Saamu 81

81 ¹Ẹ fi ayọ̀ kọrin sí Baba wa, agbára wa; ẹ hó ìhó ariwo sí Ọlọ́run Jakọbu! ²Ẹ bẹ̀rẹ̀ orin, ẹ lu ìlù, dùùrù dídùn àti haapu. ³Ẹ fọn ìpè ní ọ̀sùpá tuntun, ní ọ̀sùpá kíkún, ní ọjọ́ àjọyọ̀ wa. ⁴Nítorí òfin ni fún Israẹli, àṣẹ Ọlọ́run Jakọbu.

⁵Ó fi lélẹ̀ gẹ́gẹ́ bí ẹ̀rí fún Josẹfu nígbà tí ó jáde lọ sí ilẹ̀ Ejibiti. Mo gbọ́ èdè kan tí èmi kò mọ̀ tẹ́lẹ̀:

⁶“Mo mú ẹrù kúrò ní èjìká rẹ̀; a tú ọwọ́ rẹ̀ sílẹ̀ kúrò nínú apẹ̀rẹ̀.

⁷“Nínú ìpọ́njú rẹ ni ìwọ ké pè, mo sì gbà ọ́ là; mo dá ọ lóhùn láti ibi ìkọ̀kọ̀ àrá; mo dán ọ wò ní ibi omi Meriba. ⁸Ẹ gbọ́, ẹ̀yin ènìyàn mi, èmi yóò sì kìlọ̀ fún yín—Israẹli, ìbá ṣe pé ẹ̀yin yóò fetí sí mi! ⁹Kò gbọdọ̀ sí ọlọ́run àjèjì kankan láàrin yín; ẹ kò gbọdọ̀ foríbalẹ̀ fún ọlọ́run mìíràn kankan.

¹⁰“Èmi ni Baba yín, ẹni tí ó mú yín gòkè jáde kúrò ní ilẹ̀ Ejibiti. Ẹ ya ẹnu yín gbòòrò, èmi yóò sì kún un. ¹¹Ṣùgbọ́n àwọn ènìyàn mi kò fetí sí ohùn mi; Israẹli kò jọ̀wọ́ ara rẹ̀ fún mi. ¹²Nítorí náà mo fi wọ́n lé agídí ọkàn wọn lọ́wọ́, láti máa tẹ̀lé ète ara wọn. ¹³Ìbá ṣe pé àwọn ènìyàn mi yóò fetí sí mi, ìbá ṣe pé Israẹli yóò rìn ní ọ̀nà mi! ¹⁴Láìpẹ́ ni èmi yóò ṣẹ́gun àwọn ọ̀tá wọn, èmi yóò sì yí ọwọ́ mi padà sí àwọn aninilára wọn! ¹⁵Àwọn tí ó kórìíra Baba wa yóò wárìrì níwájú rẹ̀, ìparun wọn yóò sì wà títí láéláé. ¹⁶Ṣùgbọ́n òun yóò fi àlìkámà tí ó dára jùlọ bọ́ wọn; èmi yóò fi oyin láti inú àpáta tẹ́ ọ lọ́rùn.”