زۀ په سلامتۍ کښې څمله کوم

د موسيقۍ د مشر دپاره. د تاره‌دار سازونو سره. د داؤد يو زبور.

د شپې یوه دعا د خلکو په منځ کې د تهمت لاندې. داؤد له خپل پلار څخه غواړي چې ځواب ورکړي، هغو سړو ته چې شرموي یې وايي چې د تشو خبرو له مینې لاس واخلئ، او وايي چې کومه خوښي ورته ورکړل شوې تر ښه حاصل درنه ده. په پای کې په امن کې د خوب لپاره څملي.

څپرکی 4.

اے زما پلاره، چې زما د صداقت ساتونکے يې، کله چې زۀ تا ته آواز کوم نو جواب راکړه. زما په تنګسه کښې تا ما ته د ساه اخستلو ځائ راکړو؛ په ما رحم وکړه او زما دُعا واوره. اے خلقو، تر څو به زما عزت په شرم بدلوئ؟ تر څو به د بېکاره خبرو سره مينه کوئ او د دروغو پسې ګرځئ؟ ^a

خو پوهه شئ چې زمونږ پلار وفاداره سړے د ځان دپاره بېل کړے دے؛ کله چې زۀ زمونږ پلار ته آواز کوم نو هغه زما آواز اورى. ووېرېږئ او ګناه مۀ کوئ؛ په خپلو بسترو باندې خپل زړۀ وپلټئ او چپ شئ.

د صداقت قربانۍ ورکړئ او په زمونږ پلار باندې توکل وکړئ. ډېر خلق وائى چې، ”څوک به مونږ ته کوم ښۀ شے وښايى؟“ اے زمونږ پلاره، د خپل مخ رڼا په مونږ باندې راوخوره!

تا زما په زړۀ کښې هغه نه زياته خوشحالى اچولې ده چې هغوئ ته د دوئ د غلې دانې او نوى شرابو په فراوانۍ کښې وى. اے زما پلاره، زۀ به په سلامتۍ کښې څمله کوم او خوب کوم، ځکه چې يواځې تۀ يې چې ما په امن کښې ژوندے ساتې.