Fè ekspiyasyon pou san yon inonsan

Lè yo pa konnen ki moun ki touye yon moun, ansyen yo lave men yo sou yon gazèl bèf epi mande Papa nou padone san inonsan an. Yon fanm yo fè prizonye dwe gen tan pou l kriye, epi yo dwe marye avè l, yo pa ka vann li. Pitit gason yon madanm yo pa renmen kenbe dwa premye pitit li. Kò yon nonm yo egzekite pa dwe rete pandye pandan lannwit.

Chapit 21.

Si yo jwenn kadav yon moun yo touye kouche nan yon jaden, nan peyi Papa nou ap ba nou pou nou pran pou nou an, epi pèsonn pa konnen ki moun ki touye l, lè sa a, chèf fanmi nou yo ak jij nou yo va soti, y'a mezire distans ki genyen ant kadav la ak vil ki toupre yo. Chèf fanmi ki nan vil ki pi pre kadav la va pran yon gazèl ki poko janm travay, ki poko janm pote jouk nan kou l, Chèf fanmi vil sa a va mennen gazèl la desann nan yon ravin kote dlo ap koule, yon kote yo poko janm raboure ni plante, epi la nan ravin lan y'a kase kou l. Prèt yo, pitit Levi yo, va pwoche, paske se yo Papa nou chwazi pou sèvi l epi pou beni pèp la nan non Papa nou; se dapre pawòl yo y'ap regle tout kont ak tout ka kou moun bay. Tout chèf fanmi vil ki pi pre kadav la va lave men yo sou gazèl yo te kase kou a nan ravin lan, epi y'a deklare: “Se pa men nou ki vèse san sa a, ni je nou pa t wè l fèt. Fè ekspiyasyon pou pèp ou a, Izrayèl, O Papa nou, pèp ou te delivre a; pa mete san yon inonsan sou kont pèp ou a, Izrayèl. Konsa, y'a jwenn padon pou san sa a.” ^a Se konsa, n'a wete chaj san inonsan an nan mitan nou, lè nou fè sa ki dwat devan je Papa nou.

Yon fanm prizonye yo pran pou madanm

Lè nou soti pou n'al goumen ak lènmi nou yo, epi Papa nou lage yo nan men nou, kifè nou fè prizonye, si pami prizonye yo nou wè yon bèl fanm, nou vin renmen l, nou ta vle pran l pou madanm nou, lè sa a, mennen l lakay nou, epi l'a raze tèt li, l'a koupe zong li. Fè l wete rad prizonye li te genyen sou li, l'a rete lakay nou, l'a kriye pou papa l ak manman l pandan yon mwa antye. Apre sa, nou ka al jwenn li tankou mari, epi l'a tounen madanm nou. Si nou pa vle l ankò, kite l ale kote l vle. Nou pa gen dwa vann li pou lajan, ni trete l tankou yon esklav, paske nou te fè l wont.

Eritaj premye pitit gason an

Si yon nonm gen de madanm, youn li renmen, lòt la li pa renmen, epi toule de fè pitit gason pou li, men premye pitit la se pitit madanm li pa renmen an, ^b lè l'ap separe byen li bay pitit li yo, li pa gen dwa fè pitit gason madanm li renmen an pase pou premye pitit la devan pitit gason madanm li pa renmen an, ki se vrè premye pitit la. Okontrè, li dwe rekonèt pitit gason madanm li pa renmen an kòm premye pitit, epi ba li de pòsyon nan tou sa l genyen; paske se li menm ki premye pitit fòs li—se dwa premye pitit la ki pou li.

Yon pitit gason tèti ki rebèl

Si yon nonm gen yon pitit gason ki tèti e ki rebèl, ki refize obeyi papa l ni manman l, ki pa koute lè yo pini l, lè sa a, papa l ak manman l va kenbe l, y'a mennen l bay chèf fanmi yo bò pòtay lavil la. Y'a di chèf fanmi lavil la: “Pitit gason nou an tèti e li rebèl; li refize koute nou—se yon aloufa, se yon tafyatè.” Tout gason ki nan lavil la va kalonnen l wòch jouk li mouri. Se konsa n'a wete sa ki mal la nan mitan nou, epi tout pèp Izrayèl la va tande sa, y'a pè.

Madichon pou nenpòt moun yo pandye sou yon pyebwa

Si yon moun fè yon peche ki merite lanmò, epi yo touye l, apre sa nou pandye kadav li sou yon pyebwa, pa kite kadav li pase nwit lan sou pyebwa a; antere l menm jou a, paske nenpòt moun yo pandye sou yon pyebwa anba madichon Papa nou. Pa kite peyi a vin sal, peyi Papa nou ap ba nou pou eritaj la. ^c