Ngoro Yakwa Yoothe Kũrĩ Wee

Kũrĩ mũtongoria wa ũini: kũringana na Muth-labeni. Thaburi ya Daudi.

Ngaatho nĩ ũndũ wa ũhonokio ũrĩ ũtuĩku: thũ igacookio na thutha, matũũra mao makunyũrwo, o na marĩĩtwa mao makahuutwo. Ithe witũ aikarĩte arĩ mũtuanĩri wa kĩhooto na kĩĩhitho kĩa arĩa mahinyĩrĩirio. Daudi amũthaithaga ookĩre rĩngĩ nĩguo ndũũrĩrĩ iririkane atĩ nĩ andũ o tu a gũkua.

Gĩcunjĩ 9.

Nĩngũgũcookeria ngaatho, Ithe wakwa, na ngoro yakwa yoothe; nĩngũgana ciĩko ciaku ciothe cia magegania.

Nĩngũkena na ngacanjamũka nĩ ũndũ waku; nĩngũinĩra rĩĩtwa rĩaku, wee Ũrĩa-ũrĩ-Igũrũ-Mũno.

Rĩrĩa thũ ciakwa icooka na thutha, nĩihĩngĩcaga, igathira mbere yaku. Amu nĩũtiirĩrĩire kĩhooto gĩakwa na ciira wakwa; nĩũikarĩire gĩtĩ kĩa ũnene ũrĩ mũtuĩri-ciira mũthingu. Nĩũrũithĩtie ndũũrĩrĩ; nĩwanangĩte andũ arĩa aaganu; nĩũtharĩtie rĩĩtwa rĩao nginya tene na tene. Thũ nĩĩthirĩte, ĩrĩ mwanangĩkoinĩ wa tene na tene; nĩũmunyĩte matũũra maao manene; naguo ũririkano waao nĩũthirĩte biũ.

No Ithe witũ aikarĩire gĩtĩ kĩa ũnene nginya tene; nĩahaandĩte gĩtĩ gĩake kĩa ũnene nĩ ũndũ wa gũtua ciira na kĩhooto. Naake nĩatuĩragĩra andũ a thĩ ciira na ũthingu; agaathaga ndũũrĩrĩ na kĩhooto. Ithe witũ nĩ rĩũrĩro rĩa arĩa ahiinyĩrĩrie, nĩ kĩĩhitho kĩa hinya hĩndĩ cia mĩnyamaro. Arĩa mooĩ rĩĩtwa rĩaku nĩmehokaga harĩ wee, amu wee, Ithe witũ, ndũrĩ hĩndĩ watiganĩirie arĩa makũmaathaga.

Inĩrai Ithe witũ ũrĩa ũtũũraga Zayuni! Hunjiai ciĩko ciake thĩinĩ wa ndũũrĩrĩ! Amu ũrĩa ũrĩhanagĩria thakame nĩaririkanaga arĩa anyamaarie; ndariganagĩrwo nĩ kĩrĩro kĩao.

Njiguĩra tha, Ithe wakwa! Rora thĩĩna wakwa ũrĩa njĩkĩrĩtwo nĩ arĩa maathũire, wee ũrĩa ũũnjoyaga kuuma ihingoinĩ cia gĩkuũ, nĩ geetha nyumbũre ngaatho ciaku ciothe ihingoinĩ cia Mwarĩ wa Zayuni, na ngene nĩ ũndũ wa ũhonokio waku.

Ndũũrĩrĩ nĩitoonyete irima rĩrĩa cienjire; magũrũ mao mene nĩmanyiitĩtwo nĩ mũtego ũrĩa ciahithĩte. Ithe witũ nĩemenyithanĩtie we mwene; nĩatuanĩrĩte ciira na kĩhooto; ũrĩa mwaganu nĩanyiitĩtwo nĩ wĩra wa moko make mwene. Higaioni. ^a

Andũ arĩa aaganu nĩmacookaga mbĩrĩrainĩ, ndũũrĩrĩ ciothe iria iriganagĩrwo nĩ Ithe witũ. Amu arĩa abataari matikaariganĩrwo hĩndĩ ciothe, o na kana mwĩhoko wa arĩa anyamaarie ũthire nginya tene.

Ũkĩra, Ithe witũ! Ndũkareke andũ a thĩ matoorie; reke ndũũrĩrĩ ituĩrwo ciira mbere yaku. Maiyũrie guoya, Ithe witũ; reke ndũũrĩrĩ imenye atĩ cio no andũ a thĩ.