Kaodak Thonbü ka Ngekbü
Chia thükkabou shanga; kongkin yoa. Dawid ka.
Maangpon semthetbü müt cheei kaodak thonbü ka pekubü welau, jembü Bouei hao tokei thükkabü laang to ngo hautishi dogo lamku. Haoei hauko kibü danko lamda, loubü aying—kaibü neichem ponpen—hoba Choba to meten juongbü langkei lamda.
61 1Kü Bou, ngeibü ngek ditshi; ngeibü welau to nou haangashi. 2Kaodak thonbü ka ngei ka to ngekda, kü maangpon semthetlaje; ngo tokei thükkabou laang to ngo hautishi. 3Aishanga nyi ngeibü satenshang kikei, dangbou khulimbo hau kibü laangchem kikei.
4Kaibü neichem ka ponpen kila ngei haiyeida hoba kaibü kaak yeme phanga maanglem üangda. 5Aishanga nyi, kü Bou, ngeibü theletbü ditkei; kaibü nyen to souhatbü shuong phetphan nyi ngo la kua. 6Choba langkei la po jinkushi; haoeibü po meten juong sühko kitishi. 7Hao seneibü Bou thedanga ponpen Choba setshanga setan kitishi; kaibü üeisanou hoba maanglemenbü hao to lombo kila shanga pienshi. 8Kheijinei ngei kaibü nyen shanga ponpen nyensang chia laulabü hoba chalou angboua ngeibü theletbü loushedlabü.
