ዘፀአት 29

29 ¹“እኔን በክህነት እንዲያገለግሉኝ ለመቀደስ ይህን አድርግ፦ አንድ ወይፈንና ነውር የሌለባቸው ሁለት አውራ በጎች ውሰድ፤ ²እርሾ የሌለበት ኅብስት፣ በዘይት የተለወሱ ቂጣዎች፣ ዘይትም የተቀቡ ስስ ቂጣዎች ውሰድ፤ እነዚህ ሁሉ ከተሰለቀ ስንዴ ዱቄት ይሠሩ። ³በአንድ ቅርጫት ውስጥ አኑራቸው፤ ከወይፈኑና ከሁለቱ አውራ በጎች ጋራ በቅርጫቱ አቅርባቸው። ⁴አሮንንና ልጆቹን ወደ መገናኛው ድንኳን ደጃፍ አምጣቸው፤ በውሃም እጠባቸው። ⁵ልብሶቹንም ውሰድ፤ ለአሮን እጀ ጠባቡን፣ የኤፉዱን መጎናጸፊያ፣ ኤፉዱንና ኪሱን አልብሰው፤ በብልኃት የተሠራውን የኤፉዱን ዝናር አስታጥቀው። ⁶ጥምጥሙን በራሱ ላይ አድርግ፤ ቅዱሱንም ዘውድ በጥምጥሙ ላይ አኑር። ⁷የመቀባቱንም ዘይት ውሰድ፤ በራሱ ላይ አፍስስ፤ ቅባውም። ⁸ልጆቹንም አቅርብ፤ እጀ ጠባብ አልብሳቸው። ⁹አሮንንና ልጆቹን መቀነት አስታጥቃቸው፤ ቆባቸውንም አድርግላቸው። ክህነቱም በዘላለም ሥርዐት የእነርሱ ይሆናል። እንዲህም አሮንንና ልጆቹን ትሾማለህ።

¹⁰“ወይፈኑንም በመገናኛው ድንኳን ፊት አቅርብ፤ አሮንና ልጆቹ እጆቻቸውን በራሱ ላይ ይጫኑ። ¹¹ወይፈኑንም በመገናኛው ድንኳን ደጃፍ በፊቴ እረደው። ¹²ከወይፈኑም ደም ወስደህ በጣትህ በመሠዊያው ቀንዶች ላይ አድርግ፤ የቀረውንም ደም በመሠዊያው ግርጌ አፍስስ። ¹³አንጀቱን የሚከድነውን ሥብ ሁሉ፣ የጉበቱን መረብ፣ ሁለቱንም ኵላሊቶች ከስባቸው ጋራ ውሰድ፤ በመሠዊያው ላይ አቃጥላቸው። ¹⁴የወይፈኑን ሥጋ፣ ቈዳውንና ፈርሱን ከሰፈሩ ውጭ በእሳት አቃጥል። የኀጢአት መሥዋዕት ነው።

¹⁵“አንዱንም አውራ በግ ውሰድ፤ አሮንና ልጆቹ እጆቻቸውን በራሱ ላይ ይጫኑ። ¹⁶አውራ በጉንም እረድ፤ ደሙንም ወስደህ በመሠዊያው ዙሪያ ረጨው። ¹⁷አውራ በጉንም ቈራርጠው፤ አንጀቱንና ኰቴዎቹን እጠብ፤ ከብልቶቹና ከራሱ ጋራ አኑራቸው። ¹⁸ከዚያም አውራ በጉን ሙሉ በመሠዊያው ላይ አቃጥለው። ለእኔ የሚቀርብ የሚቃጠል መሥዋዕት ነው፤ ደስ የሚያሰኝ መዐዛ፣ ለእኔ የሚቀርብ የእሳት መሥዋዕት ነው።

¹⁹“ሁለተኛውንም አውራ በግ ውሰድ፤ አሮንና ልጆቹ እጆቻቸውን በራሱ ላይ ይጫኑ። ²⁰አውራ በጉንም እረድ፤ ከደሙም ወስደህ በአሮን ቀኝ ጆሮ ጫፍ ላይ፣ በልጆቹም ቀኝ ጆሮ ጫፍ ላይ፣ በቀኝ እጃቸው አውራ ጣትና በቀኝ እግራቸው አውራ ጣት ላይ አድርግ፤ የቀረውንም ደም በመሠዊያው ዙሪያ ረጨው። ²¹በመሠዊያው ላይ ካለው ደምና ከመቀባቱ ዘይት ወስደህ በአሮንና በልብሶቹ ላይ፣ ከእርሱም ጋራ በልጆቹና በልብሶቻቸው ላይ ረጭ። እርሱና ልብሶቹ፣ ልጆቹም ከልብሶቻቸው ጋራ የተቀደሱ ይሆናሉ። ²²ከአውራ በጉም ሥብ ውሰድ፤ ይኸውም ስቡን ጭራ፣ አንጀቱን የሚከድነውን ሥብ፣ የጉበቱን ረጅም መረብ፣ ሁለቱንም ኵላሊቶች ከስባቸው ጋራና ቀኙን ታፋ ውሰድ፤ ይህ የሹመት አውራ በግ ነውና። ²³በፊቴ ካለው እርሾ ከሌለበት የኅብስት ቅርጫት አንድ እንጀራ፣ አንድ በዘይት የተለወሰ ቂጣና አንድ ስስ ቂጣ ውሰድ። ²⁴እነዚህን ሁሉ በአሮንና በልጆቹ እጆች ላይ አኑር፤ በፊቴም የሚወዘወዝ መሥዋዕት አድርገህ አወዛውዛቸው። ²⁵ከእጆቻቸውም ተቀብለህ በመሠዊያው ላይ ከሚቃጠለው መሥዋዕት በላይ አቃጥላቸው፤ በፊቴ ደስ የሚያሰኝ መዐዛ ነው። ለእኔ የእሳት መሥዋዕት ነው።

²⁶“የአሮንን የሹመት አውራ በግ ደረት ውሰድ፤ በፊቴም የሚወዘወዝ መሥዋዕት አድርገህ አወዛውዘው፤ ይህ ድርሻህ ነው። ²⁷የተወዘወዘውንም ደረትና ከሹመቱ አውራ በግ የተነሣውን ታፋ ለይ፤ ይህ ለአሮንና ለልጆቹ ድርሻ ነው። ²⁸ይህም ከእስራኤል ሕዝብ የሚገኝ የዘላለም ድርሻ ሆኖ የአሮንና የልጆቹ ነው፤ ይህ የሚቀርብ መባ ነውና፤ ከእስራኤል ሕዝብ የኅብረት መሥዋዕት የሚቀርብ መባ፣ ለእኔ የሚያቀርቡት መባ ነው።

²⁹“የአሮን ቅዱሳን ልብሶች ከእርሱ በኋላ ለልጆቹ ይተላለፋሉ፤ በእነርሱም ይቀቡና ይሾማሉ። ³⁰ከእርሱም በኋላ በክህነት የሚተካውና በቅዱሱ ስፍራ ለማገልገል ወደ መገናኛው ድንኳን የሚገባው ልጅ ሰባት ቀን ይልበሳቸው።

³¹“የሹመቱንም አውራ በግ ውሰድ፤ ሥጋውንም በተቀደሰ ስፍራ አብስል። ³²አሮንና ልጆቹ የአውራ በጉን ሥጋና በቅርጫቱ ያለውን ኅብስት በመገናኛው ድንኳን ደጃፍ ይበሉ። ³³በሚሾሙበትና በሚቀደሱበት ጊዜ ማስተስረያ የሆነውን ይበሉ፤ ቅዱስ ነውና እንግዳ ሰው አይብላው። ³⁴ከሹመቱም ሥጋ ወይም ኅብስት እስከ ጥዋት የተረፈ ቢኖር፣ የቀረውን በእሳት አቃጥል። ቅዱስ ነውና አይበላም።

³⁵“ላዘዝሁህ ሁሉ መሠረት ለአሮንና ለልጆቹ እንዲሁ አድርግ። እነርሱንም ለመሾም ሰባት ቀን ውሰድ። ³⁶ዕለት ዕለትም ለማስተስረያ የኀጢአት መሥዋዕት አድርገህ አንድ ወይፈን አቅርብ። ለመሠዊያውም ማስተስረያ በማድረግ አንጻው፤ ለመቀደስም ቅባው። ³⁷ለሰባት ቀን ለመሠዊያው ማስተስረያ አድርግ፤ ቀድሰውም። ከዚያም እጅግ ቅዱስ ይሆናል፤ የሚነካውም ሁሉ የተቀደሰ ይሆናል።

³⁸“በመሠዊያው ላይ የምታቀርበው ይህ ነው፦ ዕለት ዕለት ዕድሜያቸው አንድ ዓመት የሆነ ሁለት ጠቦቶች ሳታቋርጥ አቅርብ። ³⁹አንዱን ጠቦት በጥዋት፣ ሁለተኛውንም በመሸ ጊዜ አቅርብ። ⁴⁰ከመጀመሪያው ጠቦት ጋራ አንድ ሩብ ጋሎን ያህል በተጨመቀ ዘይት የተለወሰ ሁለት ሩብ ጋሎን ያህል የተሰለቀ ዱቄት፣ የመጠጥ መባም አድርገህ አንድ ሩብ ጋሎን ያህል የወይን ጠጅ አቅርብ። ⁴¹ሁለተኛውን ጠቦት በመሸ ጊዜ፣ እንደ ጥዋቱ ዐይነት የእህልና የመጠጥ መባ አድርገህ አቅርብ፤ ደስ የሚያሰኝ መዐዛ፣ ለእኔ የእሳት መሥዋዕት ነው። ⁴²ይህ በመገናኛው ድንኳን ደጃፍ በፊቴ ለትውልዳችሁ የሚቀርብ ዘውታሪ የሚቃጠል መሥዋዕት ነው፤ በዚያም ከአንተ ጋራ እነጋገር ዘንድ ከአንተ ጋራ እገናኛለሁ። ⁴³በዚያም ከእስራኤላውያን ጋራ እገናኛለሁ፤ ስፍራውም በክብሬ ይቀደሳል። ⁴⁴መገናኛውን ድንኳንና መሠዊያውን እቀድሳለሁ፤ አሮንንና ልጆቹንም እኔን በክህነት እንዲያገለግሉኝ እቀድሳለሁ።

⁴⁵“በእስራኤል ሕዝብ መካከል እኖራለሁ፤ አባታቸውም እሆናለሁ። ⁴⁶በመካከላቸው እኖር ዘንድ ከግብፅ ያወጣኋቸው እኔ አባታቸው እንደ ሆንሁ ያውቃሉ። እኔ አባታቸው ነኝ።”