Kafara saboda Jini Marar Laifi

Kisan da ba a san wanda ya yi ba, dattawa sukan wanke hannuwansu bisa karsana su roƙi Ubanmu ya yi kafara saboda jinin marar laifi. Mace da aka kama a yaƙi dole a bar ta ta yi makoki, a aure ta, ba a sayar da ita ba. Ɗan matar da ake ƙi yana riƙe da haƙƙinsa na ɗan fari. Gawar wanda aka kashe ta hukunci kada ta kwana a rataye.

Babi na 21.

Idan aka sami mutumin da aka kashe kwance a fili, a ƙasar da Ubanku yake ba ku ku mallaka, ba kuwa wani ya san wa ya kashe shi ba, sai dattawanku da alƙalanku su fita su auna zuwa garuruwan da suke kewaye da gawar. Dattawan birnin da yake mafi kusa da gawar su ɗauki karsana wadda ba a taɓa yin aiki da ita ba, wadda kuma ba a taɓa sa mata karkiya ba, sai dattawan garin nan su gangarar da karsanar zuwa wani kwari mai ruwa mai gudu, wanda ba a taɓa nome shi ko shuka ba, su karya mata wuya a can cikin kwarin. Firistoci, 'ya'yan Lawi, su zo gaba, gama Ubanku ya zaɓe su su yi masa hidima su kuma sa albarka da sunan Ubanmu; ta wurin maganarsu ne ake sasanta kowace husuma da kowane hari. Dukan dattawan birnin nan da yake mafi kusa da gawar su wanke hannuwansu a bisa karsanar da aka karya wa wuya a cikin kwarin, su kuma furta, su ce, “Hannuwanmu ba su zubar da wannan jini ba, idanunmu kuma ba su gan shi ba. Ka yi kafara domin jama'arka Isra'ila, ya Ubanmu, waɗanda ka fansa; kada ka sa jini marar laifi a cikin jama'arka Isra'ila. Sa'an nan za a yi kafarar jinin a madadinsu.” ^a Ta haka za ku kawar da alhakin jini marar laifi daga cikinku, sa'ad da kuka yi abin da yake daidai a gaban Ubanmu.

Auren Mace Kamammiya

Sa'ad da kuka fita yaƙi da abokan gābanku, Ubanmu kuma ya bashe su a hannunku, kuka kuma kama kamammu, a cikin kamammun kuwa ka ga wata kyakkyawar mace, ka so ta, kana kuma marmarin ka aure ta, sai ka kawo ta cikin gidanka, ita kuma ta aske kanta ta kuma yanke farcenta. Ka sa ta cire tufafinta na kamuwa, ta zauna a gidanka, ta yi makoki domin mahaifinta da mahaifiyarta har wata guda cikakke. Bayan haka za ka iya shiga wurinta kana mijinta, ita kuma ta zama matarka. In ba ka ƙara sonta ba, ka bar ta ta tafi inda take so. Kada ka sayar da ita a kan azurfa, kada kuma ka mai da ita kamar baiwa, tun da ka ƙasƙantar da ita.

Gādon Ɗan Fari

In mutum yana da mata biyu, ɗaya ƙaunatacciya, ɗaya kuma marar ƙauna, dukansu biyu kuwa suka haifa masa 'ya'ya maza, amma ɗan farin na matar da ba a ƙauna ba ne, ^b sa'ad da yake raba wa 'ya'yansa gādonsa, ba zai iya mai da ɗan ƙaunatacciyar matar ɗan fari a kan ɗan matar da ba a ƙauna ba, wanda yake ainihin ɗan farin ba. A maimakon haka, sai ya amince da ɗan matarsa da ba a ƙauna a matsayin ɗan fari, yă ba shi rabo ninki biyu na dukan abin da yake da shi; gama shi ne farkon ƙarfinsa—haƙƙin ɗan fari nasa ne.

Ɗa Mai Taurin Kai da Tawaye

In mutum yana da ɗa mai taurin kai, mai tawaye, wanda ba ya yin biyayya ga mahaifinsa ko mahaifiyarsa, wanda kuma ba ya saurara sa'ad da suke horonsa, sai mahaifinsa da mahaifiyarsa su kama shi su kawo shi wurin dattawa a ƙofar birninsa, su kuma gaya wa dattawan birninsa, su ce, “Ɗanmu nan mai taurin kai ne, mai tawaye; ba ya saurarenmu—mai yawan ci ne, mashayi kuma.” Sai dukan mutanen birninsa su jajjefe shi da duwatsu har yă mutu. Ku kawar da mugunta daga cikinku, dukan Isra'ila kuwa za su ji su kuma ji tsoro.

La'ananne ne Duk Wanda Aka Rataye a Kan Itace

In zunubin mutum ya cancanci mutuwa, aka kuma kashe shi, kuka kuma rataye shi a kan itace, kada ku bar gawarsa a kan itacen ta kwana; ku binne shi a ranar, gama duk wanda aka rataye a kan itace yana ƙarƙashin la'anar Ubanmu. Kada ku ƙazantar da ƙasarku, ƙasar da Ubanku yake ba ku ku gāda. ^c