Chaya te Surokhit

Kun manuh Sobse Mohan Isor laga asroi nichete usote thake, taike lukai thaka dushman, bemar, rati laga bhoi aru dopahar laga mohamari pora dhaki dibo koi kene vachan dise, aru tai laga hodai din laga khoj-khoj nimite sorgodut khan ke rakhi dise. Sesh te amar Pitri koi: tai Moike dhori thake karone, Moi taike jawab dibo.

Adhyay 91.

Kun manuh Sobse Mohan Isor laga asroi te thake, tai Sob-shaktiman Isor laga chaya te aram pabo.

Moi laga Pitri laga karone moi kobo, “Tai moi laga asroi aru moi laga gorh ase, moi laga Pitri, Jun ke moi biswas kore.”

Hosa pora Tai tumi ke shikari laga jaal pora aru mrityu-ana bemar pora bachai lobo. Tai Tar laga pokha khan pora tumi ke dhaki dibo, aru Tar laga pakha nichete tumi asroi pabo; Tar laga biswas-thaka tu tumar dhal aru gorh-dewal ase. Tumi rati laga bhoi ke nadaribo, aru din te uri jua tir ke bhi nadaribo, aru andhar te berai thaka bemar ke bhi nadaribo, aru dupor bela te khotom kora mohamari ke bhi nadaribo. Tumar kinar te 1,000 giri jabo, tumar dyna hath te 10,000, kintu eitu tumar usor te nahibo. Tumi khali sai kene paapi khan laga saja dekhibo.

Kilemane tumi moi laga Pitri ke tumar asroi bonaise—Sobse Mohan Isor ke tumar thaka jaga, eku biya tumi ke napabo, eku mohamari tumar tombu laga usor te nahibo. Kilemane Tai tumar karone Tar laga sorgoduth khan ke hukum dibo, tumi ke tumar sob rasta te rokhya koribole. ^a Tarkhan nijor hath khan pora tumi ke dhori rakhibo, titia tumi laga theng pathor te nalagibo. Tumi singho aru phonia saap uporte khujibo; tumi jawan singho aru saap ke theng nichete chipai dibo.

“Kilemane tai morom pora Moi ke dhori rakhe, Moi tai ke bachai lobo; Moi tai ke unchate rakhibo, kilemane tai Moi laga nam jane. Tai Moi ke matibo, aru Moi tai ke jawab dibo; dukh homoi te Moi tai logote thakibo; Moi tai ke bachai lobo aru sonman dibo. Lamba jivon pora Moi tai ke santushto koribo aru tai ke Moi laga poritran dikhabo.”