Mishān 18

18 ¹Ithumwui Avāna Aaronli hānga, "Nana, nawui naomayarabing, kala nawui avāva̱wui shimkhurna kathara shimwui khayonkhamāng phāra; nana kala nawui naomayarabingna nathumwui pāngmonwui khayonkhamāng phāra. ²Nana kala nawui naomayarabingli ngasoda ningkhami kachonshimwui mangāli otram ngatha̱khavai, nawui avāva̱wui shang Levi shangwui nachinā ngarāla khuirālu. ³Athumna nawui otpam kala kachonshim katongawui otpam yangphalungra, kha kathara shimwui kathara ot lah hanphutli manganaipaimana, maningakha athum kala nathum khanini thiserra. ⁴Athumna nali ngasoda kazip khavai kachonshimwui otpam, chiwui otram katonga yangra; ayarwui mi khipānakha nawui ngalemli marāzangmara.

⁵Israelnaobingtungli malungkhavāt latluida matāzang khavai, kathara shim kala hanphut yangmilu. ⁶Ina Israel naomayarabingwui eina nathumwui achinā Levinaobingli khuihaira; athum iwuili chigat kahai, nathumwui vang lemmetna, kala kazip khavai kachonshimli otram ngatha̱ra. ⁷Nana kala nawui naomayarabingna hanphutwui ot katonga kala alung kachonwui khanukli nathumwui pāngmon yangphalungra; apamli otram ngatha̱lu. Ina nathumwui pāngmon otpam lemmet sāda milaka; kha mi khangatei rāzangakha ali shaothatra."

Avāna Awui Raobing chi Ngarānmi

⁸Ithumwui Avāna Aaronli hānga, "Ina nathumli iwui kachigat otwui kashi, Israelnaobingwui kathara ot katonga mihaira. Ina chibing nathumli yar sāda, kala nawui naomayarabingli mivāshumki kaji sāda mihaira. ⁹Hi meiwui eina khuikahai tharmathengmeikap kaji otbingwui eina nathumwuina: athumna iwuili khuirā kaji chigat ot katonga, tharāzāt kachigat ava̱va̱, suihamchigat ava̱va̱, kala khayonchigat ava̱va̱, nana kala nawui naomayarabingwui vang tharmathengmeikap kajena. ¹⁰Tharmathengmeikap kaje apamli shailu; mayarnao kachiva̱na shaipaira, kaja hi nathumli kathara otna.

¹¹Athumwui lemmet eina kachigat ot, Israelwui khayitchigat katongala nathumwuina. Shiyan-chikan sāki kaji ainza sāda, ina chibing nathumli, nawui naomayarabing kala naongalāva̱bingli ngasoda mihaira. Nawui shimli khalei kathara mi kachiva̱na shaipaisera. ¹²Athumna iwuili mi kaji theishirai, thao, drakhāra̱ kadhar kala mā mathāmeikap kaji, ina nathumli mihaira. ¹³Iwuili khuirā kaji athumwui ngaleiwui theishirai nathumwuina. Nawui shimli khalei kathara mi kachiva̱na shaipaisera.

¹⁴Israelli tharmeikap kahai ot kachiva̱ nathumwui sāra. ¹⁵Iwuili chigat kahai miwui lah sāwui naochizai kachiva̱ nathumwuina; kha miwui naochizai chi ngatangkhuilu, kala makathar sāwui naochizai ngatangkhuilu. ¹⁶Kachāngkha atungli kathara shimwui shekel aman athishurda lupāsā shekel phangā eina chibing ngatangkhuilu.

¹⁷Kha seiwui, yaowui, lah mewui naochizai chi nana mangatangkhuipaimana, kaja chibing kathara otna. Athumwui ashee chi hanphuttungli ikrorra, athumwui athao chi iwuili ningyāngkhaung nganamkaphā, mei eina rikkatā kachigat sāda riktāra. ¹⁸Kha khayitchigat kahai asuk eina yashongwui akhaishāng nathumwuisera thāda, athumwui asā chila nathumwuina. ¹⁹Israelnaobingna ili khuikharā kathara kachigat ot saikora chi, nala, nanaomayara eina sha̱nao ngasoda, mikhangayi yar sāda ina nathumli mihaira. Hi nala kala nawui ara̱-azā ngasoda imangāli mashimānda leikhavai machiwui tuingashitna." ^a a v19 Machi kadhara chiya mangacheiluida, katang makhavai leikhavai ngashit akha sai — machina ot chi pheochaoda khipā atamlikha makhaomana, chieina katang makhavai leikhavaiwui khudamna.

²⁰Ithumwui Avāna Aaronli hānga, "Nana athumwui ngalei chili shimlui masamphangmara, kala athumwui alungli nawui yar maleimana. Israelnaobingwui ngachaili I nawui yar eina shimluina."

²¹"Athumna sāki kazip khavai kachonshimwui otram khangatha̱wui vang, Israelli tithe saikora chi ina Levinaobingli shimlui sāda mikahaina. ²²Israelnaobingna kazip khavai kachonshimli manganaipailuimara, chithakha athumna khayon khuirāda thira. ²³Kha Levinaobingna kazip khavai kachonshimli otram ngatha̱ra, kala athum khalattawui khayonkhamāng phungra. Hi nathumwui thot-thot vāshungda shiyan-chikanna: Israelnaobingwui alungli athumna shimlui masamphangmara. ²⁴Kaja Israelnaobingna ili chigat sāda khuirā tithe chi, athumwui shimlui sāda Levinaobingli ina mikahaina. Chiwui vang eina ina athumli hānghaira: Israelnaobingwui alungli athumna shimlui masamphangmara."

²⁵Ithumwui Avāna Mosesli hānga,

²⁶"Levinaobingli matuida athumli hānglu: Nathumna Israelnaobingwui eina, nathumwui shimlui sāda ina nathumli mikahai tithe chi khui tharan, chiwui eina tithewui tithe ili chigat sāda khuirāra. ²⁷Nathumwui chigat chi nathumwui vang, ranpumwui mā thāda, kala drakhāra̱ surkhavaiwui heithei thāda, shānkhuira. ²⁸Nathumnala Israelnaobingwui eina nathumna khui tithe saikorawui eina ili chigatra, kala chiwui eina iwui chigat chi pāngmon Aaronli milu. ²⁹Nathumli mikahai lemmet saikorawui eina, kachiva̱wui mathāmeikap kaji kala tharmathengmeikap kaji sharuk chi, ili kachigat sāda chigatra.

³⁰"Chiwui vang eina athumli hānglu: chiwui mathāmeikap kaji sharuk chi nathumna chigat tharan, chi Levinaobingwui vang, ranpum eina drakhāra̱ surkhavaiwui heithei thāda shānkhuira. ³¹Chi nala nawui shimkhur ngarāla kali kalikhala shaipaisera, kaja chi nathumwui kazip khavai kachonshimwui otram khangatha̱wui ngalangmanna. ³²Chiwui mathāmeikap kaji sharuk chi nathumna chigat kahai thili, chiwui eina nathumna morei masāmara. Kha nathumna Israelnaobingwui kathara otbing chi masāmakhaopaimara, chithakha nathum thira."