Dai Bazaangnu bi Ei In nge
Laa kakainu lang. Lai pheng sai rwanna. David om Kalum Laa.
Kae kanaanu lak pi zingpha kalumnu. David na Bapa khou han hungro diga kouwe, maan ding kazak thangnu mi nun khou pang chong ding kriang mako diga rinne, khatle baom ding am ongnu karonu ga baza karo khit khit basaang nge diga rinne. Bakaan tangnu bi, dai bazaangnu bi zanluga inthilune.
4 1Eina kounu kaan bi, Akhou katako, He Apa, ei om ririak senu basaangnu Nang. Ariangrenu bi Nangna akhou sok sanu riak pi thang rwe; ating phaangkriang thang ngo khatle akalumnu ngaisuwo. 2He mi nun, ei om takung tazei ding impei kaan basaan nanina kazaknu la kanei thang dingbo? Impei kaan basaan nanina pang kabia chong ding kriangga chong karwaknu nung sui zongnubo? a a v2 Selah: Kalum Laa bing bi amnu laa mak tabe puja lang badan khat gaye; haba om batak bazenu ga theila make, atiyeda haga laa thannu mak tabe laa kathan tonu ding pi theinu danga naye.
3Atiyeda ani Pa na balumsa lang khopnu mi ding Baraanto lang lang swak thang rwe dinu theiyo; eina Bakhou kounu kaan bi ani Pa na ngaisuwe. 4Kachiyo, noh to mako; nani in riak la nani sung ding zongluga, dai ga ongro.
5Ririak senu om rikhaang pot ding katro, khatle ani Pa khou balumsa towo. 6Mi taswang khakna rinnuwe, “Tu na ani khou kasanu pot khat pi mu thang dingbo?” He ani Pa, Namai om baannu ding ani lu chung bi phaangkawo!
7Nangna asung bi karo taknu pi thang rwe, haba karo ga bani om baza khatle drakha tui kathan sipnu kaan bi bani ding am ongnu karonu bina leye. 8Dai bazaangnu bi ei zanluga inthilune, balangbe He Apa, Nang baraanto gana akhou kakham kanam maak bi ring thang nge.