Ọpụpụ 29 FHB Father's Heart Bible™

29 ¹“Iji doo ha nsọ ka ha bụrụ ndị nchụaja na-ejere m ozi, mee ihe a: were otu nwa oke ehi na ebule abụọ na-enweghị ntụpọ, ²na achịcha na-ekoghị eko, na ogbe achịcha na-ekoghị eko nke e ji mmanụ gwaa, na mbadamba achịcha dị nro na-ekoghị eko nke e tere mmanụ, ihe niile e ji ezigbo ụtụ ọka wit mee. ³Tinye ha nʼotu nkata ma site na ya chepụta ha, ya na oke ehi ahụ na ebule abụọ ahụ. ⁴Mgbe ahụ, kpọta Erọn na ụmụ ya ndị ikom nʼọnụ ụzọ ụlọikwu nzukọ ma jiri mmiri saa ha. ⁵Were uwe ndị ahụ ma yikwasị Erọn uwe ime ahụ, na uwe mwụda nke efọd, na efọd ahụ, na ihe mkpuchi obi ahụ, ma kee ya eriri a kpara akpa nke efọd nʼahụ. ⁶Kpube ya okpu isi nʼisi ya ma tinye okpueze nsọ ahụ nʼelu okpu isi ahụ. ⁷Mgbe ahụ were mmanụ otite ahụ, wụsa ya nʼisi ya, ma tee ya mmanụ. ⁸Kpọbata ụmụ ya ndị ikom ma yikwasị ha uwe ime ahụ. ⁹Kee Erọn na ụmụ ya ndị ikom eriri nʼukwu ma kekwasị ha okpu ha. Ọrụ nchụaja ga-abụ nke ha site nʼiwu na-adịgide adịgide. Otu a ka ị ga-esi doo Erọn na ụmụ ya ndị ikom nsọ maka ọrụ.

¹⁰“Kpọta oke ehi ahụ nʼihu ụlọikwu nzukọ; Erọn na ụmụ ya ndị ikom ga-ebikwasị ya aka nʼisi. ¹¹Gbuo oke ehi ahụ nʼihu m nʼọnụ ụzọ ụlọikwu nzukọ. ¹²Were ụfọdụ nʼime ọbara oke ehi ahụ ma jiri mkpịsị aka gị tee ya nʼelu mpi ebe ịchụ aja ahụ; wụsa ihe fọdụrụ nʼụkwụ ebe ịchụ aja ahụ. ¹³Were abụba niile nke kpuchiri akụkụ ahụ ime ahụ, na akụkụ mgbasara nke umeju, na akụrụ abụọ na abụba dị nʼahụ ha, ma kpọọ ha ọkụ nʼelu ebe ịchụ aja ahụ. ¹⁴Kpọọ anụ ahụ oke ehi ahụ, na akpụkpọ ya, na nsị ya ọkụ nʼèzí ebe obibi ha. Ọ bụ aja mmehie.

¹⁵“Were otu ebule; Erọn na ụmụ ya ndị ikom ga-ebikwasị ya aka nʼisi. ¹⁶Gbuo ebule ahụ, were ọbara ya, ma fesaa ya nʼakụkụ niile nke ebe ịchụ aja ahụ. ¹⁷Bọkaa ebule ahụ ntakịrị ntakịrị, saa akụkụ ahụ ime ya na ụkwụ ya, ma tụkwasị ha nʼelu iberibe ya na isi ya. ¹⁸Mgbe ahụ kpọọ ebule ahụ dum ọkụ nʼelu ebe ịchụ aja ahụ. Ọ bụ aja nsure ọkụ nye m, isisi ọma na-atọ ụtọ, aja nri e wetaara m.

¹⁹“Were ebule nke ọzọ, Erọn na ụmụ ya ndị ikom ga-ebikwasịkwa ya aka nʼisi. ²⁰Gbuo ebule ahụ, were ụfọdụ nʼime ọbara ya, ma tee ya na nso ntị aka nri Erọn, na nso ntị aka nri ụmụ ya ndị ikom, na isi mkpịsị aka nri ha na isi mkpịsị ụkwụ nri ha, ma fesaa ọbara fọdụrụ nʼakụkụ niile nke ebe ịchụ aja ahụ. ²¹Were ụfọdụ nʼime ọbara dị nʼelu ebe ịchụ aja ahụ na ụfọdụ nʼime mmanụ otite ahụ, ma fesaa ha nʼahụ Erọn na nʼuwe ya, nakwa nʼahụ ụmụ ya ndị ikom na nʼuwe ha, ya na ha. Mgbe ahụ ya na uwe ya ga-adị nsọ, ya na ụmụ ya ndị ikom na uwe ha. ²²Were abụba sitere nʼebule ahụ: ọdụ abụba ahụ, na abụba nke kpuchiri akụkụ ahụ ime, na akụkụ ogologo nke umeju, na akụrụ abụọ na abụba dị nʼahụ ha, na apata ụkwụ nri—nʼihi na ọ bụ ebule nke idozi nsọ maka ọrụ. ²³Were otu ogbe achịcha, na otu ogbe achịcha e ji mmanụ mee, na otu mbadamba achịcha site na nkata achịcha na-ekoghị eko dị nʼihu m. ²⁴Tinye ihe ndị a niile nʼaka Erọn na ụmụ ya ndị ikom, ma fefee ha dị ka aja mfefe nʼihu m. ²⁵Nata ha site nʼaka ha ma kpọọ ha ọkụ nʼelu ebe ịchụ aja ahụ nʼelu aja nsure ọkụ ahụ, isisi ọma na-atọ ụtọ nʼihu m. Ọ bụ aja nri nye m.

²⁶“Were obi ebule idozi nsọ nke Erọn ma fefee ya nʼihu m dị ka aja mfefe; ọ bụ oke gị. ²⁷Doo iche obi aja mfefe ahụ na apata ụkwụ e weliri elu site nʼebule idozi nsọ ahụ—oke ndị ahụ ruuru Erọn na ụmụ ya ndị ikom. ²⁸Ọ bụ nke Erọn na ụmụ ya ndị ikom dị ka oke na-adịgide site nʼaka ụmụ Izrel, nʼihi na ọ bụ onyinye—onyinye sitere nʼaja udo nke ụmụ Izrel, bụ onyinye ha nye m.

²⁹“Uwe nsọ Erọn ga-adịịrị ụmụ ya ndị ikom ndị ga-anọchi ya, ka e tee ha mmanụ ma doo ha nsọ maka ọrụ nʼime ha. ³⁰Nwa ya nke ga-anọchi ya dị ka onye nchụaja ma baa nʼụlọikwu nzukọ ije ozi nʼEbe Nsọ ahụ ga-eyi ha ụbọchị asaa.

³¹“Were ebule idozi nsọ ahụ ma sie anụ ya nʼebe dị nsọ. ³²Nʼọnụ ụzọ ụlọikwu nzukọ, Erọn na ụmụ ya ndị ikom ga-eri anụ ebule ahụ na achịcha dị na nkata ahụ. ³³Ha ga-eri ihe ndị ahụ e ji kpuchie mmehie nʼoge idozi ha nsọ na ido ha nsọ, ma ọ dịghị onye ọbịa ga-eri ya, nʼihi na ọ dị nsọ. ³⁴Ọ bụrụ na anụ maọbụ achịcha idozi nsọ ọbụla afọdụ ruo ụtụtụ, jiri ọkụ kpọọ ihe fọdụrụ. A gaghị eri ya, nʼihi na ọ dị nsọ.

³⁵“Meere Erọn na ụmụ ya ndị ikom ihe ndị a, dị ka ihe niile m nyere gị nʼiwu si dị. Were ụbọchị asaa doo ha nsọ maka ọrụ. ³⁶Kwa ụbọchị chụọ otu oke ehi dị ka aja mmehie maka mkpuchi mmehie. Mee ka ebe ịchụ aja ahụ dị ọcha site nʼikpuchiri ya mmehie, ma tee ya mmanụ iji doo ya nsọ. ³⁷Ruo ụbọchị asaa kpuchie ebe ịchụ aja ahụ mmehie ma doo ya nsọ. Mgbe ahụ ọ ga-adị nsọ karịsịa, ihe ọbụla metụrụ ya aka ga-adịkwa nsọ.

³⁸“Nke a bụ ihe ị ga-achụ nʼelu ebe ịchụ aja ahụ: ụmụ atụrụ abụọ nke gbara otu afọ, kwa ụbọchị, na-enweghị nkwụsị. ³⁹Chụọ otu nwa atụrụ nʼụtụtụ, chụọkwa nke ọzọ nʼuhuruchi. ⁴⁰Ya na nwa atụrụ nke mbụ, chụọ ihe dị ka lita abụọ nke ezigbo ụtụ ọka agwakọtara ya na ihe dị ka lita otu nke mmanụ a pịchapụtara, na ihe dị ka lita otu nke mmanya dị ka aja ihe ọṅụṅụ. ⁴¹Chụọ nwa atụrụ nke abụọ nʼuhuruchi, ya na otu aja mkpụrụ ọka na aja ihe ọṅụṅụ ahụ dị ka nke ụtụtụ, isisi ọma na-atọ ụtọ, aja nri nye m. ⁴²Ọ ga-abụ aja nsure ọkụ a na-achụ mgbe niile ruo ọgbọ unu niile nʼọnụ ụzọ ụlọikwu nzukọ nʼihu m, ebe m ga-ezute unu iji gwa unu okwu. ⁴³Nʼebe ahụ ka m ga-ezute ụmụ Izrel, ebube m ga-emekwa ka ebe ahụ dị nsọ. ⁴⁴Aga m edo ụlọikwu nzukọ na ebe ịchụ aja ahụ nsọ, ma doo Erọn na ụmụ ya ndị ikom nsọ ka ha jeere m ozi dị ka ndị nchụaja.

⁴⁵“Aga m ebikwa nʼetiti ụmụ Izrel ma bụrụ Nna ha. ⁴⁶Ha ga-amata na mụ onwe m bụ Nna ha, onye kpọpụtara ha site nʼIjipt ka m wee biri nʼetiti ha. Mụ onwe m bụ Nna ha.”