Esiteri Nĩarũgama nĩ Ũndũ wa Andũ Ake

Morodekai akarĩra na mũgambo mũnene kĩhingo-inĩ ehumbĩte nguo ya ikũnia, agacooka agahinyĩrĩria Esiteri: nyũmba yake ya ũthamaki ndĩkamũhonokia, na nũũ ũũĩ kana aakinyire gĩtĩ-inĩ kĩa ũnene nĩ ũndũ wa ihinda ta rĩrĩ. Esiteri agaatha andũ mehinge kũrĩa mĩthenya ĩtatũ, agathiĩ kũrĩ mũthamaki atetĩtwo — angĩkua, akue.

Gĩcunjĩ 4.

Rĩrĩa Moridekai aamenyire maũndũ mothe marĩa maathĩĩte, agĩtembũranga nguo ciake, akĩĩhumba nguo cia makũnia na mũhu, agĩthiĩ nja itũũra-inĩ rĩrĩa inene akĩrĩraga na mũgambo mũnene na wa ruo. No aathiire o nginya kĩhingo-inĩ kĩa mũthamaki, tondũ gũtirĩ mũndũ ũngĩatoonyire kuo ehumbĩte nguo cia macakaya. Na o bũrũri-inĩ ũrĩa wothe watũmĩire watho na itua rĩa mũthamaki rĩakinyire-rĩ, Ayahudi nĩmacakaire mũno—makĩĩhinga kũrĩa irio, makĩrĩra, makĩgirĩka; aingĩ magĩkoma marĩ nguo cia makũnia na mũhu.

Rĩrĩa airĩĩtu a Esiteri na andũ ake arĩa maahakũrĩtwo maamwĩrire ũhoro ũcio, mũtumia ũcio wa mũthamaki akĩiyũrwo nĩ ruo rũnene mũno. Agĩtũmĩra Moridekai nguo nĩguo acooke kũehumba agĩte nguo cia makũnia, no akĩrega. Naake Esiteri agĩĩta Hathaki, ũmwe wa andũ a mũthamaki arĩa maahakũrĩtwo maamũtungatĩre, akĩmũtũma kũrĩ Moridekai nĩguo amenye ũndũ ũcio warĩ kĩĩ na warĩ nĩ ũndũ wa kĩĩ. Nĩ ũndũ ũcio Hathaki agĩthiĩ kũrĩ Moridekai kĩharo-inĩ kĩa itũũra kĩrĩa kĩarĩ mbere ya kĩhingo kĩa mũthamaki, Naake Moridekai akĩĩra Hathaki maũndũ mothe marĩa maamũkorete, na mũigana ũrĩa Hamani eeranĩire kũrĩha thĩinĩ wa nyũmba cia kĩgĩĩna kĩa mũthamaki nĩguo aniine Ayahudi. O na akĩmũhe karatathi ka itua rĩa kũniinwo kũrĩa rĩathanĩtwo kũu Shushani, nĩguo akĩonie Esiteri, amũtaarĩrie, na amũringĩrĩrie athiĩ athaithanĩire mũthamaki na amũthaithe nĩ ũndũ wa andũ ake.

Naake Hathaki agĩcooka, akĩĩra Esiteri ũrĩa Moridekai oigĩte. Nake Esiteri akĩarĩria Hathaki, akĩmũhe ndũmĩrĩri ĩno nĩ ũndũ wa Moridekai: “Andũ othe a mũthamaki na andũ a bũrũri wake nĩmooĩ atĩ: mũndũ o wothe, arĩ mũndũrũme kana mũndũ-wa-nja, ũrĩa ũtoonyaga nja ya na thĩinĩ ya mũthamaki ateetĩtwo-rĩ, arĩ na watho ũmwe—gĩkuũ—tiga mũthamaki aamũtambũrũkĩria rũthanju rwa thahabu, nĩguo atũũre muoyo. Na niĩ ndirĩ ndeetwo kũrĩ mũthamaki ihinda rĩa mĩthenya mĩrongo ĩtatũ rĩu.”

Rĩrĩa meerire Moridekai ũrĩa Esiteri oigĩte, Naake Moridekai agĩcookeria Esiteri atĩrĩ: “Ndũgeeciirie atĩ wee tu, thĩinĩ wa nyũmba ya ũthamaki wa mũthamaki, nĩũkahonoka ũkĩrĩ Ayahudi othe. Angĩkorwo nĩũgũkira ki rĩu-rĩ, ũteithio na ũhonokio nĩũkarahũkĩra Ayahudi kuuma handũ hangĩ, no wee na nyũmba ya thoguo nĩmũgakua. Na nũũ ũũĩ kana nĩ ũndũ wa ihinda ta rĩĩrĩ wakinyire ũthamaki-inĩ?” ^a

Naake Esiteri agĩcookeria Moridekai ũhoro ũyũ atĩrĩ: “Thiĩ, ũcookanĩrĩrie Ayahudi othe arĩa marĩ Shushani. Nĩmũkĩĩhinge kũrĩa irio nĩ ũndũ wakwa—mũtikarĩe kana mũnyue mĩthenya ĩtatũ, ũtukũ kana mũthenya. O na niĩ na airĩĩtu akwa nĩtũkeehinga kũrĩa irio. Thuutha ũcio nĩngathiĩ kũrĩ mũthamaki, o na gũtuĩka ũcio nĩ kuuna watho; na ingĩkua, ngue.” Nĩ ũndũ ũcio Moridekai agĩthiĩ, agĩĩka maũndũ mothe marĩa Esiteri aamwathĩte.