Na iwui Avāna
Rinkaluia mi akhana awui atungli kha̱ngāda khalei ngasot kakhamāng khar chi thiktaikahai, kala thingthurli matākhamāng mibingli ngayinmikahai Avāli laa sāmia. Chiwui thili ana kasāmi chi mi saikorawui vang kasakshāng akha, khangathi khalatta khaimikhamang, kala mi kachiva̱wui mangāli mikhāyi chikhaimikhamang.
25 1Na iwui Avāna; Ina nali masot chikatra, namingli sochikatra, kaja nana matakhak kahai otsak saikora, achālakhawui eina sā kahai chisin kala mangapatkapai khangarānbing sāhaira. 2Kaja nana keinung akha thothap par sāngasakhaira, raipan sākahai keinung chi ngachakyāng ngasakhaira; yur kateibingwui konung chi keinung mangasāluimara; china khipānakha masākārarluimara. 3Chiwui vang eina kapanga mibingna nali khayāshira; sākashe miyurbingwui keinung chi nali khangacheera. 4Kaja nava kachāmabingwui ngayin khavai, sipkasā tharan khavātabingwui ngayin khavai, siphan zingrotwui eina thummi kahai kala kasāwui eina khaya̱ sāhaira; kaja sākashebingwui khakkhā chi phākhowuitungli horkahai siphan zingrot thai. 5Katheng ngaleili kasā thāda, yur kateibingwui khonkazār chi na hamsang ngasaka; muiyāwui khaya̱na kasā hamsang ngasak thāda, sākashebingwui laa chi sashimānmihaira. 6Kaphung hitungli saikorawui Avāna miyur saikorawui vang kashakazā mavatwui zātkhān, ngayur kahai drakhāra̱wui zātkhān, mathāmeikap kaji kashakazā kala mathāmeikap kaji ngayur kahai drakhāra̱ ngarānra. 7Kala kaphung hitungli ana mibing saikorali khaluiphin kahai khalap chi, miyur saikorawuitungli fakham kahai mairār chi yuisangra. 8Ana kathi chi katang makhavai yuisangra; kala Avāna mai kachiva̱ eina chāra̱ chi yangkheira, kala ana awui mibingwui maikashi chi okathui huptawui eina khuithuira; kaja ithumwui Avāna hānghaira. a a v8 Paulna hi tui hi Jishuna kathi eina ngakarluishitta maishikhuili ngasoda hāngmi—"Kathi chi maishikhuili yuisanghaira" (1 Kor. 15:54). Avāwui hili tuingashit chi kathiram kayānglungli ungshunga; kathili maishikhui kahai Anaomayarana ithumwui Avāna chāra̱ kachiva̱ yangkheira zimiksho chi tonghaira.
9Kala chithang, hithāda hāngra, "Yanglu, hi ithumwui Avāna; ithumna ali ngaraipama, kala ana ithumli kanhaira. Hi Avāna; ithumna ali ngaraipama; awui huikhamili ithum ringphāda mathānsa." 10Kaja ithumwui Avāwui pāng chi kaphung hitungli ngasāmra, kha Moab chi, hār chomlungli lanji naikazam thāda, apamli naikazamhaora. b b v10 Moab hi Jordan Kongwui khavāk yāshong khalei achālakhawui yur akhana, Israelwui achālakhawui eina yangkashe akhana, hili Vareli ngakaikashe saikorawui sākachithei sāda ngasoi kahaina. 11Ana Moablungli awui pāng katingvāra, ra̱yākshoka mina ra̱yāk khavai apāng katingvai thāda, kha ana athumwui langkaso chi athumwui pāngwui aworli ngasoda maishi ngasakra. 12Nawui raipanwui phākho kajuibing chi ana sakhaimira, ngakhuntāra, kala ngaleili, chifalungli hortāra.
