1 Thotrinchān 5

5 ¹Israelwui naochizai Reubenwui naomayarabing—a naochizai kachangkhatna, kha ana avāva̱wui petli sākhamāng kahaiwui vang, awui khararpam Israelwui nao Josephwui naomayarabingli mihaowa; chieina a miun lairikli naochizaina da makapihaimana. ²Judahna achinā ngarāwui lungli nganingkhui kahai, kala awui eina khamunga akha shoklala, khararpam chi Josephwui ngasāhaowa. ³Reuben hi Israelwui naochizaina; awui naomayarabing chi Hanok, Pallu, Hezron kala Carmi. ⁴Joelwui naomayarabing: awui nao Shemaiah, awui nao Gog, awui nao Shime-i, ⁵awui naomayara Micah, awui naomayara Re-aiah, awui naomayara Baal, ⁶kala awui nao Beerah, ali Assyriawui awunga Tiglath-pileserna tukvāhaowa; a Reuben shangwui kathāna sai. ⁷Athumwui shimkhurwui athishurda mithot lairikli kapi kahai thāda, awui achinābing chiya: Je-iel kathāna, Zechariah, ⁸kala Joelwui nao, Shemawui nao, Azazwui nao Bela. Athumna Aroerli, kala Nebo eina Baal-meon vāshungda pama. ⁹Athumna zingshoshong khavāda, Euphrates kong vāshungda katingkai lamhāngwui ayar vāshungda pama; kaja athumwui sha̱kei Gileadli sorngasaida mataisanghaowa.

¹⁰Saulwui thotli athumna Hagrinaobingli rai rātai, athum china athumwui pāngli pitai; kala athumna Gileadwui zingshoshong khalei apam katongali Hagrinaobingwui kachonshimli pama.

Gadwui Naomayarabing Bashan Ngaleili

¹¹Gadwui naomayarabingna athumli ngasunkhui, Bashan ngaleili Salecah vāshungda pama: ¹²Joel kathāna, Shapham kakhanena, kala Janai eina Shaphat Bashanli pama. ¹³Avāva̱ ngarāwui shimlak athishurda athumwui achinābing chiya: Michael, Meshullam, Sheba, Jorai, Jacan, Zia, eina Eber, athum shinina. ¹⁴Hibing hi Abihailwui naomayarabingna. Abihail hi Huriwui nao, Huri hi Jaro-ahwui nao, Jaro-ah hi Gileadwui nao, Gilead hi Michaelwui nao, Michael hi Jeshishaiwui nao, Jeshishai hi Jahdowui nao, Jahdo hi Buzwui naona. ¹⁵Guniwui nao Abdielwui nao Ahi chi athumwui avāva̱ ngarāwui shimlakwui kathāna sai. ¹⁶Athumna Gileadli, Bashanli kala chiwui kha̱bingli, kala Sharonwui seihomphung katongali, athumwui thari vāshungda pama. ¹⁷Hibing katonga hi Judahwui awunga Jotham eina Israelwui awunga Jeroboamna mungda thotli mithot lairikli kapi kahaina.

¹⁸Reubennaobing, Gadnaobing kala Manasseh shang tangkhaiwui, chāngvei eina raighai phungda, malā kahu, raili tamchithei kashapa raimibing chiya raisāri ngavaiser mi thing hangmatida mati shāshini kala hangtharukna. ¹⁹Athumna Hagrinaobingli, kala Jetur, Naphish eina Nodabli rai sai. ²⁰Athumna aramli ngarar tharan athum ngachonmi samphanga; Hagrinaobing kala athumwui khangachona saikora athumwui pāngli horsangmi kahaina, kaja athumna raili ithumwui Avāli ngakaowa. Ana athumwui khangakao shāmi, kaja athumna ali shitsanga. ²¹Athumna Hagrinaobingwui sha̱kei, ut thing hangphangā, yao thing shākhani hangphangā, gadhā thing khani, kala mi thing shākha khuiya. ²²Mi kachungkha pitāda thihaowa, kaja rai chi ithumwui Avāwui raina; athum raithā kahai eina tangda chili pama.

Manasseh Shang Tangkhai: Athumwui Yāng eina Kongluihai

²³Manasseh shang tangkhai ngaleili pama; athum chungmeida Bashanwui eina Baal-hermon, Senir kala Harmon Kaphung vāshunga. ²⁴Athumwui avāva̱ ngarāwui shimkhurwui kathānabing: Epher, Ishi, Eliel, Azri-el, Jeremiah, Hodaviah, eina Jahdi-el; athum rai kapingabing, aming kazat mibing, athumwui avāva̱ ngarāwui shimkhurwui kathānabingna. ²⁵Kha athumna awova̱ ngarāwui Vareli malaikhangai malaihaida, ithumwui Avāna athumwui mangāli sākazam kahai ngalei chiwui mibingwui varebingli khayorva̱wui otsak sāthuihaowa. ²⁶Chieina Israelwui ithumwui Avāna Assyriawui awunga Pulwui, chiya Assyriawui awunga Tiglath-pileserwui, manglā ngaphaokai, kala ana Reubennaobing, Gadnaobing kala Manasseh shang tangkhaili Halahli, Haborli, Harali, kala Gozan kongpheili tukvāhaida, chili aja eina tangda pamda lei.