Kusweka mu Kininga

Wuna wisi zinga mu luswekamu lwa Wuna wa Zulu-Zulu, ha tsi ya kininga kyandi, kasilwa lukanu lwa kufidingwa mu muyubi, mu kimbefu, mu bweya bwa phipha yi mu kimbefu kya mwini, kumosi yi banzyo bana bahanwa muswa mu kisalu kya kudyata. Muna suka, Tata wetu kazonza: mukuma kenina kangama kwena meni, yikamúvutula.

Tata wetu kisi zonza mu mavese 14–16

Kapitulu 91.

Wuna wisi zinga mu luswekamu lwa Wuna wa Zulu-Zulu kalémbwila mu kininga kya Wuna wa Ngolu Zoosu.

Yizímbula mu diambu dya Tata wama: «Yandi kenina kiswaminu kyama yi homa hama ha ngolu, Tata wama, wuna nsisi mbundu yama mwena yandi.»

Bwa kyedika, kakúphulula mu mutambu wa muyubi yi mu kimbefu kya lufwa. Kakúfidinga ni masala mandi, amana ku tsi ya mahela mandi, wawána kiswaminu; kwikama dyandi dyenina kibalaka kyaku yi luphangu lwaku. Kwakalaku yi bweya bwa phipha, keti phunza yina yisi dumuka mu mwini, keti kimbefu kina kyisi kangala mu phipha, keti kimbefu kya mbi kina kyisi honda mu tangwa dya tsinzi. Funda dimosi dyalenda kubwa ku luhembu lwaku, mafunda kumi ku koku kwaku kwa lubakala, kaasi kikubwesukaku kwena ngeyi. Ngeyi, kaka, watála yi kumona ndola ya batu ba mbi.

Mukuma ngeyi wákhitula Tata wama kiswaminu kyaku—Wuna wa Zulu-Zulu homa haku ha kuzinga, Ka diambu dya mbi ku dyakubwila, ka kimbefu ku kyabwesuka bela-bela yi sombolu yaku. Mukuma kahána muswa kwena banzyo bandi mu diambu dyaku, ndangu bakulema mu nzila zaku zoosu. ^a Bakulela muna moku ma bawu, ndangu kulu dyaku didikhukulaku ku tadi. Wadyata ha thandu ya khosi yi nyoka ya ndikila; wadyatikisa mwana khosi yi nyoka ku tsi ya malu maku.

«Mukuma yandi wisi dihana mwena meni mu lungongu, yimúhulula yandi; yimútombula ku zulu, mukuma yandi wuzayi khumbu yama. Katela kwena meni, amana yimúvutula yandi; yikála yi yandi mu kiwayi; yimúphulula amana yimúzitisa. Ni luzingu lwa bilumbu bya lawu yimúyukutisa yandi, amana yimúsongila luhulusu lwama.»