپل پلار د کورنۍ دننه، تر څو د هېڅ قبیلې میراث په چوپه خوله بلې ته لاړ نه شي.

څپرکی 36.

د جِلعاد د قبيلې د کورنيو مشران - چې د منسى د زوئ مکير اولاد وُو، د يوسف د قبيلو نه - نزدې راغلل او د موسىٰ او مشرانو په مخکښې، چې د اِسرائيل د کورنيو د قبيلو مشران وُو، يې خبره وکړه. هغوئ ووئيل چې، ”زمونږ پلار زما مالِک ته حُکم وکړو چې دا زمکه د اِسرائيل خلقو ته د قرعې په ذريعه د ميراث په توګه ورکړى، او زمونږ پلار زما مالِک ته حُکم وکړے وو چې زمونږ د ورور صلافحاد ميراث د هغۀ لوڼو ته ورکړى. کۀ هغوئ د اِسرائيل د نورو قبيلو سړو سره وادۀ وکړى، نو د هغوئ ميراث به زمونږ د پلرونو د ميراث نه بېل شى او د هغوئ د نوې قبيلې سره به يوځائ شى، او زمونږ ټاکلے ميراث به کم شى. کله چې د اِسرائيل د خوشحالۍ کال راشى، نو د هغوئ ميراث به د هغې قبيلې له ميراث سره يوځائ شى چې هغوئ ورسره وادۀ کوى، او زمونږ د پلرونو د قبيلې له ميراث نه به اخستے شى.“

نو موسىٰ د زمونږ پلار په حُکم د اِسرائيلو بچو ته حُکم وکړو چې، ”د يوسف قبيله رښتيا وائى.

د صلافحاد د لوڼو په حقله زمونږ پلار دا حُکم کوى چې، هغوئ د چا سره چې خوښ وى وادۀ کولے شى، خو صرف د خپل پلار د قبيلې په کورنۍ کښې.

د اِسرائيلو هيڅ ميراث دې د يوې قبيلې نه بلې قبيلې ته نۀ لېږدولے شى؛ هر اِسرائيلى دې د خپلو پلرونو د قبيلې ميراث وساتى. هره هغه لور چې د اِسرائيلو په کومه قبيله کښې ميراث مومى، هغه دې د خپل پلار د قبيلې په کورنۍ کښې وادۀ وکړى، دې دپاره چې هر اِسرائيلى خپل د پلرونو ميراث وساتى. هيڅ ميراث دې د يوې قبيلې نه بلې ته نۀ لېږدولے شى؛ د اِسرائيل هره قبيله دې په خپل ميراث قائمه پاتې شى.“

لکه څنګه چې زمونږ پلار موسىٰ ته حُکم ورکړے وو، هم هغه شان د صلافحاد لوڼو وکړل. محله، تِرزه، حُجله، مِلکه او نوعه، د صلافحاد لوڼو، د خپل پلار د خوا د تربورانو سره وادۀ وکړو. هغوئ د يوسف د زوئ منسى د اولاد په قبيلو کښې وادۀ وکړو، او د هغوئ ميراث د هغوئ د پلار د قبيلې په کورنۍ کښې پاتې شو.

دا هغه حُکمونه او فېصلې دى چې زمونږ پلار د موسىٰ په وسيله د اِسرائيلو بچو ته د موآب په ميدانونو کښې، د يردن د سيند پۀ غاړه د يريحو مخامخ ورکړل.