Ngeibü Maangpon Pendou Ka Aeto
Chia atbü thükbou shanga: Muth-labben tegü. Dawideibü chia.
Che khümenbü shangabü nyensang: dangbou shuong sepeian ngaikei, haoeneibü sangnyu shuong pheian apbei, haoeneibü nyen ponpen haman apbei. Seneibü Bou saopobü matjembou tegü hoba shieikoeko kibü shuong shanga satenshang tegü setda. Dawidei hao to tou loan dogo ngada, aishanga phangshuongei haoen müt lolo ong ki dogo ngelabü.
9 1O kü Bou, ngei ngeibü maangpon khümboei ka la nyensang kulabü; ngei kaibü maangpanglabü kümsilei pendou nopngaiko laulabü.
2Ngei ka yoa maanghaiko hoba olinlabü; O Thükkabou, ngei kaibü nyen shanga nyensang chia laulabü.
3Ngeibü dangbou shuong sepeian ngaijinei, haoen ka thedanga phaiyetan maulabü. 4Aishanga nyi ngeibü ngühmai hoba ngeibü janbü phokukei; nyi saopobü matjembou tegü Choba setshanga setkei. 5Nyi phang shuong to kaangko laukei; nyi amaibü shuong mautikei; nyi haoeneibü nyen ponpen thon akiko haman apbei. 6Dangbou kho ponpen leilubü mauakei; nyi haoeneibü sangnyu shuong pheian apbei; haoen damenbü ong mauakei.
7Lausikei seneibü Bou kho ponpen setbou ong ki; haoei ngühmai shanga haoeibü Choba setshang kümakei. 8Hoba haoei kaodak saopobüa matjem kümda; haoei mütshuong thüka ngühmaia yaangenda. 9Seneibü Bou kho shieikoeko kibü shuong shanga satenshang ki, khonkubü chaloua lapheishon ki. 10Kaibü nyen ngebü shuongei ka to mailemda; aishanga nyi, O seneibü Bou, ka to lambü shuong ladangkei abangtikei.
11Zion ka kibü seneibü Bou la nyensang chia lauashi! Haoeibü kümsilei phang shuong yoa phinthonashi! 12Aishanga sii phoklambouei khonkutibü shuong damenda; haoei haoeneibü kaang ngekbü amaada.
13O kü Bou, kü to onoukaima! Ngo mangsenbü shuongeibü ik ka ngeibü khonku damanchühshi, nyi hailabü bakhün ka ngo phonbou, 14Zion Nouyangnyueibü bakhüna ngei kaibü nyensang pendou phinthonla, hoba kaibü khümenbüa olinla shanga.
15Phang shuong kho haoenei kümbü püngkhüna tütkei; haoenei huan phokbü taka haoen lolo you minkei. 16Seneibü Bou himshuong ngetikei; haoei ngühmai kümbei; amaibü kho jembü ikkümiklei to minkei. Higgaion. a a v16 Higgaion kho chia atbü ayingsi maanga damandakbü sanbü che ki — jolaei chia laubü kho thüka telemenan damandakla sakbü che dogo mailabü.
17Amaibü shuong, seneibü Bou maan apbü phang shuong pendou, hee to sepeilabü. 18Aishanga khambü shuong ponpenje amaalabü, ayingsi khonsak khonkubü shuong maanglem ponpen amaulabü.
19Meimeiashi, seneibü Abou! Hailabü müt thük tehüpti; phangshuong kaibü thedanga matjemashi. 20Haoen thükto hatlamoklabü sühtiashi, seneibü Abou; phangshuongei haoen hailabü müt ong ki dogo ngeashi.
