ପିତା ଆପଣା ଯାଜକ ଓ ଲେବୀୟମାନଙ୍କୁ ନିଯୁକ୍ତ କରନ୍ତି

ହାରୋଣଙ୍କ ବଂଶ ପବିତ୍ରସ୍ଥାନର ଦୋଷ ବହନ କରେ, ଏବଂ ଲେବୀୟମାନଙ୍କୁ ସେମାନଙ୍କୁ ଦାନ ସ୍ୱରୂପ ଦିଆଯାଏ। କେହି ଭୂମି ପାଆନ୍ତି ନାହିଁ: ଦଶମାଂଶ, ପ୍ରଥମ ଫଳ ଓ ପ୍ରଥମଜାତ ହିଁ ସେମାନଙ୍କ ବେତନ, ଏବଂ ଆମ ପିତା ନିଜେ କହନ୍ତି ଯେ ଇସ୍ରାଏଲ ମଧ୍ୟରେ ସେ ହିଁ ସେମାନଙ୍କ ଅଂଶ ଓ ଅଧିକାର।

ଅଧ୍ୟାୟ 18।

ଆମ୍ଭମାନଙ୍କ ପିତା ହାରୋଣଙ୍କୁ କହିଲେ, “ତୁମ୍ଭେ, ତୁମ୍ଭର ପୁତ୍ରମାନେ ଓ ତୁମ୍ଭ ପିତୃଗୃହ ପବିତ୍ର ସ୍ଥାନର ଅପରାଧ ବହନ କରିବ; ତୁମ୍ଭେ ଓ ତୁମ୍ଭ ପୁତ୍ରମାନେ ଆପଣାମାନଙ୍କ ଯାଜକପଦର ଅପରାଧ ବହନ କରିବ। ପୁଣି ତୁମ୍ଭର ଭାଇମାନଙ୍କୁ, ଅର୍ଥାତ୍‍ ତୁମ୍ଭ ପିତୃବଂଶ ଲେବୀ ବଂଶକୁ, ଆପଣା ସଙ୍ଗେ ଆଣ, ଯେପରି ସେମାନେ ତୁମ୍ଭ ସହିତ ଯୁକ୍ତ ହୋଇ ତୁମ୍ଭର, ଅର୍ଥାତ୍‍ ତୁମ୍ଭର ଓ ତୁମ୍ଭ ପୁତ୍ରମାନଙ୍କର ସେବା କରନ୍ତି, ଯେତେବେଳେ ତୁମ୍ଭେ ସାକ୍ଷ୍ୟ-ତମ୍ବୁ ସମ୍ମୁଖରେ ଥାଅ। ସେମାନେ ତୁମ୍ଭର ରକ୍ଷଣୀୟ ଓ ସମୁଦାୟ ତମ୍ବୁର ରକ୍ଷଣୀୟ ରକ୍ଷା କରିବେ, ମାତ୍ର ପବିତ୍ର ସ୍ଥାନର ପବିତ୍ର ବସ୍ତୁ କିମ୍ବା ବେଦି ନିକଟକୁ ଆସିବେ ନାହିଁ, ନୋହିଲେ ସେମାନେ ଓ ତୁମ୍ଭେମାନେ ଉଭୟେ ମରିବ। ସେମାନେ ତୁମ୍ଭ ସହିତ ଯୁକ୍ତ ହୋଇ ସମାଗମ-ତମ୍ବୁର ରକ୍ଷଣୀୟ ଓ ତହିଁର ସମସ୍ତ ସେବା ରକ୍ଷା କରିବେ; କୌଣସି ଅପର ଲୋକ ତୁମ୍ଭମାନଙ୍କ ନିକଟକୁ ଆସିବ ନାହିଁ।

ତୁମ୍ଭେମାନେ ପବିତ୍ର ସ୍ଥାନର ଓ ବେଦିର ରକ୍ଷଣୀୟ ରକ୍ଷା କର, ଯେପରି ଇସ୍ରାଏଲ-ସନ୍ତାନଗଣ ଉପରେ ପୁନର୍ବାର କ୍ରୋଧ ନ ପଡ଼େ। ଆଉ ଦେଖ, ଆମ୍ଭେ ତୁମ୍ଭର ଭ୍ରାତୃବର୍ଗ ଲେବୀୟମାନଙ୍କୁ ଇସ୍ରାଏଲ-ସନ୍ତାନଗଣ ମଧ୍ୟରୁ ଗ୍ରହଣ କରିଅଛୁ; ସେମାନେ ସମାଗମ-ତମ୍ବୁର ସେବା କରିବା ନିମନ୍ତେ ଆମ୍ଭ ଉଦ୍ଦେଶ୍ୟରେ ଦତ୍ତ ହୋଇ ତୁମ୍ଭ ପ୍ରତି ଦାନସ୍ୱରୂପ ଅଟନ୍ତି। ପୁଣି ତୁମ୍ଭେ ଓ ତୁମ୍ଭ ପୁତ୍ରମାନେ ବେଦି ସମ୍ବନ୍ଧୀୟ ସମସ୍ତ ବିଷୟରେ ଓ ବିଚ୍ଛେଦ-ବସ୍ତ୍ରର ଭିତର ଭାଗରେ ଆପଣାମାନଙ୍କ ଯାଜକପଦ ରକ୍ଷା କରି ସେବା କରିବ; ଆମ୍ଭେ ତୁମ୍ଭମାନଙ୍କ ଯାଜକପଦ ଦାନସ୍ୱରୂପେ ଦେଉଅଛୁ; ଯେକୌଣସି ଅପର ଲୋକ ନିକଟକୁ ଆସିବ, ସେ ହତ ହେବ।”

ପିତା ଆପଣା ସେବକମାନଙ୍କ ନିମନ୍ତେ ଯୋଗାନ୍ତି

ଆମ୍ଭମାନଙ୍କ ପିତା ହାରୋଣଙ୍କୁ କହିଲେ, “ଦେଖ, ଆମ୍ଭେ ଆପଣା ଉତ୍ତୋଳନୀୟ ଉପହାରର, ଅର୍ଥାତ୍‍ ଇସ୍ରାଏଲ-ସନ୍ତାନଗଣର ସମସ୍ତ ପବିତ୍ର ଦ୍ରବ୍ୟର ରକ୍ଷଣୀୟ ତୁମ୍ଭକୁ ସମର୍ପଣ କରିଅଛୁ; ଆମ୍ଭେ ଅଭିଷେକ ସକାଶୁ ତାହା ତୁମ୍ଭକୁ ଓ ତୁମ୍ଭ ପୁତ୍ରମାନଙ୍କୁ ଅନନ୍ତକାଳୀନ ଅଧିକାରସ୍ୱରୂପେ ଦେଇଅଛୁ। ଅଗ୍ନିରୁ ରକ୍ଷିତ ମହାପବିତ୍ର ଦ୍ରବ୍ୟ ମଧ୍ୟରୁ ଏହା ତୁମ୍ଭର ହେବ; ସେମାନେ ଆମ୍ଭ ଉଦ୍ଦେଶ୍ୟରେ ଯେଉଁ ସମସ୍ତ ଉପହାର, ଅର୍ଥାତ୍‍ ପ୍ରତ୍ୟେକ ଭକ୍ଷ୍ୟ-ନୈବେଦ୍ୟ, ପ୍ରତ୍ୟେକ ପାପାର୍ଥକ ବଳି ଓ ପ୍ରତ୍ୟେକ ଦୋଷାର୍ଥକ ବଳି ଆଣନ୍ତି, ତାହା ତୁମ୍ଭ ଓ ତୁମ୍ଭ ପୁତ୍ରମାନଙ୍କ ନିମନ୍ତେ ମହାପବିତ୍ର ଅଟେ। ତାହା ମହାପବିତ୍ର ସ୍ଥାନରେ ଭୋଜନ କର; ପ୍ରତ୍ୟେକ ପୁରୁଷ ତାହା ଭୋଜନ କରିବ; ତାହା ତୁମ୍ଭ ପ୍ରତି ପବିତ୍ର ହେବ।

ଆଉ ଏହା ମଧ୍ୟ ତୁମ୍ଭର; ସେମାନଙ୍କ ଦାନରୁ ଉତ୍ତୋଳିତ ଉପହାର, ଅର୍ଥାତ୍‍ ଇସ୍ରାଏଲ-ସନ୍ତାନଗଣର ସମସ୍ତ ଦୋଳନୀୟ ନୈବେଦ୍ୟ; ଆମ୍ଭେ ତାହା ତୁମ୍ଭ ସଙ୍ଗେ ତୁମ୍ଭକୁ, ତୁମ୍ଭ ପୁତ୍ରମାନଙ୍କୁ ଓ ତୁମ୍ଭ କନ୍ୟାମାନଙ୍କୁ ଅନନ୍ତକାଳୀନ ବିଧିସ୍ୱରୂପେ ଦେଇଅଛୁ; ତୁମ୍ଭ ଗୃହରେ ଯେକେହି ଶୁଚି ଥାଏ, ସେ ତାହା ଭୋଜନ କରିବ। ତୈଳର ସମସ୍ତ ଉତ୍ତମ ଅଂଶ, ଦ୍ରାକ୍ଷାରସର ଓ ଶସ୍ୟର ସମସ୍ତ ଉତ୍ତମ ଅଂଶ, ଅର୍ଥାତ୍‍ ସେମାନେ ଆମ୍ଭ ଉଦ୍ଦେଶ୍ୟରେ ଯେଉଁ ପ୍ରଥମ ଫଳ ଦିଅନ୍ତି, ତାହା ଆମ୍ଭେ ତୁମ୍ଭକୁ ଦେଇଅଛୁ। ସେମାନେ ଆମ୍ଭ ଉଦ୍ଦେଶ୍ୟରେ ଯାହା ଆଣନ୍ତି, ସେମାନଙ୍କ ଦେଶର ପ୍ରଥମଜାତ ସମସ୍ତ ଫଳ ତୁମ୍ଭର ହେବ; ତୁମ୍ଭ ଗୃହରେ ଯେକେହି ଶୁଚି ଥାଏ, ସେ ତାହା ଭୋଜନ କରିବ।

ଇସ୍ରାଏଲ ମଧ୍ୟରେ ପ୍ରତ୍ୟେକ ବର୍ଜିତ ବସ୍ତୁ ତୁମ୍ଭର ହେବ। ଆମ୍ଭ ଉଦ୍ଦେଶ୍ୟରେ ଉତ୍ସର୍ଗିତ ମନୁଷ୍ୟ କି ପଶୁ, ସକଳ ପ୍ରାଣୀର ପ୍ରତ୍ୟେକ ପ୍ରଥମଜାତ ତୁମ୍ଭର ହେବ; ତଥାପି ମନୁଷ୍ୟର ପ୍ରଥମଜାତକୁ ତୁମ୍ଭେ ନିଶ୍ଚୟ ମୁକ୍ତ କରିବ, ପୁଣି ଅଶୁଚି ପଶୁର ପ୍ରଥମଜାତକୁ ମୁକ୍ତ କରିବ। ଏକ ମାସ ବୟସରୁ ଯେଉଁମାନେ ମୁକ୍ତ କରାଯିବାର ଅଛନ୍ତି, ସେମାନଙ୍କୁ ତୁମ୍ଭର ନିରୂପିତ ମୂଲ୍ୟ ଅନୁସାରେ ପବିତ୍ର ସ୍ଥାନର ଶେକଲ ପରିମାଣରେ ପାଞ୍ଚ ଶେକଲ ରୌପ୍ୟ ଦେଇ ମୁକ୍ତ କରିବ।

ମାତ୍ର ଗୋରୁର ପ୍ରଥମଜାତ କିମ୍ବା ମେଷର ପ୍ରଥମଜାତ କିମ୍ବା ଛାଗର ପ୍ରଥମଜାତକୁ ତୁମ୍ଭେ ମୁକ୍ତ କରିବ ନାହିଁ; ସେମାନେ ପବିତ୍ର ଅଟନ୍ତି; ତୁମ୍ଭେ ସେମାନଙ୍କ ରକ୍ତ ବେଦି ଉପରେ ସେଚନ କରିବ, ପୁଣି ଆମ୍ଭ ଉଦ୍ଦେଶ୍ୟରେ ସୁଗନ୍ଧାର୍ଥେ ଅଗ୍ନିକୃତ ଉପହାରସ୍ୱରୂପେ ସେମାନଙ୍କ ମେଦ ଦଗ୍ଧ କରିବ। ମାତ୍ର ଦୋଳନୀୟ ବକ୍ଷ ଓ ଦକ୍ଷିଣ ଜଙ୍ଘ ଯେପରି ତୁମ୍ଭର, ସେପରି ସେମାନଙ୍କ ମାଂସ ତୁମ୍ଭର ହେବ। ଇସ୍ରାଏଲ-ସନ୍ତାନଗଣ ଆମ୍ଭ ଉଦ୍ଦେଶ୍ୟରେ ଯେଉଁ ସମସ୍ତ ପବିତ୍ର ଉପହାର ଉତ୍ତୋଳନ କରନ୍ତି, ତାହା ଆମ୍ଭେ ତୁମ୍ଭ ସଙ୍ଗେ ତୁମ୍ଭକୁ, ତୁମ୍ଭ ପୁତ୍ର ଓ କନ୍ୟାମାନଙ୍କୁ ଅନନ୍ତକାଳୀନ ଅଧିକାରସ୍ୱରୂପେ ଦେଇଅଛୁ; ଏହା ଆମ୍ଭ ସମ୍ମୁଖରେ ତୁମ୍ଭ ପ୍ରତି ଓ ତୁମ୍ଭ ସଙ୍ଗେ ତୁମ୍ଭ ବଂଶ ପ୍ରତି ଅନନ୍ତକାଳୀନ ଲବଣ-ନିୟମ ଅଟେ।” ^a

ଆମ୍ଭମାନଙ୍କ ପିତା ହାରୋଣଙ୍କୁ କହିଲେ, “ସେମାନଙ୍କ ଦେଶରେ ତୁମ୍ଭର କୌଣସି ଅଧିକାର ହେବ ନାହିଁ, କିଅବା ସେମାନଙ୍କ ମଧ୍ୟରେ ତୁମ୍ଭର କୌଣସି ଅଂଶ ହେବ ନାହିଁ; ଇସ୍ରାଏଲ-ସନ୍ତାନଗଣ ମଧ୍ୟରେ ଆମ୍ଭେ ତୁମ୍ଭର ଅଂଶ ଓ ଅଧିକାର ଅଟୁ।”

“ଆଉ ଦେଖ, ଲେବୀ-ସନ୍ତାନଗଣ ଯେଉଁ ସେବା କରନ୍ତି, ଅର୍ଥାତ୍‍ ସମାଗମ-ତମ୍ବୁର ସେବା, ତହିଁ ବଦଳେ ଆମ୍ଭେ ଇସ୍ରାଏଲ ମଧ୍ୟରେ ସମସ୍ତ ଦଶମାଂଶ ସେମାନଙ୍କୁ ଅଧିକାରସ୍ୱରୂପେ ଦେଇଅଛୁ। ଆଉ ଏଣିକି ଇସ୍ରାଏଲ-ସନ୍ତାନଗଣ ସମାଗମ-ତମ୍ବୁ ନିକଟକୁ ଆସିବେ ନାହିଁ, ନୋହିଲେ ସେମାନେ ପାପଭାର ବହନ କରି ମରିବେ। ମାତ୍ର ଲେବୀୟମାନେ ସମାଗମ-ତମ୍ବୁର ସେବା କରିବେ ଓ ସେମାନେ ଆପଣାମାନଙ୍କ ଅପରାଧ ବହନ କରିବେ; ଏହା ତୁମ୍ଭମାନଙ୍କ ପୁରୁଷାନୁକ୍ରମେ ଅନନ୍ତକାଳୀନ ବିଧି ହେବ; ଆଉ ଇସ୍ରାଏଲ-ସନ୍ତାନଗଣ ମଧ୍ୟରେ ସେମାନେ କୌଣସି ଅଧିକାର ପାଇବେ ନାହିଁ। କାରଣ ଇସ୍ରାଏଲ-ସନ୍ତାନଗଣ ଆମ୍ଭ ଉଦ୍ଦେଶ୍ୟରେ ଉତ୍ତୋଳନୀୟ ଉପହାରସ୍ୱରୂପେ ଯେଉଁ ଦଶମାଂଶ ନିବେଦନ କରନ୍ତି, ତାହା ଆମ୍ଭେ ଲେବୀୟମାନଙ୍କୁ ଅଧିକାରସ୍ୱରୂପେ ଦେଇଅଛୁ; ଏଣୁ ଆମ୍ଭେ ସେମାନଙ୍କୁ କହିଅଛୁ, ଇସ୍ରାଏଲ-ସନ୍ତାନଗଣ ମଧ୍ୟରେ ସେମାନେ କୌଣସି ଅଧିକାର ପାଇବେ ନାହିଁ।”

ଆଉ ଆମ୍ଭମାନଙ୍କ ପିତା ମୋଶାଙ୍କୁ କହିଲେ,

“ଲେବୀୟମାନଙ୍କୁ କୁହ ଓ ସେମାନଙ୍କୁ କହିବ, ଯେଉଁ ଦଶମାଂଶ ଆମ୍ଭେ ଇସ୍ରାଏଲ-ସନ୍ତାନଗଣଠାରୁ ତୁମ୍ଭମାନଙ୍କ ଅଧିକାରସ୍ୱରୂପେ ତୁମ୍ଭମାନଙ୍କୁ ଦେଇଅଛୁ, ତାହା ତୁମ୍ଭେମାନେ ସେମାନଙ୍କଠାରୁ ଗ୍ରହଣ କଲେ, ତହିଁରୁ ଆମ୍ଭ ଉଦ୍ଦେଶ୍ୟରେ ଉତ୍ତୋଳନୀୟ ଉପହାର, ଅର୍ଥାତ୍‍ ଦଶମାଂଶର ଦଶମାଂଶ ଉତ୍ସର୍ଗ କରିବ। ପୁଣି ଖଳାର ଶସ୍ୟ ତୁଲ୍ୟ ଓ ଦ୍ରାକ୍ଷାକୁଣ୍ଡର ପୂର୍ଣ୍ଣ ଫଳ ତୁଲ୍ୟ ତୁମ୍ଭମାନଙ୍କ ଏହି ଉତ୍ତୋଳନୀୟ ଉପହାର ତୁମ୍ଭମାନଙ୍କ ପକ୍ଷରେ ଗଣିତ ହେବ। ଏହିରୂପେ ତୁମ୍ଭେମାନେ ମଧ୍ୟ ଇସ୍ରାଏଲ-ସନ୍ତାନଗଣଠାରୁ ପ୍ରାପ୍ତ ଆପଣାମାନଙ୍କ ସମସ୍ତ ଦଶମାଂଶରୁ ଆମ୍ଭ ଉଦ୍ଦେଶ୍ୟରେ ଉତ୍ତୋଳନୀୟ ଉପହାର ଉତ୍ସର୍ଗ କରିବ; ପୁଣି ତହିଁରୁ ଆମ୍ଭର ଉତ୍ତୋଳନୀୟ ଉପହାର ହାରୋଣ ଯାଜକଙ୍କୁ ଦେବ। ତୁମ୍ଭମାନଙ୍କ ସମସ୍ତ ଦାନରୁ ଆମ୍ଭ ଉଦ୍ଦେଶ୍ୟରେ ପ୍ରତ୍ୟେକ ଉତ୍ତୋଳନୀୟ ଉପହାର ଉତ୍ସର୍ଗ କରିବ, ଅର୍ଥାତ୍‍ ପ୍ରତ୍ୟେକ ଦ୍ରବ୍ୟର ଉତ୍ତମ ଓ ପବିତ୍ର ଅଂଶ ଉତ୍ସର୍ଗ କରିବ।

ଏଣୁ ତୁମ୍ଭେ ସେମାନଙ୍କୁ କହିବ, ଯେତେବେଳେ ତୁମ୍ଭେମାନେ ତହିଁର ଉତ୍ତମ ଅଂଶ ଉତ୍ସର୍ଗ କରିବ, ସେତେବେଳେ ତାହା ଖଳାର ଓ ଦ୍ରାକ୍ଷାକୁଣ୍ଡର ଉତ୍ପନ୍ନ ଦ୍ରବ୍ୟ ତୁଲ୍ୟ ଲେବୀୟମାନଙ୍କ ପକ୍ଷରେ ଗଣିତ ହେବ। ପୁଣି ତୁମ୍ଭେମାନେ ଓ ତୁମ୍ଭମାନଙ୍କ ପରିବାର ସକଳ ସ୍ଥାନରେ ତାହା ଭୋଜନ କରିବ; କାରଣ ଏହା ସମାଗମ-ତମ୍ବୁରେ ତୁମ୍ଭମାନଙ୍କ ସେବାର ବେତନସ୍ୱରୂପ ଅଟେ। ଆଉ ତୁମ୍ଭେମାନେ ତହିଁର ଉତ୍ତମ ଅଂଶ ଉତ୍ସର୍ଗ କଲା ଉତ୍ତାରେ ତନ୍ନିମନ୍ତେ କୌଣସି ପାପଭାର ବହନ କରିବ ନାହିଁ; ମାତ୍ର ତୁମ୍ଭେମାନେ ଇସ୍ରାଏଲ-ସନ୍ତାନଗଣର ପବିତ୍ର ଦ୍ରବ୍ୟ ଅପବିତ୍ର କରିବ ନାହିଁ, ନୋହିଲେ ତୁମ୍ଭେମାନେ ମରିବ।”