Kutoka 29

29 ¹"Ili kuwaweka wakfu wawe makuhani wanaonitumikia, fanya hivi: chukua ng'ombe dume mmoja kijana na kondoo dume wawili wasio na dosari, ²na mkate usiotiwa chachu, maandazi yasiyotiwa chachu yaliyokandwa kwa mafuta, na mikate myembamba isiyotiwa chachu iliyopakwa mafuta, vyote vikitengenezwa kwa unga mwema wa ngano. ³Uviweke katika kikapu kimoja na uvilete ndani yake, pamoja na yule ng'ombe dume na wale kondoo dume wawili. ⁴Kisha umlete Haruni na wanawe kwenye mlango wa hema ya kukutania na uwaoshe kwa maji. ⁵Chukua yale mavazi na umvike Haruni kanzu, na joho la naivera, na naivera, na kifuko cha kifuani, na umfunge kwa ule mshipi wa naivera uliofumwa kwa ustadi. ⁶Weka kilemba kichwani mwake na uweke ile taji takatifu juu ya kilemba. ⁷Kisha chukua mafuta ya kutiwa wakfu, uyamimine juu ya kichwa chake, na umtie mafuta. ⁸Walete wanawe mbele na uwavike kanzu. ⁹Wafunge mishipi Haruni na wanawe na uwavike vilemba. Ukuhani ni wao kwa amri ya milele. Hivyo utamweka wakfu Haruni na wanawe.

¹⁰"Mlete yule ng'ombe dume mbele ya hema ya kukutania; naye Haruni na wanawe wataweka mikono yao juu ya kichwa chake. ¹¹Umchinje yule ng'ombe dume mbele yangu kwenye mlango wa hema ya kukutania. ¹²Chukua sehemu ya damu ya yule ng'ombe dume na kwa kidole chako uitie juu ya pembe za madhabahu; na iliyobaki uimwage chini ya madhabahu. ¹³Chukua mafuta yote yanayofunika viungo vya ndani, na shahamu iliyo juu ya ini, na figo mbili pamoja na mafuta yake, na uviteketeze juu ya madhabahu. ¹⁴Lakini nyama ya yule ng'ombe dume, na ngozi yake, na mavi yake, uviteketeze kwa moto nje ya kambi. Ni sadaka ya dhambi.

¹⁵"Chukua kondoo dume mmoja; naye Haruni na wanawe wataweka mikono yao juu ya kichwa chake. ¹⁶Umchinje yule kondoo dume, uichukue damu yake, na uinyunyize pande zote za madhabahu. ¹⁷Umkate yule kondoo dume vipande, uoshe viungo vyake vya ndani na miguu yake, na uviweke pamoja na vile vipande vyake na kichwa chake. ¹⁸Kisha umteketeze yule kondoo dume mzima juu ya madhabahu. Ni sadaka ya kuteketezwa kwangu, harufu ya kupendeza, sadaka ya kutolewa kwangu kwa moto.

¹⁹"Chukua yule kondoo dume wa pili, naye Haruni na wanawe wataweka mikono yao juu ya kichwa chake. ²⁰Umchinje yule kondoo dume, uchukue sehemu ya damu yake, na uitie juu ya ncha ya sikio la kuume la Haruni, na juu ya ncha za masikio ya kuume ya wanawe, na juu ya vidole gumba vya mikono yao ya kuume, na juu ya vidole gumba vya miguu yao ya kuume, kisha uinyunyize damu iliyobaki pande zote za madhabahu. ²¹Chukua sehemu ya ile damu iliyo juu ya madhabahu na sehemu ya mafuta ya kutiwa wakfu, na uwanyunyizie Haruni na mavazi yake, na wanawe na mavazi yao pamoja naye. Ndipo yeye na mavazi yake watakuwa watakatifu, pamoja na wanawe na mavazi yao. ²²Chukua mafuta ya yule kondoo dume: mkia wenye mafuta, na mafuta yanayofunika viungo vya ndani, na shahamu iliyo juu ya ini, na figo mbili pamoja na mafuta yake, na paja la kuume—kwa maana ni kondoo dume wa kuwekwa wakfu. ²³Chukua mkate mmoja, na andazi moja lililokandwa kwa mafuta, na mkate mmoja mwembamba, kutoka kile kikapu cha mikate isiyotiwa chachu kilicho mbele yangu. ²⁴Weka vyote hivi mikononi mwa Haruni na mikononi mwa wanawe, na uvitikise kuwa sadaka ya kutikiswa mbele yangu. ²⁵Kisha uvichukue kutoka mikononi mwao na uviteketeze juu ya madhabahu juu ya ile sadaka ya kuteketezwa, kuwa harufu ya kupendeza mbele yangu. Ni sadaka ya kutolewa kwangu kwa moto.

²⁶"Chukua kidari cha yule kondoo dume wa kuwekwa wakfu wa Haruni na ukitikise kuwa sadaka ya kutikiswa mbele yangu; nayo itakuwa sehemu yako. ²⁷Kitenge kidari cha sadaka ya kutikiswa na paja la sadaka ya kuinuliwa kutoka kwa yule kondoo dume wa kuwekwa wakfu—sehemu za Haruni na wanawe. ²⁸Nayo ni mali ya Haruni na wanawe kuwa fungu la daima kutoka kwa wana wa Israeli, kwa maana ni sadaka ya kuinuliwa—sadaka ya kuinuliwa kutoka kwa sadaka za amani za wana wa Israeli, sadaka yao ya kuinuliwa kwangu.

²⁹"Mavazi matakatifu ya Haruni yatakuwa ya wanawe baada yake, ili watiwe mafuta na kuwekwa wakfu ndani yake. ³⁰Yule mwana atakayekuwa kuhani mahali pake na kuingia katika hema ya kukutania ili kutumika katika Mahali Patakatifu atayavaa kwa siku saba.

³¹"Chukua yule kondoo dume wa kuwekwa wakfu na uitokose nyama yake mahali patakatifu. ³²Katika mlango wa hema ya kukutania, Haruni na wanawe wataila nyama ya yule kondoo dume na ule mkate uliomo katika kikapu. ³³Watakula vile vilivyofanya upatanisho wakati wa kuwekwa kwao wakfu na kutakaswa kwao, lakini mgeni asivile, kwa sababu ni vitakatifu. ³⁴Kama nyama yoyote ya kuwekwa wakfu au mkate ukibaki hata asubuhi, uteketeze kilichobaki kwa moto. Havitaliwa, kwa sababu ni vitakatifu.

³⁵"Mtendee Haruni na wanawe hivi, ukifuata yote niliyokuamuru. Chukua siku saba kuwaweka wakfu. ³⁶Kila siku utoe ng'ombe dume kuwa sadaka ya dhambi kwa ajili ya upatanisho. Uitakase madhabahu kwa kuifanyia upatanisho, na uitie mafuta ili kuiweka wakfu. ³⁷Kwa siku saba fanya upatanisho kwa ajili ya madhabahu na uiweke wakfu. Ndipo itakuwa takatifu sana, na kila kitu kinachoigusa kitakuwa kitakatifu.

³⁸"Hiki ndicho utakachotoa juu ya madhabahu: wana-kondoo wawili wenye umri wa mwaka mmoja kila siku, pasipo kukosa. ³⁹Utoe mwana-kondoo mmoja asubuhi na yule mwingine wakati wa jioni. ⁴⁰Pamoja na mwana-kondoo wa kwanza utoe kama robo mbili za unga mwema uliokandwa kwa robo moja ya mafuta yaliyokamuliwa, na kama robo moja ya divai kuwa sadaka ya kinywaji. ⁴¹Utoe yule mwana-kondoo wa pili wakati wa jioni pamoja na sadaka ile ile ya nafaka na sadaka ya kinywaji kama ya asubuhi, kuwa harufu ya kupendeza, sadaka ya kutolewa kwangu kwa moto. ⁴²Ni sadaka ya kuteketezwa ya daima kwa vizazi vyenu kwenye mlango wa hema ya kukutania mbele yangu, mahali ambapo nitakutana nanyi ili kusema nanyi. ⁴³Hapo nitakutana na wana wa Israeli, na utukufu wangu utapatakasa mahali pale. ⁴⁴Nitaiweka wakfu hema ya kukutania na madhabahu, na nitawaweka wakfu Haruni na wanawe wanitumikie kuwa makuhani.

⁴⁵"Nami nitakaa kati ya wana wa Israeli na nitakuwa Baba yao. ⁴⁶Nao watajua ya kuwa mimi ni Baba yao, niliyewatoa katika nchi ya Misri ili nipate kukaa kati yao. Mimi ni Baba yao."