Haleluyatap Kipsengwet
Wolei kipsengwet ng'emetennyi eng' haleluya che po Kwandanyo ak ng'olyoot ne le kanyoonu amitwogigap tunisietap Aarwet. Imache Johana kolas angeet ago kiteenji. Yeityo koyaatagei kipsengwet: chiito ne laanyei ne kiguure Imanat ak Imanda, ne kaga kityo korotiik ngoryennyi. Kenamei tyong'indet ak maot ne lembenut.
19 1Kingo let nooto, ka agas eng' kipsengwet kiit ne uu polatetap tuiyet ne oo ne waach eng' kutit ne oo, kole: “Haleluya! Po Kwandanyo kayaataet ak toroornatet ak kimnateet, a a v1 Haleluya ko mwaei, “Olas Kwandanyo” — waagaatap tuiyet ne oo ne po lugosyegap kipsengwet. 2amu kirwoogutikyik ko che po iman ak imanda; kagorwook chepkugoniot ne oo ne ki kong'em ng'wony eng' koruiyeennyi, ak kagoyaaktae korotiigap otwogikyik eng' ineendet.”
3Ak kowaachei kogeny, kole: “Haleluya! Togostoi iyeto ne punu ineendet koigeny ak koigeny.” 4Yeityo ki ing'uruuk poisyek che tiptem ak ang'wan ak tuguuk che saptos ang'wan, kolas Kwandanyo ne tebee ng'echereetap laitornatet, koleen: “Amen! Haleluya!”
5Ki mwa kutit ne punu ng'echereet, kole: “Olasu Kwandanyo, okweek otwogikyik tugul, che iywei ineendet, che mengeechen ak che eecheen.”
6Yeityo ka agas kiit ne uu polatetap tuiyet ne oo, ne uu tuleetap peek che chaang' ak ne uu toroombenetap tuugeet ne oo, kowaachei, kole: “Haleluya! Amu laitorani Kiptaiyat Kwanda Ne po Kamuktaet. 7Kiboiboitu ak kikagasegei, ak kigoochi ineendet toroornatet, amu kanyoonu tunisietap Aarwet, ak kagechobkei murerennyi. 8Kigoochin ineendet kitani ne karaaran kolaach, ne leel ak ne tiliil”—amu kitani ne karaaran ko imandaetap piigap Kwandanyo che tiliileen.
9Ki leenji angeet, “Sir: Boiboen che kiguur koba amitwogigap tunisietap Aarwet.” Yeityo kole, “Ng'aleechu ko ng'aleegap Kwandanyo che po iman.”
10Ka atiiny ng'wony eng' keelyekyik si alasu ineendet. Ago koleenji anee, “Matiyai! Aa otwogindet ne kiboiten inyee ak tupchoguk che tinyei kaboorunetap Jeso. Ilas Kwandanyo! Amu kaboorunetap Jeso ko kabuusetap maotyet.”
Kowendi Ne Kiyani ak Ne po Iman
11Yeityo ka ageer kipsengwet koyaatak, ak paraisiit ne leel! Ne laanyei ineendet—Jeso—kiguure Ne Kiyani ak Ne po Iman, ak irwookyi ak koyaei lugeet eng' imanda. b b v11 Ne laanyei paraisiit ne leel ko Jeso — ne kiguure eng' ng'aleechu tugul Ne Kiyani ak Ne po Iman, Ng'olyootap Kamuktaindet, ak Laitoryatap laitorik ak Kiptaiyatap kiptainik. Kowei kogeny eng' toroornatet si kolaitoran. 12Konyekyik che uu liplibenetap maat, mi eng' metinnyi kuutwek che chaang', ak kaina ne kisir ne ngen ineegei kityo. 13Laach ngoryeet ne ki kiile korotiik, ak kainennyi ko Ng'olyootap Kwandanyo. 14Ak ki isup ineendet lugosyegap kipsengwet, che kilaachi kitani ne karaaran, che leelach ak che tiliileen, eng' paraisisyek che leelach. 15Manda eng' kutinnyi rotweet ne tingiin si kobar pororyosyek; laitorane icheek eng' kirokto ne po iron. Toyei ole kitue sabibuk ne po nereegegap ng'atuutyetap Kwandanyo, Ne po Kamuktaet. 16Kisir eng' ngoryennyi ak eng' moennyi kaina: Laitoryatap laitorinik ak Kiptaiyatap kiptainik.
17Ka ageer angeet ne tononot eng' asiista, ne waach eng' kutit ne oo toriitik tugul che tirireni eng' parak, kole: “Obwa, otuiye agobo amitwogik che eecheen che po Kwandanyo, 18si oam penyeegap laitorinik, penyeegap pounik, penyeegap murenik che kiimeen, penyeegap paraisisyek ak penyeegap che laanyei icheek, penyeegap piik tugul—che ityagat ak che otwogin, che mengeechen ak che eecheen. 19Ka ageer tyong'indet, ak laitorinigap ng'wony, ak lugosyekwak che ki tuiyo si koyai lugeet ak ne laanyei paraisiit ak lugosyeennyi.” 20Kinam tyong'indet, kobooto maotyondet ne lembech ne ki yai kaboorunoik eng' taitap ineendet, ne ki igen eng' icheek tugul che ki nam koroitap tyong'indet ak kolas imagennyi. Kiwiirchi icheek aeng'u che sabe koba araraita ne lale maat ak koik che laldos. 21Kibar alak eng' rotweet ne manda eng' kutitap ne laanyei paraisiit, ak ki am toriitik tugul penyeekwak kot kong'aam.