1 Thotrinchān 4

4 ¹Judahwui ara̱-azā: Perez, Hezron, Carmi, Hur, kala Shobal. ²Shobalwui nao Re-aiahna Jahathwui avāva̱na; Jahathna Ahumai eina Lahadwui avāva̱na. Athum hi Zorathnaobingwui shimkhurbingna. ³Hibing hi Etamwui naomayarabingna: Jezreel, Ishma, kala Idbash; kala azarva̱wui ming Hazzelelponi hoi. ⁴Penuel chi Gedorwui avāva̱na, kala Ezer chi Hushahwui avāva̱na. Hibing hi Epharathahwui naochizai, Bethlehemwui avāva̱ Hurwui naobingna. ⁵Tekoawui avāva̱ Ashhurwui preiva̱ khani, Helah eina Naarah lei. ⁶Naarahna Ahuzzam, Hepher, Temeni, kala Haahashtari athumli pharai. Hibing hi Naarahwui naomayarabingna. ⁷Helahwui naomayarabing: Zereth, Zohar, kala Ethnan. ⁸Kozna Anub eina Zobebah, kala Harumwui nao Aharhelwui shimkhurbingli pharai.

⁹Jabezna achinā ngarāli khayā kāmeida sai; ava̱va̱na ali Jabez hoi, hānga, "Kachot eina ali pharāhaira." ^a a v9 Jabez kaho aming hi "kachot" kaho tuila thada nganāhai—chi awui naosak atamli ava̱va̱na kahāng tui chingna.

¹⁰Jabezna Israelwui ithumwui Avāli khangakao: "Iyavo, nana kachangkhat eina ili somida iwui thari haksangmisi kaje! Nawui pāng ilila leida, sākashi eina ili yangmilu, chieina ina kachot matheimara." Kala ithumwui Avāna awui pokhangai mihaira.

¹¹Shuhahwui achinā Chelubna Mehirwui avāva̱na, ana Eshtonwui avāva̱na. ¹²Eshtonna Beth-rapha, Paseah, kala Ir-nahashwui avāva̱ Tehinnahwui avāva̱na. Hibing hi Recahwui mibingna. ¹³Kenazwui naomayarabing chi Othni-el kala Seraiahna; kala Othni-elwui naomayarabing chi Hathath kala Meonothaina. ¹⁴Meonothaina Ophrahwui avāva̱na. Seraiahna Joabwui avāva̱na, Joab hi them kathemwui tampāk Ge-harashimwui avāva̱na, kaja chili kapambing them kathembingna. ¹⁵Jephunnehwui naomayara Calebwui naomayarabing: Iru, Elah, kala Naam; kala Elahwui nao: Kenaz. ¹⁶Jehallelelwui naomayarabing: Ziph, Ziphah, Tiria, kala Asarel. ¹⁷Ezrahwui naomayarabing: Jether, Mered, Epher, kala Jalon. Meredwui preiva̱na Mariam, Shammai, kala Eshtemoawui avāva̱ Ishbah athumli pharai. ¹⁸Awui preiva̱ Judahpava̱na Gedorwui avāva̱ Jered, Socowui avāva̱ Heber, kala Zanoahwui avāva̱ Jekuthiel pharai. Hibing hi Meredna kakhui Pharaohwui naongalāva̱ Bithi-ahwui naomayarabingna. ¹⁹Nahamwui azara̱ Hodiahwui preiva̱wui naomayarabing hi Garmpa Keilah eina Maacathpa Eshtemoawui avāva̱na. ²⁰Shimonwui naomayarabing: Amnon, Rinnah, Ben-hanan, eina Tilon. Ishiwui naomayarabing: Zoheth kala Ben-zoheth. ²¹Judahwui nao Shelahwui naomayarabing: Er chi Lecahwui avāva̱, Laadah chi Mareshahwui avāva̱, kala Beth-ashbeali khamanaka kachon sākabingwui shimkhurbing; ²²Jokim, Cozebawui mibing, Joash, kala Saraph, athum Moabli munga, chiwui thili Bethlehemli latunga. Hibing hi achālakhawui kashānbingna. ²³Hibing hi Netaim eina Gederahli kapam belā sākabingna; awungawui vang otsak khavai chili pama.

Simeonwui Naotunbing: Athumwui Shimkhur kala Pamkhavaibing

²⁴Simeonwui naomayarabing: Nemuel, Jamin, Jarib, Zerah, kala Shaul; ²⁵Shallum chi awui naona, Mibsam chi Shallumwui naona, Mishma chi Mibsamwui naona. ²⁶Mishmawui naomayara Hammuelna, Hammuelwui nao Zaccurna, kala Zaccurwui nao chi Shime-i hoi. ²⁷Shime-ina naomayara tharāda tharuk pharai, kala naongalāva̱ tharuk pharai; kha achinā ngarāwui nao kateokha leida, athumwui shimkhur saikora Judahwui mibing thāda machungthuwa. ²⁸Athumna Beer-sheba, Moladah, Hazar-shual, ²⁹Bilhah, Ezem, Tolad, ³⁰Bethuel, Hormah, Ziklag, ³¹Beth-marcaboth, Hazar-susim, Beth-biri, kala Shaaraimli pama. Hibing hi David awunga masāranglakha eina tangda athumwui keinungbingna. ³²Athumwui kuimareida khalei kha̱bing chiya Etam, Ain, Rimmon, Tochen, eina Ashan, keinung phangā, ³³kala keinung hili kuimareida Baal vāshungda kha̱bing saikora lei. Hi athumwui pamkhavaina, kala athumna kachichāwui naotun lairikli kapisanga. ³⁴Meshobab, Jamlech, Amaziahwui nao Joshah, ³⁵Joel, Joshibiahwui naomayara Jehu, Seraiahwui nao, Asielwui nao, ³⁶Eli-o-enai, Jaakobah, Jeshohaiah, Asaiah, Adi-el, Jesimiel, Benaiah, ³⁷kala Shiphiwui naomayara Ziza, Allonwui naomayara, Jedaiahwui naomayara, Shimriwui naomayara, Shemaiahwui naomayarana. ³⁸Amingbing eina kapi kahai mibing hi athumwui shimkhurbingwui wungva̱bing china; kala athumwui avāva̱ ngarāwui shimkhurbing kachungkha chungmeihaowa. ³⁹Athumna athumwui yaobingwui vang seihomphung phāda, tampākwui zingshoshong khalei Gedorwui khāmongli vai. ⁴⁰Athumna seihomphung khamathā kala mavātlak akha samphanga; ngalei chi shaptaida, va̱ri eina chingri kahai ngaleina; kaja rida chili kapāna mibing hi Hamwui einana. ⁴¹Aming eina kapisang kahai hibing hi Judahwui awunga Hezekiahwui thotli rāhaira, Hamnaobingwui kachonshimbing eina chili samphang kahai Meunbingli ngarara, athumli saikora sākazammiserhaida, aja rāshungda athumwui pamli sompama; kaja chi athumwui yaobingwui vang seihomphung khalei apamna. ⁴²Simeonnaobingwui eina mi shāphangā, Ishiwui naomayarabing Pelatiah, Ne-ariah, Rephaiah, kala Uzzielna thānda, Seir Kaphungli vai. ⁴³Athumna Amaleknaobingwui shāk kahai ringda khalei chi sāthatserhaida, aja rāshungda chili apama.