Pāngmonshi 19

19 ¹Ithumwui Avāna Mosesli hithāda hānga:

²"Israel ashangva̱ saikorali hānglu: Nathum tharphalungra, kaja I nathumwui Avā katharana.

³"Nathum kachiva̱na nava̱ eina navāli khayāshira, kala iwui sabbathbing mayonlu. I nathumwui Avāna.

⁴"Meoma̱li mashurthuihaialu, lah nathum khalattawui vang heikakhui varebing maheikhuipaimana. I nathumwui Avāna.

⁵"Kala nathumna ili ningyatchigat pha̱phayā ot saakha, chi khuisangpai khavai pha̱phayālu. ⁶Chi nathumna pha̱phayā zimiksholi lah akhama kathāli shaira; kala kakathumathang taira chi meili riktāra. ⁷"Kalikha kakathumathang shaiakha, chi kashui otna kala makhuisangmimara. ⁸Chi kashai mi akhalatta khayon phungra, kaja ana iwui kathara ot makhao ngasakhaowa; kala mipa chili awui mibingwui eina katathaora. ^a a v8 "Mibingwui eina katathao" chiwui kapina, kadhara ashangva̱wui eina katang makhavai thānshok kahaina, kala chiwui alungli Varewui bichar chila lei.

⁹"Kala nathumwui ngaleiwui mā nathumna kahāt tharan, luiwui amarei eina tangda mahātsangserlu, kala māhātwui māthamla maphālu. ¹⁰Nawui drakhā yāmgui mavāphāluialu, kala chiwui drakhāthei pitāhao chi maphālu. Kachāma mibing kala kha̱mibingwui vang chi taimilu. I nathumwui Avāna.

¹¹"Maleepaimana; maphārekalu; akha eina akha makapikluialu.

¹²"Iwui ming eina kapikta mamingzaipaimana; chi nawui Avāwui ming makhao khangasakna. I nathumwui Avāna.

¹³"Nawui khongnainaoli marekharekalu, lah matakzaalu. Langkapheiwui ngalangman chi ngayā pongda mahaipipaimana.

¹⁴"Khanā khangakhokbingli makhonshialu, lah mik khangapeobingwui mangāli phei ngaphok khavai ot mahaimipaimana, kha nathumwui Avāli ngacheelu. I nathumwui Avāna.

¹⁵"Bichar sā tharan mashun masho mangasakalu. Kachāma mili lah kharei mili mangakheilu, kha khongnainaoli khamashung eina bichar sālu.

¹⁶"Nawui mibingwui ngachaili khamashāt tui mamatuialu, kala nakhongnaiwui mirin kachotkachāngli leilakha nganingung eina manganinglu. I nathumwui Avāna.

¹⁷"Nachināli naningli maningkachaipaimana; nakhongnainaoli phonglāk eina hāngmachinlu, chithākha awui vang eina morei maphungmara. ¹⁸Nawui miyurli athut makhuipaimana lah maningkachaialu, kha nakhongnainaoli nakhalatta thāda leishilu. I nathumwui Avāna.

¹⁹"Iwui shiyanbing mayonlu. Nawui sha̱keili yur khangateili ngasopi ngasak masaalu. Nawui luili athā yur khani mayaopaimana, lah yur khani manātta kachon rakkharum mangavaipaimana.

²⁰"Mi akhana mi khangateiwui vang khuisangmikapai raonao sha̱naoli ngasopiakha, kala a aman mida malokhuilakha lah ningkhān mangasaklakha tharan, chiwui vang ngathing sāphalungra. A ningkhān maleirangsai khawui vang anili mashaothatpaimana. ²¹Ana awui khayon kachigatwui vang yaova akha kazip khavai kachonshim khāmongpheili Iwuili khuirāra. ²²Ana morei sākahai chiwui vang pāngmonna khayon kachigatwui yaova eina Iwui mangāli awui vang pheomi khavai chigatra; kala ana morei sākahai chi pheomihaira.

²³"Nathumna ngalei chili vāzangda kashakazāwui atheirong khipākha lingakha, chiwui athei chi mashaikapai ot thāda phaningkhuilu. Zingkum kathumwui vang chi nathumwui vang mashaikapaina; chi mashaipaimana. ²⁴Khamate kumli chiwui athei saikora kathara ngasāra; Iwuili masot chigatwui kachigatna. ²⁵Kha kaphangā kumli nathumna chiwui athei shaipaisera, chithāda sāda chi nathumwui vang athei mataisangra. I nathumwui Avāna.

²⁶"Ashee ngaso kahai ot akhala mashaipaimana. Khanong makhayangpaimana, lah hāngkhamarān masaalu.

²⁷"Nakui achikunwui sam kuimareida masipaimana, lah namorhāwui achikun masāmakhaopaimana. ^b b v27 Hi kataabing hi Vare mashitkasang miyurbingwui chapngachā kala khorumwui otsak matakhak sai, Israelna masāluishit khavaibingna.

²⁸"Kathibingwui vang nathumwui pha̱ mara̱paimana, lah nakhalattawui phasāli khamachut masāpaimana. I nathumwui Avāna.

²⁹"Nanaongalāva̱li khayorva̱ sāda masākhamāngpaimana, chithākha ngalei china khayor otsakli shurthuida makaphā otsakna pemserra.

³⁰"Iwui sabbathbing mayonchinglu, kala iwui katharapamli khayāshilu. I nathumwui Avāna.

³¹"Sha̱ khangasobing lah kazei kazang sākatheibingli mashurthuihaialu; athumwui vang eina nathum khalatta masākhamāngalu. I nathumwui Avāna.

³²"Sam charshi kahaibingwui mangāli ngakarthuilu, kala khararnaobingli khayāshilu. Nathumwui Avāli ngacheelu. I nathumwui Avāna.

³³"Kha̱mi akhana nathumwui ngaleili nathumli ngasokharāakha, ali marekharekpaimana. ³⁴Nathumli ngasokharā kha̱mi chi nathumwui vang ramnaobing thāda ngasāra, kala nakhalatta thāda ali leishilu; kaja nathumla Egyptli kha̱mi sai. I nathumwui Avāna.

³⁵"Nathumna bicharli, asān tamli, khānli, lah chungkhana tamli khayon ot masāpaimana. ³⁶Khamashung khān, khamashung mari, khamashung tin, khamashung luk singra. Egypt ngaleiwui eina nathumli thānshokkhame nathumwui Avā chi ina.

³⁷"Nathumna iwui shiyan-chikan saikora kala iwui kaso kahai saikora mayonda sālu. I nathumwui Avāna."