Kaneibü Bou saopobü kibü tegü kan saopobü kishi
Kaneibü Bou saopobü kibü tegü saopobü kibü kho chalou angbüa kümsilei ki: sek lata phajib shalebü shanga apyoan, latnyu to lanyet haoeibü namtet pheashi, obangbü to akhükuokjan, nyekthubü phaiyet aphokujan, wela matjemashi, kaibü lepbou hoba yenbou to sanouashi, hoba jembü thepet wela kümashi.
19 1Seneibü Bouei Mosa to laukei,
2“Israelbü mütshang pendou to lenashi, Kan saopobü kishi, aishanga ngo kaneibü Bou saopobü ki.
3“Kan wekoei jembü nyusibou to wela leashi, hoba ngeibü Nounyet shuong nouashi. Ngo kaneibü Bou ki.
4“Kanei heangsho shuong phai sepeinyu tengai, ayingsi kan jembü shanga namei mühghaü teküm. Ngo kaneibü Bou ki.
5“Ladang kanei kü to sangmai lembü kulaje, sungleten la shanga lemjan. 6Kanei kho kubü khünyet, ayingsi ngiet shaujan; lausikei sembounyet sühko jouan kibü kho wana jikan apjan. 7Ladang kho at sembounyet shaualonga, kho mangsenlabü ki, hoba asungletlabü. 8Aoei kho shaulaje haoei jembü shedbü künlabü, aishanga haoei kü shanga saopobü kibü peisilei aweasüngko; kho müt jembü mütli ka wapan aplabü. a a v8 “Mütli ka wapan apbü” dogo laubü kho, theyolanyobü mütshang ka ponpen shian apbü ki, hoba khoa Mühghaü matjembü tang khitbü ki.
9“Ladang kanei kaneibü kaonyek latdaje, kaibü sek phajib kho nyi alatjan, ayingsi kaibü youlat ka maabü nyi ahejan. 10Nyi kaibü semlühlaak semlüh pendou akheijan, ayingsi khoeibü semlüh atbü nyi ahejan; shalebü hoba yenbou shanga khübü kho apyokuashi. Ngo kaneibü Bou ki.
11“Nyi tekok; aoeikei tehuonetti; kan cheei che to teyepeiti.
12“Kü nyen phongko amlangbü tetheyolanyoti; khoei kanei kaneibü Bou nyen aweasüngda. Ngo kaneibü Bou ki.
13“Nyi kaibü lepbou khon tekiti, ayingsi hao telangkuti. Mulambü müteibü mu kho ngeyang sühko peialeia ayepjan.
14“Likhipbü to tekhüktuok, ayingsi nyekthubü thedanga tuongtila peisilei tephoku, lausikei kaneibü Bou to soumo hatashi. Ngo kaneibü Bou ki.
15“Kanei kaneibü matjema ngühmai tesepei; shalebü to ngüha the techüh, ayingsi yaangbou to ngüha the techühjan, lausikei kaibü lepbou to ngühmaia matjembüshi.
16“Kaneibü mütli yoa nyiku ngüh lendang telekti, hoba kaibü lepboueibü langkei khauekbü kijinei, no ai akümbo loan tekiti. Ngo kaneibü Bou ki.
17“Kaibü maangpona kaibü na to temangsenti; kaibü lepbou to yongko hakashi, khei ayinglonga hao shanga shabü künlabü. 18Kaneibü mütli to tephoklam ayingsi temangsen, lausikei kaneibü lepbou to jembü lolo tegü sanoushi. Ngo kaneibü Bou ki.
19“Kanei ngeibü sakkubü jungeishi. Kaneibü samkeisamuk lubü phang yoa alaangeijan. Kaneibü seka son den lulu akijan, ayingsi souyobü nei den lulu aneijan.
20“Müt atei lubü bou la khubü sambü aao yaksa to jamalonga, hoba sao ajekngaian ayingsi ngühtet la ayei kikei, haoen to chühbü kümlabü. Haoen ahaitilabü, aishanga sao ngühtet akisikei. 21Haoei jembü shedtimashikbü lembü Neichem lemshang kouthea kü jungto sungbajan, kho shedtimashikbü lembü shanga sanlon paang che kijan. 22Ungshedbouei shedtimashikbü lembü sanlon paangei kü thedanga, haoei shed shonkei kho shanga, hao shanga shabü hangan apla shanga kümlabü; hoba haoei shed shonkei shabü hao la apbulabü.
23“Kanei kaodak khüto louan shausiyung bunyu aikei lealonga, khoeibü hek kho thangetbü dogo damda. Po sem sühko kho kan shanga thangetbü kilabü; kho ashaujan. 24Leiboubü poa khoeibü hek pendou kü la nyensang kubü lembü shanga saopobü kilabü. 25Lausikei ngaoboubü poa kanei khoeibü hek shaula thükkei, kho tegü khoei kan la hek shuonga hekkulabü. Ngo kaneibü Bou ki.
26“Kanei sii yoa kibü ai ong ashaujan. Tetsi akümjan, ayingsi khopjikseibü akümjan.
27“Kaneibü khua nyek khu kho ashuan üpjan, ayingsi kaneibü sembung wi nyek kho adamjan. b b v27 Ho shuanbü shuong kho thinei lubü mühghaü khangenbü shuongeibü mang haapbü hoba haoeneibü lemtibü lam la yeikei; khübü kho Israelei akümla maangsangbü kikei.
28“Haibü shuong shanga kaneibü manga aikei apüpjan, ayingsi kan manga mou akümjan. Ngo kaneibü Bou ki.
29“Kaneibü nouyangnyu suonlamnyu la yeitiko aweasüngko teki, khei aying longa kaodak suonlam aeto sepeilabü, hoba kaodak amaibüei weko loulabü.
30“Ngeibü Nounyet shuong kanei jungeishi, hoba ngeibü lemshang kho soumo hatashi. Ngo kaneibü Bou ki.
31“Sei kibü seibü ayingsi seibüyaübü shuong aeto tesepei, haoen yoa asaopobü la yeila telam. Ngo kaneibü Bou ki.
32“Khuthubü shuong thedanga piashi, hoba jaishou shuong to wela leshi. Kaneibü Bou to sou hatashi. Ngo kaneibü Bou ki.
33“Ladang yenbou che kaneibü kaonyeka kan yoa kialonga, hao to mangthem ajungeijan. 34Kan yoa louan kibü yenbou kho kan shanga sangbüshou tegü kijan, hoba hao to jembü lolo tegü sanoushi; aishanga kan Ijep kaodak ka yenbou la kikei. Ngo kaneibü Bou ki.
35“Kanei matjema, hoba süng, seret, ayingsi juong takbüa amaibü akümjan. 36Ngühmaanglanbü takteibü, ngühmaanglanbü seret laang, ngühmaanglanbü youshou kam, hoba ngühmaanglanbü dei kam kan phojan. Ngo kaneibü Bou ki, aoei kan Ijep kaodak ka leiyenkei.
37“Kanei ngeibü ngühkhüm pendou hoba ngeibü matjem pendou jungeiashi, hoba khübü kho kümashi. Ngo kaneibü Bou ki.”
