Hiak swak thang rwe
Chongdip

Nanina Achong Ngaisu Dam Dabe

Laa tonu kasamnupa lang; gittith bi. Asaph om Kalum Laa.

Kanuk om laa—trumpet, khwang, tha than—haba lak pi ani Pa om Bakhwan hung rwe. Maanna bani balengpok khouna potrit lou sat thang ngaaknu ding baningsuluga rinne, “Namun lian ga lat thangro, atiga Eina haga thangsiplune.” Haba nung bi sung riangre: “Ami nunna Achong ngaisu dam dabe,” diga Maanna rinne.

Ani Pa na chongkhak hei bing bi kabia nge 6–16

Bung 81.

Ani kanatnu ani Pa khou karoga laa towo; Jacob om Rikrwang khou baraam basaangga paoro! Laa towo, khwang bweiyo, thumnu tara khatle tara kaino. Tha than bi, tha baringnu kaan bi, ani balou lumik ni bi trumpet sem thangro. Balangbe heiya Israel lang chongtan ka gaye, Jacob om Rikrwang om chongchak ka gaye.

Maanna Egypt talei ram chung bi se swaknu kaan bi, haga Joseph lang sake ka toga hap thang ngaake. Eina thei mak ngaaknu chong khat eina ngaisu rwe:

“Eina baom balengpok bina potrit ding lou sat rwe; bakut ga kapan bina sut swak thang rwe.

“Nating riangre bi nangna kou hungga, Eina nating kan thang rwe; khwa barinu inkamnu thaan bina Eina nating katak rwe; Meribah tui bi nating tamphaang rwe. Ngaiyo, Ami nun ga, atiga Eina nani ding bachu thanglune— He Israel, nangna Achong ngaisu dam dabe! Nani lak pi katei chaat rikrwang am mako; katei rikrwang khatcha khou le nanina in bakhup ta mako.

“Egypt talei ram bina nani ding kai takan swaknu nani Pa ga Ei gaye. Namun ding lian ga lat thangro, atiga Eina haga thangsiplune. Atiyeda Ami nunna Akhwan ngaisu lang za mak ngaake; Israel na Ei khou chat lang za mak ngaake. Atibriakpina Eina bani ding bani sung tun natnu khou pi swak rwe, atiga banina bani chaat baning sui ong rwe. Ami nunna Achong ngaisu dam dabe, Israel na Alampui bi se ong dam dabe! Karangga Eina bani munanu nun ding pi tehlune, atiga bani maitwangnu nun khou Akut kanei thanglune! Ani Pa ding batannu bing na Bakim bi det thang lune, atiga bani om braannu khwa seiga ong lune. Atiyeda Maanna bani ding gehu kasanu na sa lang pi kasem lune; lung bina lak khwei tuina Eina nating pi pem sat lune.”