Katula Nsoni ya Beto
Bakento nsambwadi ke bondila bakala mosi samu na nkumbu ya yandi, kaka samu na kukatula nsoni ya bawu. Kasi bayina ke bikana na Yelusalemi ba ke bokila bawu bantu ya longo, menga ya bawu me sukulama, mpe Tata ya beto ke yala na zulu ya Siyone dituti mpe tiya—kiswamunu ya kyeleka na tiya ya ntangu mpe na kimbongila.
4 1Na kilumbu yina, bakento nsambwadi ke simba bakala mosi, bawu ke tuba: «Beto ke dya mampa ya beto mosi, mpe beto ke vwata binkuti ya beto mosi; kaka bika ti ba bokila beto na nkumbu ya nge. Katula nsoni ya beto.»
Mutwikila, ya Kitoko mpe ya Nkembo
2Na kilumbu yina, Mutwikila ya Tata ya beto ke vwanda ya kitoko mpe ya nkembo, mpe bambuma ya yinsi ke vwanda lunangu mpe nkembo ya bayina bikanaka moyo na Isayeli. a a v2 Mutwikila kele nkumbu yina Tata ya beto ke sadilaka samu na Yesu, mwana ya Davidi yina bawu silaka — nkumbu mosi yina ba pesaka yandi na manima na Yelemiya mpe na Zakali. 3Mpe konso muntu yina ke bikana na Siyone mpe ke vwanda na Yelusalemi, ba ke bokila yandi muntu ya longo—konso muntu yina ba sonikaka samu na luzingu na Yelusalemi, 4ntangu Tata, Mfumu, me sukula mvindu ya bana ya bakento ya Siyone, mpe me sukula menga ya Yelusalemi na kati ya yandi na mpeve ya kufundisa mpe na mpeve ya tiya. 5Na yina, Tata ya beto ke yidika na zulu ya kisika nyonso ya Mongo ya Siyone mpe na zulu ya balukutakanu ya yandi dituti na ntangu, mpe mulinga, mpe tiya ya kulema ya nsemo na mpimpa; samu divunga ke vwanda na zulu ya nkembo nyonso. 6Yawu ke vwanda kiwumunu samu na kupesa yisi ya mpewo na tiya ya ntangu, mpe kiswamunu mpe kisika ya kubumbama na kimbongila mpe na mvula.